អាជ្ញាធរថ្នាក់ស្រុក និងថ្នាក់ខេត្តមិនអាចនៅលើច្បាប់នោះទេ
ចេញផ្សាយ ថ្ងៃទី៩ ខែកញ្ញា ឆ្នាំ២០១១; ក្រុមសង្គមស៊ីវិលម.ស.ម.ក លីកាដូ និង ម.អ.ច.ស សូមថ្កោលទោសចំពោះការព្យាយាមរបស់មន្ត្រីស្រុកសណ្តាន់ និងមន្ត្រីខេត្តកំពង់ធំ ដែលបានដាក់លក្ខខណ្ឌលើសកម្មភាពសិទ្ធិមនុស្សហួសកម្រិត និងដែលមិនមានចែងក្នុងច្បាប់។ លក្ខខណ្ឌទាំងនេះគឺគ្មានមូលដ្ឋានគតិយុត្ត ហើយការប៉ុនប៉ងណាមួយក្នុងការប្រើប្រាស់លក្ខខណ្ឌទាំងនោះ គឺជាការរំលោភបំពានយ៉ាងច្បាស់លាស់មកលើសិទ្ធិមនុស្សរបស់ប្រជាពលរដ្ឋខេត្តកំពង់ធំ ក៍ដូចជាប្រជាពលរដ្ឋដទៃទៀតដែលបានចូលរួមក្នុងសកម្មភាពដើម្បីលើកកម្ពស់ និងការពារសិទ្ធិមនុស្ស។
កាលពីរសៀល ថ្ងៃទី០៧ ខែកញ្ញា ឆ្នាំ២០១១ អ្នកតំណាងមកពី ម.ស.ម.ក លីកាដូ និង ម.អ.ច.ស និងតំណាងមក ពីឧត្តមស្នងការសហប្រជាជាតិដើម្បីសិទ្ធិមនុស្សនៅកម្ពុជា បានចូលរួមកិច្ចប្រជុំជាមួយមន្ត្រីស្រុកសណ្តាន់ក្នុងខេត្តកំពង់ធំ។ កិច្ចប្រជុំដែលត្រូវបានធ្វើឡើង បន្ទាប់ពីវគ្គបណ្តុះបណ្តាលមួយដែលគ្រោងនឹងរៀបចំឡើងដោយ ម.ស.ម.ក និង អង្គការការពារធនធានធម្មជាតិ (អ.ក.ធ.ធ) ត្រូវបានរារាំងដោយមន្ត្រីរដ្ឋាភិបាលអមដោយកម្លាំងនគរបាលប្រដាប់អាវុធ។
មូលហេតុលើកឡើងដោយមន្ត្រីស្រុក ក្នុងការរារាំងវគ្គបណ្តុះបណ្តាល គឺថាអ្នករៀបចំកម្មវិធីមិនបានជូនដំណឹងដល់អាជ្ញាធរថ្នាក់មូលដ្ឋានស្តីពីវគ្គបណ្តុះបណ្តាលនេះ ទោះជាការពិត ច្បាប់ស្តីពីការធ្វើបាតុកម្មដោយសន្តិវិធីបានលើកលែងដល់អ្នករៀបចំ “សកម្មភាពអប់រំផ្សព្វផ្សាយ” ដោយមិនចាំបាច់ត្រូវជូនដំណឹងអំពីសកម្មភាពទាំងនេះ ដែលរៀបចំឡើងនៅកន្លែងឯកជន ឬសាធារណៈតែទោះបីជាយ៉ាងណាក្តី អ្នករៀបចំក៍បានជូនដំណឹងទៅកាន់អាជ្ញាធរខេត្តជាលាយលក្ខណ៍អក្សរតាមការគួរសមផងដែរ។
