តំណាងប្រជាពលរដ្ឋមកពីបណ្តាខេត្តនានាក្នុងប្រទេសកម្ពុជា ជួបជុំគ្នានៅទីក្រុងភ្នំពេញ ដើម្បីទាមទារបញ្ឈប់ ការសម្បទានដី និងការគំរាមកំហែង បំភិតបំភ័យ និងការប្រើអំពើហិង្សាពីសំណាក់ក្រុមហ៊ុន និងអ្នកមានអំណាចមួយចំនួន
ចេញផ្សាយ ថ្ងៃទី៨ ខែតុលា ឆ្នាំ២០០៨; ក្រុមសង្គមស៊ីវិល
“បច្ចុប្បន្នមិនត្រឹមតែដីរបស់យើងទេដែលត្រូវគេយកទៅឲ្យអ្នកដទៃនោះទេ ប៉ុន្តែយើងថែមទាំងកំពុងប្រឈមមុខការបំភិតបំភ័យ និងអំពើហិង្សាកាន់តែខ្លាំងឡើងៗថែមទៀតផង ។ បញ្ហានេះកំពុងតែមានស្ថានភាពកាន់តែធ្ងន់ធ្ងរទៅៗ ។ យើងគ្មានជម្រើសអ្វីផ្សេងក្រៅពីប្រមូលផ្តុំគ្នា និងបញ្ចេញសម្លេងរួមគ្នានោះទេ ។” តំណាងប្រជាពលរដ្ឋមកពីបណ្តាខេត្តនានាក្នុងប្រទេសកម្ពុជា
១. លោក សំឆេង ខេត្ត ព្រះវិហារ
២. លោក សារ៉ែន កែត ខេត្ត ក្រចេះ
៣. លោក រចំ ទ្វេង ខេត្ត រតនៈគីរី
៤. លោកស្រី ឡោន ស៊ីវី ខេត្ត ពោធិ៍សាត់
លោកស្រីវេជ្ជបណ្ឌិត ពុង ឈីវកេក ប្រធានសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) បានមានប្រសាសន៍ថា “ការគំរាមកំហែង អំពើហឹង្សា និងការបំភិតបំភ័យដែលមានលក្ខណៈជាប្រព័ន្ធនៅតែបន្តកើតមានចំពោះអ្នកការពារសិទ្ធិមនុស្ស ជាពិសេសអ្នកការពារសិទ្ធិមនុស្សដែលធ្វើការពាក់ព័ន្ធនឹងបញ្ហាដីធ្លី ។ ដំណោះស្រាយនឹងកើតមាន ប្រសិនបើមានការពិគ្រោះយោបល់គ្នាពិតប្រាកដ និងការចូលរួមរបស់សហគមន៍ដែលទទួលរងគ្រោះ ។” លោកស្រីវេជ្ជបណ្ឌិត ពុង ឈីវកេក ប្រធានអង្គការលីកាដូ
កន្លែងៈ អាគារនៃអង្គការ World Vision នៅលើដំបូល (ជាន់ទី៤)
អាស័យដ្ឋាន ផ្ទះលេខ ២០. ផ្លូវលេខ៧១. សង្កាត់ទន្លេបាសាក់. ខណ្ឌចំការមន. រាជធានីភ្នំពេញ
កាលបរិច្ឆេទៈ ថ្ងៃទី៩ ខែតុលា ឆ្នាំ២០០៨
ម៉ោងៈ ១៤:០០ ដល់ ១៦:០០
អ្នកចូលរួមៈ តំណាងបណ្តាសហគមន៍មកពីទូទាំងខេត្ត-ក្រុងព្រះរាជាណាចក្រកម្ពុជា (ជាង១០០នាក់)
នៅខែមិថុនា ឆ្នាំ២០០៨ បណ្តាសហគមន៍នានាមកពី៥ខេត្ត-ក្រុង ដែលបានដាក់បណ្តឹងជាសាធារណៈអំពីសម្បទានដី និងការចោទប្រកាន់អំពីការរំលោភយកដីធ្លីបានទទួលរងនូវការយាយីរំខានពីសំណាក់អាជ្ញាធរដូចជា ការហាមមិនឲ្យធ្វើដំណើរ និងលទ្ធភាពនៃការជួបជុំគ្នា. និងការគំរាមទប់ស្កាត់ពីសំណាក់នគរបាលមិនឲ្យសហគមន៍ដាក់ពាក្យបណ្តឹងទៅរាជរដ្ឋាភិបាលនៃព្រះរាជាណាចក្រកម្ពុជា ។ ទន្ទឹមនឹងនេះ ក៏មានរបាយការណ៍ដែលរាយការណ៍មកថា មានការបំពានលើរាងកាយ ការគំរាមកំហែង និងការបំភិតបំភ័យ ដល់តំណាងសហគមន៍ដែលរៀបចំពាក្យបណ្តឹងថែមទៀតផង ។ នៅក្នុងខែនេះ ការព្យាយាមបើកវេទិកាសាធារណៈមួយដើម្បីពិភាក្សាអំពីការរៀបចំ ពាក្យបណ្តឹងក៏ត្រូវក្រុមអាជ្ញាធរមានសមត្ថកិច្ចរារាំងមិនឲ្យប្រព្រឹត្តទៅបានដែរ ។
