កុមារភាពនៅក្នុងពន្ធនាគារ៖ ការចម្រើនវ័យនៅក្នុងពន្ធនាគារកម្ពុជា៖ រឿងរ៉ាវរបស់ សុខ គុន
ចេញផ្សាយ ថ្ងៃទី១៥ ខែតុលា ឆ្នាំ២០១៣
នៅប្រទេសកម្ពុជាបច្ចុប្បន្នមានក្មេងៗចំនួន ៣៨ ដែលកំពុងរស់នៅក្នុងពន្ធនាគារជាមួយម្ដាយ របស់អ្នកទាំងនោះ ត្រូវបានឃ្លាំមើលដោយអង្គការ លីកាដូ។ កុមារទាំងនេះមិនមែនជាអ្នកទោសនោះទេ ប៉ុន្តែអ្នកទាំងនោះជារឿយៗត្រូវបានចាត់ទុកដូចអ្នកទោសដូច្នោះដែរ។
របាយការណ៍ចុងក្រោយរបស់អង្គការ លីកាដូ អំពី៖ “កុមារភាពនៅក្នុងពន្ធនាគារ៖ ការចំរើនវ័យនៅក្នុងពន្ធនាគារកម្ពុជា៖ រឿងរ៉ាវរបស់សុខគន្ធ” បានរៀបរាប់លំអិតអំពីបទពិសោធន៍នៃកុមារម្នាក់ពីក្នុងកុមារទាំងឡាយដែលរស់នៅក្នុងពន្ធនាគារ គឺ “សុខគន្ធ” (មិនមែនជាឈ្មោះពិត) ដែលធ្លាប់បានរស់ ជាមួយម្តាយនៅក្នុងមណ្ឌលអប់រំកែប្រែទី២ (ម២) រហូតដល់សុខគន្ធមានអាយុ ៦ឆ្នាំ ១០ ខែ។
នេះជាករណីសិក្សាលើកដំបូងក្នុងករណីសិក្សាមួយឈុត ដែលអង្គការលីកាដូបានចេញផ្សាយ ដោយធ្វើការវាយតម្លៃទៅលើផលប៉ះពាល់ទៅលើកុមារ ដែលកំពុងចំរើនវ័យនៅក្នុងពន្ធនាគារកម្ពុជា។ ករណីសិក្សាមួយឈុតនេះ មានគោលដៅផ្ដល់ការយល់កាន់តែលំអិតខ្លាំង អំពីផលវិបាកខាងផ្លូវកាយ និងផ្លូវចិត្តសំរាប់កុមារ ដែលបានរស់នៅក្នុងពន្ធនាគារជាមួយម្ដាយរបស់ទាំងនោះ។
កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការ លីកាដូ បានមានប្រសាសន៍ថា៖ “ធាតុពិតនៃពន្ធនាគារនៅប្រទេសកម្ពុជា គឺមានលក្ខណៈធ្ងន់ធ្ងរសំរាប់ បុគ្គលគ្រប់រូប ប៉ុន្តែលក្ខណៈធ្ងន់ធ្ងរនេះ អាចបង្កភាពទ្រុឌទ្រោមយ៉ាងខ្លាំងដល់កុមារផងដែរ”។ កញ្ញា បានបន្ថែមទៀតថា៖ “កុមាររស់នៅក្នុងពន្ធនាគារនៅប្រទេសកម្ពុជា ជារឿយៗត្រូវបានសង្គមបំភ្លេចចោល។ កាន់តែធ្ងន់ធ្ងរជាងមុន កុមារជារឿយៗក៏មិនត្រូវបានយកចិត្តទុកដាក់ដោយអាជ្ញាធរ ដែលទទួលខុសត្រូវចំពោះអ្នកទាំងនោះដែរ”។
របាយការណ៍ រកឃើញថា ថ្វីត្បិតតែមានគុណប្រយោជន៍យ៉ាងច្បាស់មួយចំនួននៅពេលដែលកុមាររស់នៅជាមួយម្តាយរបស់អ្នកទាំងនោះ ប៉ុន្តែប្រព័ន្ធពន្ធនាគារនៅប្រទេសកម្ពុជា គ្មានសមត្ថភាពក្នុងការផ្ដល់ដល់កុមារ នូវសេចក្ដីត្រូវការជាមូលដ្ឋានបំផុត រាប់ទាំងការអប់រំ ជីវិត គ្រួសារ អាហារូបត្ថម្ភសមរម្យ និងការថែទាំខាងវេជ្ជសាស្រ្ត។ កុមារដែលនៅឯកកោពីប្រភពខាងក្រៅ និងទទួលអាហារូបត្ថម្ភមិនគ្រប់គ្រាន់ ជានិច្ចកាលប្រឈមនឹងបញ្ហាធ្ងន់ធ្ងរក្នុងការចំរើនលូតលាស់ ហើយប្រឈមនឹងពេលវេលាដ៏លំបាក ដើម្បីសម្របខ្លួនទៅក្នុងសង្គម នៅពេលពួកគេ ចាកចេញពីពន្ធនាគារ។
ទាំងអង្គការលីកាដូ បានធ្វើការវាយតម្លៃទៅលើផលប៉ះពាល់ពីបទពិសោធន៍ពន្ធនាគារទាំងនេះទៅលើ សុខ គុន ជាមួយនឹងអង្គការមិនមែនរដ្ឋាភិបាល Chibodia ដែលធ្លាប់បានមើលថែរក្សាសុខ គុន ចាប់តាំងពីសុខ គុន បានចាកចេញពីពន្ធនាគារកាលពីខែមករា ឆ្នាំ២០១២។
