កម្មកររោងចក្រម្នាក់ដែលរងរបួសក្នុងព្រឹត្តិការណ៍នៃការបង្ក្រាបថ្ងៃទី៣ ខែមករា បានទទួលមរណភាពកាលពីព្រឹកមិញនេះ ដោយមូលហេតុមិនទាន់បានកំណត់ច្បាស់
ចេញផ្សាយ ថ្ងៃទី១៧ ខែឧសភា ឆ្នាំ២០១៤
នាព្រឹកនេះ នៅវេលាម៉ោង ៣ និង ១៥នាទី ព្រឹក លោក មួន សុខមាន អាយុ ២៩ឆ្នាំ ដែលបានរងរបួសក្នុងព្រឹត្តិការណ៍ថ្ងៃទី៣ ខែមករា បានទទួលមរណភាព នៅខណៈពេលដែលលោកកំពុងត្រូវបានបញ្ជូនទៅកាន់មន្ទីរពេទ្យ។ នៅថ្ងៃនៃការបង្ក្រាបបាតុកម្មរបស់កម្មកររោងចក្រកាត់ដេរ នៅតាមបណ្តោយផ្លូវវេងស្រេង លោកត្រូវបានគេបញ្ជូនមកកាន់មន្ទីរពេទ្យ បន្ទាប់ពីរងរបួសត្រង់ខ្លួន ក្បាល និងមុខ។
កាលពីល្ងាចម្សិលមិញ ក្រុមគ្រួសាររបស់លោក បានសង្កេតឃើញលោកមិនសូវបានសម្រាកគ្រប់គ្រាន់ និងរវើរវាយ ហេតុដូចនេះទើបអ្នកទាំងនោះក៏បានបញ្ជូនលោកទៅកាន់មន្ទីរពេទ្យវិញ ក៏ប៉ុន្តែលោកបានទទួលមរណភាពនៅតាមផ្លូវទៅកាន់មន្ទីរពេទ្យ។
ការបង្ក្រាបយ៉ាងហិង្សាដោយកងកម្លាំងចំរុះរបស់អាជ្ញាធររដ្ឋ ចាប់ពីថ្ងៃទី២ ខែមករា ឆ្នាំ២០១៤ បានបណ្តាលឲ្យមនុស្សយ៉ាងតិចណាស់ ៤នាក់បានស្លាប់ ជាច្រើននាក់រងរបួស ហើយ ២៣ នាក់ត្រូវបានចាប់ខ្លួន ដែលក្នុងនោះរួមមានកម្មករ និងអ្នកការពារសិទិ្ធមនុស្ស។ ក្មេងប្រុសម្នាក់ឈ្មោះ ខឹម សុផាត ត្រូវបានគេឃើញជាចុងក្រោយនៅព្រឹកថ្ងៃទី៣ ខែមករា ដោយបានដួលទៅលើដីលើផ្លូវវេងស្រេងដោយមានហូរឈាម ពីកន្លែងដែលត្រូវគ្រាប់កាំភ្លើងត្រង់ដើមទ្រូង។ រហូតមកទល់ពេលនេះ មិនដឹងថាតើ សុផាត ស្ថិតនៅទីណានោះទេ។
- ឯកសារទាក់ទង
- ចំណងជើង & មូលបទ
- អំពើហិង្សាវ៉េង ស្រេង