ប៉ុន្តែការព្រួយបារម្ភដ៍ចម្បងជាងនេះ គឺលក្ខខណ្ឌដែលមន្ត្រីស្រុកបានកំណត់ក្នុងកិច្ចប្រជុំសម្រាប់សកម្មភាពលើកកម្ពស់ និងការការពារសិទ្ធិមនុស្សក្នុងខេត្តកំពង់ធំនាពេលអនាគត ដែលមានដូចជា អង្គការដែលគ្មានការិយាល័យក្នុងខេត្តកំពង់ធំមិនអាចរៀបចំសកម្មភាពណាមួយដោយគ្មានការអនុញ្ញាតពីអាជ្ញាធរនោះទេ។ ប្រសាសន៍របស់មន្ត្រីស្រុក បានឆ្លុះបញ្ចាងពីទស្សនៈរបស់អភិបាលរងខេត្តកំពង់ធំ អ៊ូច សំអន ក្នុងសារព័ត៌មានភ្នំពេញប៉ុស្តិ៍កាលពីថ្ងៃម្សិលមិញ។ ក្នុងអត្តបទនោះ លោកអភិបាលរងក៍បានបញ្ជាក់ផងដែរថា នឹងមិនអនុញ្ញាតឲ្យប្រជាពលរដ្ឋមកពីខេត្តដទៃចូលរួមក្នុងសកម្មភាពក្នុងខេត្តកំពង់ធំនោះទេ។
លក្ខខណ្ឌទាំងពីរនេះ រំលោភលើគោលការណ៍សិទ្ធិមនុស្ស ដែលធានាដោយរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់អន្តរជាតិ មានដូចជាមាត្រា ៣១ នៃរដ្ឋធម្មនុញ្ញ ជាដើម ហើយលិខិតបទដ្ឋានទាំងនោះ បង្កើតបានជាផ្នែកមួយនៃច្បាប់កម្ពុជា។ សិទ្ធិទាំងនេះរួមមានដូចជា សិទ្ធិសេរីភាពបញ្ចេញមតិ (មាត្រា ៤១ នៃរដ្ឋធម្មនុញ្ញ) សិទ្ធិសេរីភាពនៃការប្រជុំ(មាត្រា ៤២ នៃរដ្ឋធម្មនុញ្ញា) សិទ្ធិសេរីភាពក្នុងការដើរឆ្ងាយជិត (មាត្រា ៤០ នៃរដ្ឋធម្មនុញ្ញ) និង សិទ្ធិក្នុងការចូលរួមយ៉ាងសកម្មនៅក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់សង្គមជាតិ (មាត្រា ៣៥ នៃរដ្ឋធម្មនុញ្ញ)។
លោក អ៊ូ វីរៈ ដែលបានចូលរួមក្នុងការប្រជុំជាមួយនឹងអាជ្ញាធរស្រុកសណ្តាន់ផងដែរនោះ បានមានប្រសាសន៍ថា៖
“ យើងបានព្យាយាមធ្វើអ្វីៗគ្រប់យ៉ាងដែលច្បាប់បានតម្រូវឲ្យយើងគោរពតាម ក្នុងការរៀបចំវគ្គបណ្តុះបណ្តាលនេះ និងការងារផ្សេងទៀតៗ។ ដើម្បីជាសេចក្តីសមគួរ យើងបានសរសេរលិខិតជូនដល់អាជ្ញាធរខេត្តកាលពីខែមុន ដើម្បីជម្រាបជូនដល់អាជ្ញាធរ អំពីវគ្គបណ្តុះបណ្តាល ដែលនឹងត្រូវរៀបចំឡើងបើទោះណាជាច្បាប់ពុំបានតម្រូវឲ្យយើងធ្វើការជូនដំណឹងបែបនេះឡើយ ចំពោះការបើកវគ្គបណ្តុះបណ្តាលស្តីពីសិទ្ធិមនុស្ស។ អ្វីដែលជាអាជ្ញាធរស្រុក និងអាជ្ញាធរខេត្តកំពុងតែលើកឡើងនេះ គឺបង្ហាញយ៉ាងច្បាស់ថា ពួកគេគឺនៅពីលើច្បាប់ ហើយពួកគេអាចដាក់លក្ខខណ្ឌគ្រប់បែបយ៉ាងមកលើប្រជាពលរដ្ឋ និងអង្គការមិនមែនរដ្ឋាភិបាល។”
