អង្គការ លីកាដូ ថ្កោលទោសការកាត់ទោស និងផ្តន្ទាទោសមន្ត្រី និងអ្នកគាំទ្រគណបក្សសង្គ្រោះជាតិ ទាំង ១១នាក់
ចេញផ្សាយ ថ្ងៃទី២១ ខែកក្កដា ឆ្នាំ២០១៥នារសៀលនេះ មន្ត្រី និងអ្នកគាំទ្រគណបក្សសង្គ្រោះជាតិចំនួន ១១នាក់ ត្រូវបានកាត់ទោសពីបទល្មើសពាក់ព័ន្ធនឹងការធ្វើកុបកម្ម និងផ្តន្ទាទោសដាក់ពន្ធនាគារ ៧ឆ្នាំ និង ២០ឆ្នាំ។ អ្នកទាំងនោះ ត្រូវបានបញ្ជូនទៅកាន់ពន្ធនាគារម១ ភ្លាមៗបន្ទាប់ពីផ្តន្ទាទោសរួច។
មានតែមេធាវីម្នាក់ប៉ុណ្ណោះក្នុងចំណោមមេធាវីទាំង ៩នាក់ ដែលការពារជនជាប់ចោទ មានវត្តមាននៅក្នុងសវនាការនាថ្ងៃនេះ បន្ទាប់ពីមេធាវី ៨នាក់ផ្សេងទៀត បានពហិការដោយមិនចូលរួមក្នុងសវនាការ។ នៅពេលដែលចៅក្រម បានកោះហៅដោយឥតព្រាងទុក ឲ្យធ្វើសេចក្តីសន្និដ្ឋានបិទ ជនជាប់ចោទជាច្រើន បានស្នើសុំពន្យារពេលរហូតដល់មេធាវីរបស់អ្នកទាំងនោះអាចចូលរួមវិញបាន។ ចៅក្រមបានបដិសេធសំណើសុំនេះ ហើយបាននាំគ្នាចូលបន្ទប់ពិភាក្សារយៈពេល ១៥ នាទី មុនពេលត្រឡប់មកវិញជាមួយនឹងសាលក្រម និងការផ្តន្ទាទោសនានា។ នៅពេលចៅក្រមទាំងនោះចូលទៅពិភាក្សា នគរបាល និងកងរាជអាវុធហត្ថបានចូលក្នុងបន្ទប់សវនាការ ហើយនៅផ្លូវដើរខាងក្រៅបន្ទប់នោះត្រូវបានបិទនៅពេលជាមួយគ្នានោះដែរ។
ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “នគរបាល បានចូលក្នុងតុលាការភ្លាមៗ បន្ទាប់ពីចៅក្រមចូលបន្ទប់ពិភាក្សាដើម្បីចេញសាលក្រម។ នេះបានបង្ហាញយ៉ាងច្បាស់ថា សវនាការនេះគ្រាន់តែជាការសម្តែងដោយមានការបញ្ចប់មួយដែលត្រូវបានគិតជាមុន ដោយត្រូវបានបង្កើតឡើងដើម្បីគម្រាមកំហែងគណបក្សសង្គ្រោះជាតិ បន្ទាប់ពីព្រឹត្តិការណ៍នៅខេត្តស្វាយរៀងកាលពីចុងសប្តាហ៍មុន”។ អ្នកនាង បានបន្តទៀតថា៖ “មិនមានភាពចៃដន្យនោះទេ ដែលមនុស្សពីរនាក់ក្នុងចំណោមមនុស្សទាំងបីនាក់ដែលត្រូវបានផ្តន្ទាទោសដាក់ពន្ធនាគារដល់ទៅ ២០ឆ្នាំ ដែលអ្នកទាំងនោះមានវត្តមាននៅក្នងព្រឹត្តិការណ៍នៅខេត្តស្វាយរៀង។”
នគរបាល បានចូលក្នុងតុលាការភ្លាមៗ បន្ទាប់ពីចៅក្រមចូលបន្ទប់ពិភាក្សាដើម្បីចេញសាលក្រម។ នេះបានបង្ហាញយ៉ាងច្បាស់ថា សវនាការនេះគ្រាន់តែជាការសម្តែងដោយមានការបញ្ចប់មួយដែលត្រូវបានគិតជាមុន ដោយត្រូវបានបង្កើតឡើងដើម្បីគម្រាមកំហែងគណបក្សសង្គ្រោះជាតិ។
