ក្នុងទិវាសិទិ្ធកុមារអន្តរជាតិ អង្គការ លីកាដូ អំពាវនាវឲ្យមានការធ្វើឲ្យកាន់តែប្រសើឡើងនូវការការពារកុមារនៅក្នុងពន្ធនាគារ
ចេញផ្សាយ ថ្ងៃទី៣០ ខែឧសភា ឆ្នាំ២០១៤អង្គការ លីកាដូ នឹងប្រារព្ធទិវាសិទិ្ធកុមារអន្តរជាតិ ឆ្នាំ២០១៤ ដោយធ្វើការចែកនូវអាហារ និងសម្ភារៈដល់អ្នកជាប់ពន្ធនាគារជាកុមារ និងកុមារតូចៗ ដែលរស់នៅជាមួយម្តាយក្នុងពន្ធនាគារ ហើយនិងម្តាយដែលមានផ្ទៃពោះ នៅក្នុងពន្ធនាគារចំនួន ៧ កន្លែង ក្នុងប្រទេសកម្ពុជា ។ ទិវាសិទិ្ធកុមារអន្តរជាតិ គឺត្រូវបានប្រារព្ធឡើងនៅថ្ងៃទី១ ខែមិថុនា។
នៅចុងខែមេសា ឆ្នាំ២០១៤ អ្នកជាប់ពន្ធនាគារជាកុមារ មានចំនួន ២៨០ នាក់ នៅក្នុងពន្ធនាគារចំនួន ១៨ កន្លែង ដែលត្រូវបានតាមដានមើលដោយអង្គការ លីកាដូ គឺធ្លាក់ចុះច្រើនជាង ៥០ ភាគរយ នៅក្នុងពន្ធនាគារអនីតិជន ចាប់តាំងពីឆ្នាំ២០១១។ លើសពីនេះ មានស្ត្រីមានផ្ទៃពោះជាប់ពន្ធនាគារចំនួន ៤០នាក់ និងកុមារ ដែលកំពុងរស់នៅជាមួយម្តាយក្នុងពន្ធនាគារ ចំនួន ៤០នាក់។
អង្គការ លីកាដូ នឹងធ្វើការចែកនូវកញ្ចប់ ដែលមានផ្លែឈើ ភេសជ្ជៈ ដែលមានសារជាតិចិញ្ចឹម សម្ភារៈសំអាតខ្លួន និងតុក្តតាសម្រាប់កុមារតូចៗ។ កញ្ចប់ចំនួន ៥១៣ កញ្ចប់ នឹងត្រូវធ្វើការចែកចាយ ដោយបែងចែក ២៦១កញ្ចប់ ទៅដល់អ្នកជាប់ពន្ធនាគារជាកុមារ ៨កញ្ចប់ដល់អ្នកជាប់ពន្ធនាគារជាស្ត្រីមានផ្ទៃពោះ ២០កញ្ចប់ដល់កុមារដែលកំពុងរស់នៅជាមួយម្តាយរបស់អ្នកទាំងនោះក្នុងពន្ធនាគារ ហើយនិង ២២៤កញ្ចប់ដល់កុមាររបស់មន្ត្រីពន្ធនាគារ។
អង្គការ លីកាដូ ក៏នឹងរៀបចំនូវកម្មវិធីពិសេសនៅពន្ធនាគារចំនួន ៧ កន្លែង។ កម្មវិធីនេះ រួមមានការលេងល្បែង រាំ ច្រៀង ក៏ដូចជាមានវាគ្មិនមួយចំនួនដែលនឹងមកនិយាយអំពីបញ្ហាដែលប៉ះពាល់ដល់កុមារ។
បញ្ហាជាច្រើន គឺនៅតែមានមកលើអ្នកជាប់ពន្ធនាគារជាកុមារ និងស្ត្រីមានផ្ទៃពោះ ហើយនិងកុមារដែលកំពុងរស់នៅជាមួយម្តាយ ដែលជាអ្នកជាប់ពន្ធនាគារនៅក្នុងប្រទេសកម្ពុជា។ នៅក្នុងឱកាសនៃ ទិវាកុមារអន្តរជាតិ អង្គការ លីកាដូ សូមអំពាវនាវដល់អាជ្ញាធរទាំងឡាយ សូមលោកមេត្តាដោះស្រាយនូវបញ្ហាមួយចំនួននៃបញ្ហាទាំងនេះឲ្យបានឆាប់រហ័ស។