ដោយពិនិត្យទៅលើការវិវត្តន៍ថ្មីៗ ប្រឆាំងការរីកធំធាត់នៃស្ថានភាព របស់អង្គការមិនមែនរដ្ឋាភិបាលនៅកម្ពុជា នាយិកា អង្គការលីកាដូ លោកស្រី Naly Pilorge បានមានប្រសាសន៍ថា ៖
“នេះគឺជាការវិវត្តន៍ថ្មីទៀតនៃការគាបសង្គត់ជាបន្តបន្ទាប់មកលើសកម្មភាពរបស់អង្គការមិនមែនរដ្ឋាភិបាលនៅកម្ពុជា។ អ្វីដែលខ្ញុំបារម្ភបំផុតនោះ គឺថាសេចក្តីសម្រេចរបស់អាជ្ញាធរដែលរំលោភបំពានលើសិទ្ធិសេរីភាពរបស់ប្រជាពលរដ្ឋដោយបំពានបែបនេះ គឺឆ្លុះបញ្ចាំងឲ្យឃើញពីឆន្ទៈរបស់រដ្ឋាភិបាលក្នុងការជម្រុញឲ្យល្បឿននៃការអនុម័តច្បាប់ស្តីពី អង្គការ និងសមាគម បានលឿននិងគឺជាបង្ហាញពីបំណងរបស់រដ្ឋាភិបាលក្នុងការគាបសង្គត់លើសិទ្ធិសេរីភាពជាមូលដ្ឋាន។”
ឆ្លើយតបទៅនឹងការអត្ថាធិប្បាយរបស់អជ្ញាធរស្រុក និង អាជ្ញាធរខេត្ត លោក យ៉េង វីរៈ នាយកប្រតិបត្តិ ម.អ.ច.ស បានលើកឡើងថា ៖
“សហគមន៍ទាំងនេះ កំពុងតែស្វែងរកនូវដំណោះស្រាយចំពោះការរំលោភបំពានមកលើសិទ្ធិមនុស្សរបស់ពួកគេ។ ម.ស.ម.ក អប់រំប្រជាពលរដ្ឋក្នុងសហគមន៍ដើម្បីប្រើច្បាប់ជាមធ្យោបាយក្នុងការដោះស្រាយបញ្ហារបស់ពួកគេដោយសន្តិវិធី។ ប្រសិនបើអាជ្ញាធរមានបំណងចង់ឃើញបញ្ហាទាំងអស់ត្រូវបានដោះស្រាយ ពួកគេគួរតែផ្តល់កិច្ចសហការជាមួយ ម.ស.ម.ក និងអង្គការដទៃទៀតជាជាងរារាំងពួកគេអនុវត្តនូវសកម្មភាពស្របច្បាប់ដើម្បីជួយដល់សហគមន៍ទាំងនោះ។”
សម្រាប់ព័ត៌មានបន្ថែម សូមទាក់ទង៖
▪ លោក អ៊ូ វីរៈ ប្រធាន ម.ស.ម.ក តាមរយៈទូរស័ព្ទលេខ ០១២ ៤០ ៤០ ៥១
▪ លោកស្រី Naly Pilorge នាយិកា លីកាដូ តាមរយៈទូរស័ព្ទលេខ ០១២ ៨០ ៣៦ ៥០
▪ លោក យ៉េង វីរៈ នាយកប្រតិបត្តិ ម.អ.ច.ស តាមរយៈទូរស័ព្ទ ០១២ ៨០ ១២ ៣៥
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម