គ្រាប់បែកផ្សែង ត្រូវបានប្រើប្រាស់ដោយកងរាជអាវុធហត្ថនៅក្នុងការបំបែកដោយហិង្សាលើបាតុករ
ចេញផ្សាយ ថ្ងៃទី២៧ ខែមករា ឆ្នាំ២០១៤
ការបង្ក្រាបយ៉ាងហិង្សាលើបាតុកម្មអហិង្សា បានបន្តកើតមានឡើងទៀតនៅថ្ងៃនេះ នៅពេលដែលកងសន្តិសុខរបស់សាលារាជធានីភ្នំពេញ មនុស្សស្លៀកពាក់ស៊ីវិលប្រដាប់ដោយដំបងឆក់ កងរាជអាវុធហត្ថ និងនគរបាលបង្ក្រាបបាតុកម្មជាច្រើន បានរារាំងអ្នកគាំទ្រលោកម៉ម សូណង់ដូ ពីការប្រមូលផ្តុំតវ៉ានៅទីលានប្រជាធិបតេយ្យ និងនៅមុខក្រសួងព័ត៌មាន ដែលបណ្តាលឲ្យមនុស្សយ៉ាងតិច ១០នាក់ រងរបួស ដោយរួមមានមនុស្សចំនួន ៦ នាក់ ត្រូវបានបញ្ជូនទៅកាន់មន្ទីរពេទ្យ។ លោក ម៉ម សូណង់ដូ ម្ចាស់ស្ថានីយ៍វិទ្យុសំបុកឃ្មុំ ហើយនិងអ្នកគាំទ្រប្រមាណ ១០០០ នាក់ ត្រូវបានរារាំងពីការចូលទៅប្រមូលផ្តុំនៅទីលានប្រជាធិបតេយ្យ ដោយកងសន្តិសុខរបស់សាលាក្រុង និងមនុស្សស្លៀកពាក់ស៊ីវិលប្រដាប់ដោយដំបងឆក់ កាលពីព្រឹកមិញ។ កងសន្តិសុខ និងមនុស្សស្លៀកពាក់ស៊ីវិលនោះ បានព្យាយាមបិទផ្លូវពីទីលានទៅកាន់ក្រសួងព័ត៌មាន ដែលជាកន្លែងដែលអ្នកតវ៉ាទាមទារឲ្យវិទ្យុសំបុកឃ្មុំ (ជាវិទ្យុឯករាជ្យមួយក្នុងចំនោមវិទ្យុឯករាជ្យដ៏តិចតួចនៅកម្ពុជា) អាចមានប៉ុស្តិ៍ទូរទស្សន៍ផ្ទាល់ខ្លួនមួយ និងលទ្ធភាពផ្សព្វផ្សាយទូទាំងប្រទេសរបស់វិទ្យុនេះ។ នៅពេលមកដល់មុខក្រសួងព័ត៌មាននៅប្រហែលម៉ោង ១០ ព្រឹក អ្នកតវ៉ាបានឃើញទ្វាររបស់ក្រសួងត្រូវបានចាក់សោរ ហើយមានកងរាជអាវុធហត្ថ និងនគរបាលបង្ក្រាបបាតុកម្មប្រហែល ៨០០ នាក់។ ភ្លាមៗបន្ទាប់ពីនោះមក កងសន្តិសុខជាច្រើននាក់ថែមទៀត បានលេចមុខចេញមកពីបរិវេណសាលារាជធានីភ្នំពេញ ដោយធ្វើការបិទផ្លូវព្រះមុនីវង្ស។ អាជ្ញាធរ បានធ្វើការព្រមានអ្នកគាំទ្រ និងអ្នកកាសែតឲ្យចាកចេញពីទីនោះ។ នៅត្រឹមរយៈពេលប៉ុន្មាននាទីក្រោយ កងសន្តិសុខជាង ១០០០ នាក់ បានរំកិលខ្លួនទៅមុខឆ្ពោះទៅកាន់ក្រុមបាតុករ។ នៅក្នុងរយៈពេល ២០ នាទី កងកម្លាំងដោយមានជំនួយពីគ្រាប់បែកផ្សែង បានប្រើប្រាស់ដំបងឆក់វាយទៅលើអ្នកតវ៉ា និងអ្នកឈរមើលព្រឹត្តិការណ៍នោះ ដែលធ្វើឲ្យមនុស្សយ៉ាងតិចណាស់ ៨ នាក់ត្រូវបានគេវាយឲ្យរបួស និងឆក់។ យ៉ាងតិចណាស់ មានមនុស្សចម្លែកប្រើប្រាស់ជំពាមកៅស៊ូចំនួន ២ នាក់ ដែលដូចនឹងបាតុកម្មកាលពីលើកមុន ត្រូវបានគេវាយដោយក្រុមមនុស្ស។ នៅប្រហែលម៉ោង ១០ និង៣០ នាទី អ្នកតវ៉ាជាច្រើន ប្រមូលផ្តុំគ្នាឡើងវិញនៅខាងក្រៅក្បែរស្ថានទូតសហរដ្ឋអាមេរិក ហើយត្រូវបានបង្ខំឲ្យចាកចេញដោយនគរបាលបង្ក្រាបបាតុកម្ម ដោយរុញច្រានក្រុមតូចមួយក្រុមឲ្យដើរហែក្បួនឆ្ពោះទៅកាន់វិមានឯករាជ្យនៅបណ្តោយផ្លូវព្រះនរោត្តម។ នៅប្រហែលម៉ោង ១១ ព្រឹក នគរបាលបង្ក្រាបបាតុកម្មប្រហែល ១០០ នាក់ ប្រដាប់ដោយអាវុធ បានបំបែកក្រុមតវ៉ាមួយក្រុមនោះជាលើកចុងក្រោយ ចេញពីផ្លូវព្រះនរោត្តមនោះ។
- ចំណងជើង & មូលបទ
- សិទិ្ធបញ្ចេញមតិ និងចូលរួម ម៉ម សូណង់ដូ