ការសម្រេចចិត្តអនុញ្ញាតឲ្យកុមារស្នាក់នៅជាមួយម្តាយរបស់អ្នកទាំងនោះ នៅក្នុងពន្ធនាគារ គួរតែពឹងផ្អែកទៅលើការវាយតម្លៃជាបុគ្គលទាំងស្រុង មុននឹងកុមារចូលមកក្នុងពន្ធនាគារ ឬក៏ភ្លាមៗបន្ទាប់ពីអ្នកទាំងនោះចាប់កំណើត។ ការសម្រេចចិត្តនេះ ត្រូវតែគិតពីផលប្រយោជន៍របស់កុមារ (ដែលជាការណែនាំដ៏សំខាន់បំផុតមិនអាចខ្វះបាន) និងគួរតែពិចារណាអំពីសិទិ្ធរបស់កុមារក្នុងការអភិវឌ្ឍន៍ខ្លួន ក៏ដូចជាផលប្រយោជន៍អំពីការបន្តនូវទំនាក់ទំនងរវាងម្តាយ និងកូន។
ក៏ប៉ុន្តែ ប្រភេទនៃការវាយតម្លៃលំអិតទាំងនេះ មិនដែលត្រូវបានធ្វើឡើងនៅក្នុងប្រទេសកម្ពុជានោះទេ ហើយជម្រើសផ្សេងទៀតពីជីវិតនៅក្នុងពន្ធនាគារសម្រាប់កុមារ ក៏កម្រនឹងត្រូវបានពិចារណាដែរ។
អង្គការ លីកាដូ សូមអំពាវនាវដល់អាជ្ញាធរដែលពាក់ព័ន្ធនានា រួមមានអគ្គនាយកដ្ឋានពន្ធនាគារ (GDP) រួមជាមួយនឹងក្រសួងសង្គមកិច្ច អតីតយុទ្ធជន និងយុវនីតិសម្បទា (MoSAVY) សូមមេត្តាអនុវត្តនូវប្រព័ន្ធនៃការវាយតម្លៃទាំងនេះដោយមិនពន្យាពេល។
ណាលី ពីឡូក នាយិកា អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “នេះគឺច្បាស់អស់រយៈពេលយូរមកហើយ ដែលប្រព័ន្ធពន្ធនាគារកម្ពុជា មិនអាចផ្តល់នូវតម្រូវការជាមូលដ្ឋានបំផុតដល់កុមារ ហើយនៅក្នុងករណីខ្លះ ដែលមិនមានជម្រើសល្អជាងនោះ យើងខ្ញុំមានការព្រួយបារម្ភខ្លាចថាកុមារមួយចំនួន កំពុងត្រូវបានដាក់នូវក្នុងស្ថានភាពនៃពន្ធនាគារយ៉ាងយ៉ាប់យ៉ឺនដោយមិនចាំបាច់ ជាកន្លែងដែលអ្នកទាំងនោះមិនឱកាសតិចតួចក្នុងការទទួលការការពារ និងអន្តរាគមន៍”។
អង្គការ លីកាដូ កត់សម្គាល់ឃើញថា ច្បាប់ថ្មីស្តីពីកុមារទំនាស់នឹងច្បាប់ ទើបតែបានអនុម័តថ្មីៗ បន្ទាប់ពីត្រូវបានពង្រាងអស់រយៈពេល ១០ឆ្នាំ។ នៅខណៈមានការស្វាគមន៍នូវច្បាប់ថ្មីនេះ អង្គការ លីកាដូ មានការខកចិត្ត ដែលច្បាប់នេះមិនបានលើកឡើងឲ្យបានត្រឹមត្រូវ ឬគ្រប់គ្រាន់នូវបញ្ហាជាក់លាក់មួយចំនួន ដែលកុមារីបានប្រឈមមុខនៅក្នុងការឃុំខ្លួន ដូចជាតម្រូវការសុខភាពផ្លូវកាយ និងផ្លូវចិត្តជាក់លាក់របស់អ្នកទាំងនោះ។
នៅខណៈមានការលើកកំពស់វិធីនៃការផ្តន្ទាទោសផ្សេងទៀត និងវិធានការកំសាន្តបន្លប់អារម្មណ៍សម្រាប់កុមារ ច្បាប់ថ្មីក៏បានបង្កើតមាត្រាមួយចំនួនសម្រាប់ឃុំខ្លួនអនីតិជនទាំងនៅក្នុងពន្ធនាគារ និងនៅស្នងការនគរបាល។ សាក្ខីកម្មដែលទទួលបានដោយអង្គការ លីកាដូ បង្ហាញនូវការទាមទារឲ្យមានការ អនុវត្តនូវមាត្រាទាំងនោះ ឲ្យបានឆាប់រហ័សដោយមិនពន្យាពេល។ បច្ចុប្បន្ននេះ កុមារដែលត្រូវបានឃុំខ្លួន
ទទួលរងការរំលោភបំពាន ដូចជាមនុស្សជំទង់ផងដែរ ហើយប្រហែលជាត្រូវបានទទួលការមើលការខុសត្រូវទៅតាមស្ថានភាពហិរញ្ញវត្ថុរបស់អ្នកទាំងនោះ ជាជាងអាយុរបស់អ្នកទាំងនោះ។
កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារ នៃអង្គការសិទិ្ធមនុស្ស លីកាដូ បានមានប្រសាសន៍ថា៖ “នៅក្នុងទិដ្ឋភាពជាច្រើន នៃជិវិតក្នុងពន្ធនាគារ កុមារជាទូទៅត្រូវបានទទួលរងការប្រមាថមើលងាយ និងបន្ទាបបន្ថោក ដូចជាអ្នកជាប់ពន្ធនាគារជាមនុស្សជំទង់ផងដែរ”។ កញ្ញា បានបន្តទៀតថា៖ “អ្នកជាប់ពន្ធនាគារជាកុមារ ជាទូទៅតែងតែមកពីគ្រួសារក្រីក្រ ហើយនេះមានន័យថា (នៅក្នុងប្រព័ន្ធពន្ធនាគារដែលមានបញ្ហាហិរញ្ញវត្ថុ) ក្រុមអ្នកដែលងាយរងគ្រោះទាំងនោះ នឹងមានគ្រោះថ្នាក់បន្ថែមពីការកេងប្រវ័ញ្ច និងនៅក្រោមបង្គាប់អ្នកដទៃ”។
នៅខណៈដែលមានការព្យាយាមជាច្រើននៅក្នុងពន្ធនាគារជាច្រើន ដើម្បីបែងចែកទាំងស្រុងនូវការរស់នៅរវាងមនុស្សពេញវ័យ និងកុមារ នៅមានពន្ធនាគារមួយចំនួនមិនទាន់មានការបែងចែកនេះទេ។ កន្លែងទំនេរដែលមានកម្រិត និងអត្រាខ្ពស់នៃចំនួនអ្នកជាប់ពន្ធនាគារ ធ្វើឲ្យអនីតិជនដែលត្រូវបានឃុំខ្លួន បណ្តោះអាសន្ន កម្រនឹងត្រូវបានបែងចែកដាច់ពីទណ្ឌិត ហើយក៏មិនមានការបែងចែកអនីតិជនទៅតាមប្រភេទនៃបទល្មើស ឬបទល្មើសដែលត្រូវបានចោទប្រកាន់នោះទេ។
ក្នុងស្ថានភាពជាអ្នកជាប់ពន្ធនាគារ អនីតិជន មានតម្រូវការពិសេសទៅលើការអភិវឌ្ឍន៍ផ្នែករូបរាងកាយ ផ្លូវចិត្ត និងសង្គម ប៉ុន្តែជាការសោកស្តាយ តម្រូវការទាំងនេះមិនត្រូវបានបំពេញនៅក្នុងពន្ធនាគារកម្ពុជានោះទេ។ សូម្បីតែឱកាសនៃការអប់រំ និងវគ្គបណ្តុះបណ្តាល កត្តាចំបងនៅក្នុងការស្តាសម្បទាឲ្យបានជោគជ័យ និងកាត់បន្ថយអត្រានៃការប្រព្រឹត្តបទល្មើសម្តងទៀត គឺមិនត្រូវបានផ្តល់ដល់អ្នកជាប់ពន្ធនាគារវ័យក្មេងនោះទេ។ អង្គការ លីកាដូ នៅតែបន្តទទួលរបាយការណ៍ថាកម្មវិធីមួយចំនួននៃកម្មវិធីទាំងនេះ គឺត្រូវបានផ្តល់ឲ្យតែអ្នកដែលអាចបង់ថ្លៃតែប៉ុណ្ណោះ។
សម្រាប់ព័ត៌មានបន្ថែម សូមទាក់ទង៖
▪ ណាលី ពីឡូក នាយិកា អង្គការសម័្ពន្ធខ្មែរជំរឿន និងការពារសិទិ្ធមនុស្ស លីកាដូ,ទូរស័ព្ទលេខ៖ ០១២ ៨០៣ ៦៥០
▪ កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគារនៃអង្គការសិទិ្ធមនុស្ស លីកាដូ,ទូរស័ព្ទលេខ៖ ០១៦ ៧៦៧ ៣០៥
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- បញ្ហាពន្ធនាគារ សិទ្ធិស្ត្រី