នៅក្នុងពន្ធនាគារ សុខ គុន ជាញឹកញាប់ត្រូវបានគេចាក់សោរទុកក្នុងបន្ទប់ឃុំខ្លួន ដែល មានភាពចង្អៀតណែន និងក្ដៅមិនឲ្យចេញជាច្រើនម៉ោងរៀងរាល់ថ្ងៃ។ គេបានរស់នៅក្នុងបរិយា កាសតឹងតែង និងប្រកបដោយហិង្សាដែលជាទីកន្លែងមានការវាយតប់គ្នា ការជេរប្រមាថគ្នា និងការលែងល្បែងបានកើតឡើងជាធម្មតា។ របាយការណ៍នេះ ធ្វើការពិនិត្យទៅលើផលប៉ះពាល់នៃបទពិសោធន៍ទាំងនេះទៅលើសុខ គុន ដែលទទួលរងសុបិនអាក្រក់ និងស្រមោលអតីតកាល លួចអាហារ និងវត្ថុកំប៉ិកកំប៉ុកដ៏ទៃទៀត ព្រមទាំងបង្ហាញឲ្យឃើញនូវអាការៈតក់ស្លុត និងការភ័យ ខ្លាចខុសប្រក្រតីពីការរងរបួសរាងកាយ។
អ្នកនាង ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “រឿងរ៉ាវរបស់សុខ គុន បង្ហាញអំពីសារសំខាន់ក្នុងការការពារកុមារដែលត្រូវបានដាក់នៅក្នុងពន្ធនាគារជាមួយម្តាយរបស់អ្នកទាំងនោះ”។ អ្នកនាង បានបន្តទៀតថា៖ “ហើយរឿងនេះ ក៏បានបង្ហាញឲ្យឃើញនូវអ្វីដែលអាចកើតមានឡើងនៅពេលដែលខ្វះនូវវិធានការសមស្របមួយចំនួន”។
ដោយសារកង្វះខាតជាទូទៅនៃការសិក្សាស្រាវជ្រាវទៅលើប្រធានបទនេះនៅក្នុងប្រទេសកម្ពុជា អង្គការ លីកាដូ សង្ឃឹមថាអាជ្ញាធរ និងអង្គការដៃគូមួយចំនួន នឹងអនុវត្តបន្តនូវគំនិតផ្តួចផ្តើមនេះ ដោយដាក់ចេញនូវវិធានការណ៍មួយចំនួន ក្នុងការយល់ដឹង និងលើកកំពស់សិទិ្ធកុមារនៅក្នុងពន្ធនាគារ រំលឹកឡើងវិញនូវដំណើរការចំនួនក្នុងការសម្រេចចិត្ត ដែលបណ្តាលឲ្យកុមារទាំងនោះទៅរស់នៅក្នុងពន្ធនាគារជាមួយម្តាយរបស់អ្នកទាំងនោះ ហើយនិងវាយតម្លៃទៅលើផលប៉ះពាល់នៃការឃុំឃាំងទៅលើកុមារ។
របាយការណ៍ថ្មីនេះ ដែលមានចំនងជើងថា៖ “កុមារភាពនៅក្នុងពន្ធនាគារ៖ ការចំរើនវ័យនៅក្នុងពន្ធនាគារកម្ពុជា៖ រឿងរ៉ាវរបស់ សុខ គុន” អាចស្វែងរកបានដោយចូលទៅកាន់គេហទំព័ររបស់អង្គការ លីកាដូ តាមរយៈ៖ www.licadho-cambodia.org។
សម្រាប់របាយការណ៍ពីមុនៗ របស់អង្គការ លីកាដូ ទៅលើបញ្ហាការឃុំឃាំងកុមារជាមួយម្តាយនៅក្នុងពន្ធនាគារ សូមចូលទៅក្នុង៖
• គម្រោងផ្តល់ជំនួយដល់កុមាររស់នៅជាមួយម្តាយក្នុងពន្ធនាគារ៖ ការពិនិត្យឡើងវិញនូវស្ថានភាពរស់នៅរបស់ម្តាយ ស្ត្រីមានផ្ទៃពោះ និងកុមារតូចៗ ដែលរស់នៅក្នុងពន្ធនាគារមួយចំនួននៅកម្ពុជា, ខែកក្កដា ឆ្នាំ២០១០
http://www.licadho-cambodia.org/reports.php?perm=141&khmer
• អ្នកគ្មានទោសក្នុងពន្ធនាគារ៖ របាយការណ៍អង្គការលីកាដូ ស្តីពីសិទិ្ធរបស់កុមារដែលចំរើនវ័យក្នុងពន្ធនាគារ, ខែមិថុនា ឆ្នាំ២០០២
http://www.licadho-cambodia.org/reports.php?perm=34&khmer
សម្រាប់ព័ត៌មានបន្ថែម សូមទាក់ទង៖
▪ កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការ លីកាដូ (ភាសាខ្មែរ), ទូរស័ព្ទលេខ៖ ០១៦ ៧៩៧ ៣០៥
▪ អ្នកនាង ណាលី ពីឡូក នាយិកា អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ (ភាសាបារាំង និងអង់គ្លេស), ទូរស័ព្ទលេខ៖ ០១២ ៨០៣ ៦៥០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- បញ្ហាពន្ធនាគារ សិទ្ធិស្ត្រី
