ការតវ៉ារបស់លោកសូណង់ដូ ត្រូវបានបញ្ចប់យ៉ាងខ្លីដោយអាជ្ញាធរជាច្រើន
ចេញផ្សាយ ថ្ងៃទី៣១ ខែមីនា ឆ្នាំ២០១៤
នៅព្រឹកនេះ ម្ចាស់ស្ថានីយ៍វិទ្យុឯករាជ្យ លោកម៉ម សូណង់ដូ ត្រូវបានហាមឃាត់ពីការធ្វើការហែក្បួនទៅកាន់ក្រសួងព័ត៌មាន។ លោក សូណង់ដូ បានអំពាវនាវដល់អ្នកគាំទ្ររបស់លោកឲ្យប្រមូលផ្តុំគ្នាតវ៉ានឹងការបដិសេធរបស់ក្រសួងព័ត៌មានស្តីពីការមិនអនុញ្ញាតឲ្យលោកមានប៉ុស្តិ៍ទូរទស្សន៍ និងហ្វ្រេកង់បន្ថែមសម្រាប់ស្ថានីយ៍វិទ្យុរបស់លោក។ នៅមុនពេលលោកមកដល់ អ្នកគាំទ្ររបស់លោកត្រូវបានបំបែកយ៉ាងហិង្សាដោយកងសន្តិសុខជាច្រើននាក់ ដែលបណ្តាលឲ្យបុរសចំនួនពីរនាក់រងរបួសដោយការវាយដំ និងត្រូវបានបញ្ជូនទៅរកការព្យាបាល។ បុរសម្នាក់ ត្រូវបានឃុំខ្លួនមួយរយៈពេលខ្លី។ បុរសនោះក្រោយមកត្រូវបានដោះលែង បន្ទាប់ពីចុះហត្ថលេខាសន្យាថានឹងឈប់ចូលរួមក្នុងបាតុកម្មតទៅទៀត។ នៅខណៈពេលដែលមានការរុញច្រានដោយអាជ្ញាធរជាច្រើន លោកសូណង់ដូ បានថ្លែងសុន្ទរកថាយ៉ាងខ្លីទៅកាន់អ្នកគាំទ្រ អំពាវនាវសុំឲ្យមានសេរីភាពទទួលបានព័ត៌មាន និងស្នើសុំកុំឲ្យមានអំពើហិង្សា។
បច្ចុប្បន្ននេះ ប្រទេសកម្ពុជាមិនមានស្ថានីយ៍ទូរទស្សន៍ឯករាជ្យនៅឡើយ ដោយក្រសួងព័ត៌មានបានបដិសេធជាលក្ខណៈប្រព័ន្ធ ក្នុងការផ្តល់អាជ្ញាប័ណ្ណទៅដល់បុគ្គលណាដែលមិនមាននិន្នាការទៅរកគណបក្សប្រជាជនកម្ពុជា។
- ចំណងជើង & មូលបទ
- សិទិ្ធបញ្ចេញមតិ និងចូលរួម ម៉ម សូណង់ដូ