នៅពេលនោះ បណ្តឹងសំខាន់ៗមកពីប្រាំខេត្ត ត្រូវបានដាក់ជូនរដ្ឋាភិបាល ។ រដ្ឋមន្ត្រីក្រសួងកសិកម្ម រុក្ខា ប្រម៉ាញ និងនេសាទ បានបញ្ជាក់ថា ក្រសួងបានសន្យាថានឹងចុះស៊ើបអង្កេត ចាត់ការលើបញ្ហានោះ ។ ប៉ុន្តែតាំងពីពេលនោះមកសហគមន៍មិនទទួលបាននូវដំណោះស្រាយលើពាក្យបណ្តឹងរបស់ពួកគាត់ទេ តាមការពិតសហគមន៍ឃើញយ៉ាងជាក់ស្តែងថា ចំនួននៃសម្បទានដី ឬការរំលោភយកដីធ្លីកាន់តែកើនឡើង ។
តាមសញ្ញានៃសាមគ្គីភាពក្នុងចំណោមសហគមន៍ទាំងអស់ដែលប្រឈមនឹង ការបណ្តេញចេញ. ការបាត់បង់ដីធ្លី និងការយាយីរំខាននៅតែមានបន្ត តំណាងសហគមន៍មកពី១១ខេត្ត-ក្រុងនឹងនាំគ្នាបង្ហាញបញ្ហាដែលពួកគាត់មាន នៅពេលព្រឹកដោយដាក់បណ្តឹងរបស់ខ្លួនទៅរដ្ឋាភិបាល ។ តំណាងមកពីៈ រតនៈគីរី មណ្ឌលគីរីកំពត ពោធិ៍សាត់ ឧត្តរមានជ័យ ក្រចេះ កោះកុង កំពង់ចាម កំពង់ឆ្នាំង ព្រះវិហារ និងរាជធានីភ្នំពញ ។
ពាក្យបណ្ដឹងទាំងនេះភាគច្រើនទាក់ទងនឹងការផ្តល់សម្បទានដី ដែលជារដ្ឋាភិបាលកម្ពុជា ប្រគល់ទៅឲ្យក្រុមហ៊ុននានា ឬអនុញ្ញាតឲ្យមានការផ្ទេរដីឯកជន ទៅក្រុមហ៊ុនឯកជន ទៅតាមលក្ខណៈដែលមិនបានអនុវត្តតាមច្បាប់ភូមិបាល ។
របាយការណ៍ថ្មីៗនេះរបស់អង្គការសហប្រជាជាតិ បានអធិប្បាយស្ថានភាពនេះថាៈ
ឬសគល់នៃកង្វល់ទាំងនេះគឺ ការពង្រឹង និងការអនុវត្តមិនបានល្អ នូវលក្ខខណ្ឌនៃច្បាប់ភូមិបាល និងអនុក្រឹត្យស្តីពីសម្បទានដីសេដ្ឋកិច្ច ដែលគ្រប់គ្រងលើការផ្តល់ និងរៀបចំសម្បទានដីសេដ្ឋកិច្ច ។ លក្ខខណ្ឌតម្រូវជាមុនសំខាន់ៗក្នុងការផ្តល់សម្បទានដីសេដ្ឋកិច្ច ដូចជាការចុះបញ្ជីដី ជាដីឯកជនរបស់រដ្ឋ និងការពិគ្រោះយោបល់ជាសាធារណៈ និងការវាយតម្លៃផលប៉ះពាល់បរិស្ថានសង្គម មិនត្រូវបានបំពេញទេ ។ ដូចគ្នានេះដែរ កម្រិតអំពីទំហំ និងអំពីកម្មសិទ្ធិនៃសម្បទានដីសេដ្ឋកិច្ចក៏មិនបានអនុវត្តត្រឹមត្រូវដែរ ។ ផ្ទុយទៅវិញ សម្បទានដីសេដ្ឋកិច្ចនោះមិនបានជំរុញការអភិវឌ្ឍន៍ជនបទ និងកាត់បន្ថយភាពក្រីក្រទេ ប៉ុន្តែបែរជា ការធ្វើឲ្យសិទ្ធិ និងជីវភាពរស់នៅរបស់ប្រជាពលរដ្ឋខ្មែរនៅក្នុងព្រះរាជាណាចក្រកម្ពុជា កាន់តែចុះខ្សោយទៅវិញ ។
ការិយាល័យឧត្តមស្នងការសហប្រជាជាតិ ទទួលបន្ទុកផ្នែកសិទ្ធិមនុស្ស ប្រចាំនៅកម្ពុជា. សម្បទានដី សេដ្ឋកិច្ចនៅកម្ពុជា. ទស្សនៈអំពីសិទ្ធិមនុស្ស
សម្រាប់ព័ត៌មានបន្ថែម សូមទាក់ទង៖
▪ លោក សេង សុខហេង. ទូរស័ព្ទលេខៈ ០៩២ ៣២៤ ៦៦៨
▪ លោក ហោ សំអាត. ទូរស័ព្ទលេខៈ ០១២ ៦៨៦ ០៧៤
▪ កញ្ញា ភឿង គីមហួយ. ទូរស័ព្ទលេខៈ ០៩២ ២៦៦ ៤៥៤
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- សិទ្ធិដីធ្លី