ជនជាប់ចោទជាច្រើន ត្រូវបានចាប់ខ្លួន បន្ទាប់ពីបាតុកម្មមួយបានក្លាយជាមានអំពើហិង្សានៅទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤។ អំឡុងពេលសវនាការ ដែលជាសវនាការមួយត្រូវបានប្រព្រឹត្តិទៅមិនជាប់លាប់ចាប់តាំងពីឆ្នាំ ២០១៤ មក គ្មានដើមចោទណាម្នាក់អាចចំណាំជនជាប់ចោទណាមួយក្នុងចំណោមជនជាប់ចោទទាំង ១១នាក់ ថាបានប្រព្រឹត្តិអំពើហិង្សាណាមួយអំឡុងពេលព្រឹត្តិការណ៍នោះទេ។
លោក មាជ សុវណ្ណារ៉ា បេក្ខជនតំណាងរាស្ត្រគណបក្សសង្គ្រោះជាតិមណ្ឌលខេត្តបន្ទាយមានជ័យ លោក អឿ ណារិទ្ធ មន្ត្រីផ្នែកកិច្ចការសាធារណៈ និងលោក ឃីន ជំរឿន ប្រធានចលនាយុវជនគណបក្សមណ្ឌលភ្នំពេញ ត្រូវបានផ្តន្ទាទោសពីបទចូលរួម និងដឹកនាំចលនាកុបកម្ម (មាត្រា ៤៥៦ ៤៥៧ និង៤៥៩ នៃក្រមព្រហ្មទណ្ឌ) និងដាក់ពន្ធនាគារចំនួន ២០ ឆ្នាំ។
មនុស្ស ៨នាក់ ផ្សេងទៀត៖ លោក ស៊ុ ពុទ្ធី សមាជិកក្រុមប្រឹក្សាខណ្ឌច្បារអំពៅ លោក នាង សុឃុន អ្នកដឹកនាំយុវជនគណបក្សខណ្ឌច្បារអំពៅ លោក សាន គីមហេង អ្នកដឹកនាំយុវជនគណបក្សខណ្ឌទួលគោក លោក ទេព ណារិន សាន សីហៈ និង អាន បឋម សមាជិកយុវជនបក្ស និងលោក អ៊ុក ពេជ្រសំណាង និងកែ ឃីម អ្នកគាំទ្រគណបក្សសង្គ្រោះជាតិ ត្រូវបានចោទប្រកាន់ពីបទចូលរួមក្នុងចលនាកុបកម្ម (មាត្រា ៤៥៦ និង៤៥៧ នៃក្រមព្រហ្មទណ្ឌ) ហើយផ្តន្ទាទោសដាក់ពន្ធនាគារចំនួន ៧ឆ្នាំ។
លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ បានមានប្រសាសន៍ថា៖ “ការផ្តន្ទាទោសដ៏អយុត្តិធម៌ទៅលើសមាជិក និងសកម្មជនគណបក្សសង្គ្រោះជាតិនេះ ត្រូវបានធ្វើឡើងបន្ទាប់ពីការធ្វើពហិការរបស់តំណាងរាស្ត្រគណបក្សសង្គ្រោះជាតិទាំង ៥៥នាក់ កាលពីសប្តាហ៍មុន នៅក្នុងអង្គប្រជុំវិសាមញ្ញ ដែលបានស្នើឡើងដោយគណបក្សកាន់អំណាច ដើម្បីធ្វើការអនុម័តលើសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល។”
អង្គការ លីកាដូ សូមធ្វើការអំពាវនាវជាថ្មីម្តងទៀត សូមកុំឲ្យតុលាការក្លាយជាឧបករណ៍នយោបាយ ហើយសូមអំពាវនាវ សូមឲ្យលើកចោលសាលក្រម និងការផ្តន្ទាទោសទាំងនោះ ដោយផ្អែកលើមូលហេតុនៃសវនាការដែលប្រព្រឹត្តិទៅមិនប្រក្រតី និងអង្គហេតុពិតនៃករណីនេះ។
សម្រាប់ព័ត៌មានបន្ថែម សូមទាក់ទង៖
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ, ទូរស័ព្ទលេខ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ អំពើនៅទីលានប្រជាធិបតេយ្យ ២០១៤