ពលរដ្ឋនៅខេត្តសៀមរាបតវ៉ាជំទាស់ជាមួយនឹងការរឹតត្បិតរបស់អាជ្ញាធរអប្សរា
ចេញផ្សាយ ថ្ងៃទី១៥ ខែមករា ឆ្នាំ២០២៤នាព្រឹកនេះប្រជាពលរដ្ឋរស់នៅខេត្តសៀមរាបជាច្រើនរយនាក់ ធ្វើការដើរតវ៉ាឆ្ពោះទៅកាន់សាលាខេត្ត ដើម្បីដាក់ញត្តិទាមទារឱ្យមានការអន្តរាគមន៍ពីសំណាក់រាជរដ្ឋាភិបាល និង អង្គការយូណេស្កូ ក្នុងគោលបំណងបញ្ឈប់ការរឹតត្បិតដោយបង្ខំរបស់អាជ្ញាធរអប្សរា ក្នុងការសាងសង់សំណង់ និងរៀបចំជួសជុលផ្សេងៗ ។ អាជ្ញាធរអប្សរា គឺជាភ្ញាក់ងាររបស់រាជរដ្ឋាភិបាល ដែលមានតួនាទីគ្រប់គ្រងឧទ្យានអង្គរ ។
ប្រជាពលរដ្ឋប្រមាណជាង៥០០នាក់ ដែលមកពីឃុំខ្នាត ស្រុកពួក និង សង្កាត់ទឹកវិល ក្រុងសៀមរាប បានធ្វើការដង្ហែក្បួនដោយមានកាន់បដា ឆ្ពោះទៅទីតាំងមុខសាលាខេត្តសៀមរាប ដើម្បីដាក់ញតិ្តស្នើសុំឱ្យ សម្តេចនាយករដ្ឋមន្ត្រី ហ៊ុន ម៉ាណែត សម្តេច ហ៊ុន សែន និងអង្គការយូណេស្កូ អន្តរាគមន៍ ដោយបញ្ឈប់អាជ្ញាធរអប្សរា កុំឱ្យបង្កការភ័យខ្លាចនិងទប់ស្កាត់រាល់ការសាងសង់ ឬជួសជុលរបស់ប្រជាពលរដ្ឋនៅក្នុងឃុំខ្នាត ។ នៅក្នុងញត្តិនោះ ពលរដ្ឋបានលើកឡើងថា តំបន់ដែលពលរដ្ឋស្នើសុំនោះ គឺនៅឆ្ងាយពីតំបន់ប្រាសាទរបស់ឧទ្យានអង្គរ ។
នៅពេលហែក្បួនតវ៉ា ប្រជាពលរដ្ឋជាច្រើននាក់ ត្រូវបានឃាត់មួយរយៈ ដោយកងកម្លាំងនគរបាលប្រមាណជា២០នាក់ ដឹកនាំដោយអភិបាលស្រុកពួក លោក ស៊ិន ចាន់ថុល ដោយលោកអភិបាលស្រុកចង់ឱ្យប្រជាពលរដ្ឋតែ ៤ទៅ៥នាក់ប៉ុណ្ណោះ ដើម្បីយកញាត្តិទៅដាក់ ប៉ុន្តែប្រជាពលរដ្ឋបានបដិសេធ ហើយពួកគេនៅតែបន្តការដង្ហែក្បួនឆ្ពោះទៅកាន់សាលាខេត្តដដែល ដោយធ្វើដំណើររហូតដល់ផ្លូវចូលមុខសាលាខេត្តដោយមានកាន់បដាផងដែរ ។ បដាមួយក្នុងចំណោមបដាជាច្រើន ដែលកាន់ដោយសមាជិកសហគមន៍បានសរសេរថា៖ “ពួកយើងមិនអនុញ្ញាតិឲ្យអាជ្ញាធរអប្សរាបន្តការគាបសង្កត់មកលើសហគមន៍របស់យើងទៀតទេ”។
ញតិ្តដែលបានយល់ព្រមទទួលដោយ លោកអភិបាលខេត្តសៀមរាប លោក ប្រាក់ សោភ័ណ្ឌ ក៏បានសរសេរថា៖ “ ចាប់ពីថ្ងៃតនេះទៅយើងខ្ញុំទាំងអស់គ្នាមិនទទួលស្គាល់អាជ្ញាធរអប្សរា បន្តទៀតទេ ហើយក៏មិនឲ្យអាជ្ញាធរអប្សរា មកគ្រប់គ្រងលើយើងខ្ញុំទាំងអស់គ្នាទៀតដែរ” ។ ប្រជាពលរដ្ឋក៏ត្រឡប់ទៅផ្ទះវិញ បន្ទាប់ពីដាក់ញាតិរួច។
អាជ្ញាធរអប្សរា រួមជាមួយក្រសួងនានារបស់រាជរដ្ឋាភិបាល បានអនុវត្តការបណ្ដេញពលរដ្ឋចេញពីភូមិដ្ឋាននៅក្នុងតំបន់ឧទ្យាន អង្គរ យ៉ាងតិចចំនួនមួយម៉ឺននាក់ ចាប់តាំងពីឆ្នាំ ២០២២ មក ។ អាជ្ញាធរអប្សរា បានបំលាស់ទីលំនៅអ្នកទាំងនោះទៅកាន់ទីតាំងថ្មីដែលមិនទាន់មានការអភិវឌ្ឍន៍ និងខ្វះខាតហេដ្ឋារចនាសម្ព័ន្ធ ដែលនៅទីនោះគ្រួសារជាច្រើនទទួលបានសេវាសាធារណៈតិចតួចបំផុត ឬគ្មានឱកាសការងារ។
រាជរដ្ឋាភិបាលអះអាងថា ការបណ្តេញចេញត្រូវបានជំរុញដោយអង្គការយូណេស្កូ ហើយបាននិយាយថា អង្គការយូណេស្កូបាននិយាយអំពីការដកហូតឋានៈបេតិកភណ្ឌរបស់ប្រាសាទ ប្រសិនបើអ្នករស់នៅក្នុងតំបន់ត្រូវបានអនុញ្ញាតឱ្យស្នាក់នៅលើទីតាំងនោះ។ អង្គការយូណេស្កូបានអះអាងជាការឆ្លើយតបទៅនឹងការស្រាវជ្រាវដែលចេញផ្សាយដោយអង្គការលើកលែងទោសអន្តរជាតិថា ខ្លួនមិនបានអំពាវនាវឱ្យមាន "ការផ្លាស់ទីលំនៅរបស់ប្រជាជន" ប៉ុន្តែក៏មិនបានទទួលស្គាល់សកម្មភាពបណ្តេញចេញដោយបង្ខំ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម