អង្គការលីកាដូ ប្រារព្ធទិវាសិទ្ធិមនុស្សអន្តរជាតិនៅក្នុងពន្ធនាគារកម្ពុជា
ចេញផ្សាយ ថ្ងៃទី៨ ខែធ្នូ ឆ្នាំ២០១៣
នៅពេលដែលប្រជាពលរដ្ឋជាច្រើនពាន់នាក់ប្រមូលផ្តុំគ្នាទូទាំងប្រទេស ដើម្បីប្រារព្ធនូវទិវាសិទ្ធិមនុស្សអន្តរជាតិ អង្គការលីកាដូ ក៏នឹងប្រារព្ធទិវាសិទិ្ធមនុស្សនេះ ជាមួយនឹងអ្នកជាប់ពន្ធនាគារ ពីបណ្តាពន្ធនាគារទំាង១៨កន្លែង ទូទាំងប្រទេសកម្ពុជាផងដែរ។
កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគាររបស់អង្គការលីកាដូ បានមានប្រសាសន៍ថា៖ “ជនគ្រប់រូប រួមទាំងអ្នកទោសពន្ធនាគារក្តី គួរតែមានឱកាសក្នុងការចូលរួមក្នុងការប្រារព្ធទិវាសិទ្ធិមនុស្សនេះ”។ កញ្ញាបានបន្តទៀតថា៖ “ទោះបីជាសិទ្ធសេរីភាពរបស់ពួកគេត្រូវបានដកហូតយ៉ាងណាក៏ដោយ ក៏ប៉ុន្តែសិទ្ធិជាមូលដ្ឋានរបស់ពួកគេពុំគួរត្រូវបានដកហូតនោះទេ ដូចជាសិទ្ធិក្នុងការចូលរួមក្នុងព្រឹត្តិការណ៍វប្បធម៌សង្គមនេះឯង”។
អង្គការលីកាដូ នឹងរៀបចំនូវអាហារកញ្ចប់ដូចជា ភេសជ្ជៈសម្រាប់បំប៉នរាងកាយ និងអាហារសម្រន់មួយចំនួនដើម្បីផ្តល់ជូនទៅកាន់អ្នកជាប់ពន្ធនាគារជាង១៣,០០០នាក់ ពីបណ្តាពន្ធនាគារទាំង១៨កន្លែង ក្នុងប្រទេសកម្ពុជា។ អង្គការលីកាដូ នឹងផ្តល់ជូននូវកញ្ចប់សម្ភារៈចាំបាច់បន្ថែមមួយចំនួនច្រើនទៀត ជូនទៅដល់អ្នកជាប់ពន្ធនាគារបួននាក់ដែលអង្គការលីកាដូ យល់ឃើញថាអ្នកទាំងនោះ គឺជាអ្នកការពារសិទ្ធិមនុស្ស។ អង្គការលីកាដូ នឹងរៀបចំនូវល្បែងកំសាន្តសម្រាប់អ្នកជាប់ពន្ធនាគារទាំង ១៨កន្លែង ដូចជា តន្ត្រី និងការរាំលេងកំសាន្តតាមបែបប្រពៃណី។
ចាប់តាំងពីឆ្នាំ២០០៩ មកអង្គការលីកាដូ បានរៀបចំនូវសកម្មភាពក្នុងការប្រារព្ធទិវាសិទ្ធិមនុស្សនៅតាមពន្ធនាគារជារៀងរាល់ឆ្នាំ ដោយមានការចែកជូននូវកញ្ចប់សម្ភារៈចាំបាច់ និងការជូនក្រុមគ្រួសារ និងអង្គការដៃគូ ឲ្យបានជួបជាមួយនឹងអ្នកការពារសិទ្ធិមនុស្សដែលជាប់ក្នុងពន្ធនាគារ។ កាលពីពេលបីឆ្នាំមុន អង្គការលីកាដូ បានពង្រីកកម្មវិធីរបស់ខ្លួន រួមទាំងចែកជូននូវអាហារ សម្ភារៈប្រើប្រាស់ និងការរៀបចំនូវល្បែងកំសាន្តសម្រាប់អ្នកជាប់ពន្ធនាគារគ្រប់រូប ពីបណ្តាពន្ធនាគារទាំង១៨កន្លែង ដែលអង្គការលីកាដូ យើងបានធ្វើការជាមួយ។
លោក ស សុង ជាអ្នកការពារសិទ្ធិមនុស្សមួយរូប ដែលបានទទួលការដោះលែងចេញពីមណ្ឌលអប់រំកែប្រែទី៣ នៃពន្ធនាគារខេត្តកំពង់ចាម កាលពីថ្ងៃទី២៨ ខែវិចិ្ឆកា ឆ្នាំ២០១៣ បាននិយាយទៅកាន់អង្គការលីកាដូ អំពីសារៈសំខាន់នៃព្រឹត្តការណ៍នេះចំពោះខ្លួនគាត់ថា៖ “ខ្ញុំមានការសប្បាយរីករាយយ៉ាងខ្លាំង ដែលអង្គការលីកាដូ មិនបានបំភ្លេចរូបខ្ញុំ និងអ្នកទោសមួយចំនួនផ្សេងទៀត .....ចំពោះរូបខ្ញុំផ្ទាល់ នេះជាព្រឹត្តិការណ៍ដ៏អស្ចារ្យមួយដែលខ្ញុំនៅតែអាចប្រារព្ធទិវាសិទ្ធិមនុស្សបាន ទោះបីជាខ្ញុំសិ្ថតនៅក្នុងពន្ធនាគារក៏ដោយ”
នៅពេលដែលចំនួនអ្នកទោសមានការថយចុះបន្តិចក្នុងប្រទេសកម្ពុជា នៅឆ្នាំមុន ភាពណែនចង្អៀតក្នុងពន្ធនាគារ ភាពគ្មានអនាម័យ នៅតែមិនមានភាពប្រែប្រួល ហើយអំពើពុករលួយបានរីករាលដាល។ សម្រាប់អ្នកជាប់ពន្ធនាគារមួយចំនួនធំ ស្ថានភាពហិរញ្ញវត្ថុកំណត់លក្ខខណ្ឌនៃការឃុំខ្លួន ការព្យាបាល និងការទទួលបានតំរូវការជាមួលដ្ឋានមួយចំនួនដូចជា អាហារ ទឹក ពន្លឺថ្ងៃ និងខ្យល់អាកាស។
ប្រសិនបើអ្នកដែលពុំមានថវិកា ឬមានថវិកាតិចតួច នោះអ្នកទាំងនោះ ពិតជាមិនអាចទទួលបាននូវសិទិ្ធជាមូលដ្ឋាន ហើយអ្នកទាំងនោះនឹងងាយទទួលរងគ្រោះពីការរំលោភបំពានទៀតផង។ អ្នកដែលជាប់ឃុំបណ្តោះអាសន្នរង់ចាំសវនាការ (អ្នកដែលមិនទាន់បានចូលសវនាការជំនុំជម្រះ និងផ្តន្ទាទោសពីបទល្មើសណាមួយ) ជាញឹកញាប់ត្រូវបានឃុំខ្លួនក្នុងលក្ខខណ្ឌលំបាកជាងអ្នកដែលត្រូវបានផ្តន្ទាទោស។
ការឃុំខ្លួនបណ្តោះអាសន្នរង់ចាំសវនាការ គួរតែត្រូវបានប្រើប្រាស់ជាជម្រើសចុងក្រោយ ប៉ុន្តែក្នុងប្រទេសកម្ពុជាវិញ ជម្រើសផ្សេងពីការឃុំខ្លួនបណ្តោះអាសន្នរង់ចាំសវនាការ ទោះបីជាក្នុងករណីបទលើ្មសតូចតាចក៏ដោយក្តី គឺកម្រនឹងយកមកប្រើប្រាស់ណាស់។ ជាពិសេស នេះគឺជាការព្រួយបារម្ភមួយពាក់ព័ន្ធនឹងករណីស្រី្តដែលមានផ្ទៃពោះ និងអនីតិជន។ យោងតាមស្ថិតិថ្មីបំផុតរបស់អង្គការលីកាដូ ពីបណ្តាពន្ធនាគារទាំង១៨កន្លែង បានបង្ហាញថា មានច្រើនជាង ៥០%នៃអ្នកទោសដែលជាអនីតិជន ត្រូវបានឃុំខ្លួនបណ្តោះអាសន្នរង់ចាំសវនាការ ក្នុងចំនោមស្រ្តីដែលមានផ្ទៃពោះ ចំនួន១៣ករណី មាន១២ករណី ពុំទាន់ត្រូវបានផ្តន្ទាទោស។
អ្នកនាង ណាលី ពីឡូក នាយិកានៃអង្គការសិទ្ធិមនុស្សលីកាដូ បានមានប្រសាសន៍ថា៖ “ការដោះលែងឲ្យនៅក្រៅឃុំគួរតែជានីតិវិធីទូទៅ មិនមែនជាករណីលើកលែងនោះទេ”។ អ្នកនាងបានបន្តទៀតថា៖ “ប្រសិនបើអាជ្ញាធរកម្ពុជាមានការយកចិត្តទុកដាក់ក្នុងការដោះស្រាយ អំពីការណែនចង្អៀតក្នុងពន្ធនាគារ និងការការពារក្រុមអ្នកជាប់ពន្ធនាគារដែលងាយរងគ្រោះ នោះអាជ្ញាធរត្រូវតែផ្តល់អាទិភាពចំពោះ វិធានការដែលគ្មានការឃុំខ្លួនបណ្តោះអាសន្នរង់ចាំសវនាការ”។
អង្គការលីកាដូ បានធ្វើការពាក់ព័ន្ធនឹងពន្ធនាគារកម្ពុជាអស់រយៈពេល២០ឆ្នាំមកហើយ ដើម្បីលើកស្ទួយ និងការពារសិទ្ធិរបស់អ្នកជាប់ពន្ធនាគារ។ ចាប់តាំងពីឆ្នាំ១៩៩៣ មក អង្គការលីកាដូ បានធ្វើការឃ្លាំមើលស្ថានភាពក្នុងពន្ធនាគារ តាមរយៈការប្រមួល និងវិភាគទន្និន័យ ហើយនិងធ្វើការទាក់ទាញមតិគាំទ្រ ក្នុងនាមអ្នកជាប់ពន្ធនាគារ។ អង្គការលីកាដូ ក៏បានផ្តល់នូវសេវាកម្ម និងការតំណាងផ្នែកច្បាប់ ឪសថសម្រាប់ការព្យាបាល និង អនាម័យ និងតម្រូវការមូលដ្ឋានផ្សេងទៀតទៅឲ្យអ្នកជាប់ពន្ធនាគារ និងករណីមួយចំនួនទៀតផ្តល់ជូនក្រុមគ្រួសាររបស់អ្នកទាំងនោះ។
សម្រាប់ព័ត៌មានបន្ថែម សូមទាក់ទង៖
▪ អ្នកនាង ណាលី ពីឡូក នាយិកាអង្គការសិទិ្ធមនុស្ស លីកាដូ (ជាភាសាបារាំង និងអង់គ្លេស) ទូរស័ព្ទលេខ៖ ០១២ ៨០៣ ៦៥០
▪ កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការលីកាដូ (ជាភាសាខ្មែរ) ទូរស័ព្ទលេខ៖ ០១៦ ៧៩៧ ៣០៥
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- បញ្ហាពន្ធនាគារ សិទ្ធិស្ត្រី
