ស្ថាប័នឃ្លាំមើលនៃសាជីវកម្មហិរញ្ញវត្ថុអន្តរជាតិ ឈានដល់ដំណាក់ការត្រួតពិនិត្យ អនុលោមភាពនៃបណ្ដឹងមីក្រូហិរញ្ញវត្ថុនៅកម្ពុជា
ចេញផ្សាយ ថ្ងៃទី១៥ ខែវិច្ឆិកា ឆ្នាំ២០២២; ក្រុមសង្គមស៊ីវិលពាក្យបណ្ដឹងមួយទៅលើ គ្រឹះស្ថានមីក្រូហិរញ្ញវត្ថុ និងធនាគារនៅកម្ពុជា ដែលជាស្ថាប័នទទួលបានជំនួយពីសាជីវកម្មហិរញ្ញវត្ថុអន្តរជាតិ (IFC) នឹងត្រូវឈានដល់ដំណាក់កាលនៃការអនុលោមទៅតាមច្បាប់ ដែលជាជំហានមានសារៈសំខាន់ ឆ្ពោះទៅកាន់ការស៊ើបអង្កេតដ៏ចាំបាច់មួយ ចំពោះការរំលោភបំពានជាច្រើនឆ្នាំទៅលើស្ដង់ដារអនុវត្តរបស់សាជីវកម្មហិរញ្ញវត្ថុអន្តរជាតិ ពីសំណាក់ស្ថាប័នផ្ដល់កម្ចីឥណទានខ្នាតតូចនៅកម្ពុជា ។
ការិយាល័យភាពអនុលោម ទីប្រឹក្សាដោះស្រាយវិវាទ (CAO) នៃសាជីវកម្មហិរញ្ញវត្ថុអន្តរជាតិ ទើបបានចេញផ្សាយជាសាធារណៈថា ពាក្យបណ្ដឹងដែល អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ និងអង្គការសមធម៌កម្ពុជា បានដាក់ជូន កាលពីខែកុម្ភៈ ឆ្នាំ២០២២នេះ ក្នុងនាមប្រជាពលរដ្ឋខ្មែរអ្នកខ្ចីប្រាក់ នឹងត្រូវឈានដល់ការត្រួតពិនិត្យអនុលោមភាព ក្រោយពីមានការសម្រេចពីម្ចាស់បណ្ដឹង ក៏ដូចជាក្រោយពេលដែលម្ចាស់បណ្ដឹង និងគ្រឹះស្ថានមីក្រូហិរញ្ញវត្ថុផ្សេងទៀត មិនបានឈានដល់ការឯកភាពគ្នា ក្នុងការដោះស្រាយវិវាទនេះ ។
ប្រជាពលរដ្ឋខ្មែរអ្នកខ្ចីប្រាក់ កំពុងរងគ្រោះរាល់ថ្ងៃ ដូចបានបង្ហាញនៅក្នុងការសិក្សាស្រាវជ្រាវមួយ ដែលគាំទ្រថវិកាដោយរដ្ឋាភិបាលអាល្លឺម៉ង់ ដោយបានរកឃើញថា មានការលក់ដីដោយសារការជំពាក់បំណុល កើតឡើងនៅរៀងរាល់១៦នាទីម្ដង នៅក្នុងប្រទេសកម្ពុជា
ណាលី ពីឡូក, នាយិកាទទួលបន្ទុកកិច្ចការក្រៅតំបន់នៃអង្គការលីកាដូ
អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា “នេះជាដំណាក់កាលសំខាន់មួយឆ្ពោះទៅកាន់គណនេយ្យភាព ក្រោយពីមានការធ្វេសប្រហែស និងខ្វះខាតជាច្រើនឆ្នាំនៃការត្រួតពិនិត្យរបស់សាជីវកម្មហិរញ្ញវត្ថុអន្តរជាតិ ក៏ដូចជាការរំលោភបំពានជាច្រើនឆ្នាំដោយគ្រឹះស្ថានមីក្រូហិរញ្ញវត្ថុ និងធនាគារទាំងនេះ” ។ អ្នកនាងបានបន្ថែមទៀតថា “ប្រជាពលរដ្ឋខ្មែរអ្នកខ្ចីប្រាក់ កំពុងរងគ្រោះរាល់ថ្ងៃ ដូចបានបង្ហាញនៅក្នុងការសិក្សាស្រាវជ្រាវមួយ ដែលគាំទ្រថវិកាដោយរដ្ឋាភិបាលអាល្លឺម៉ង់ ដោយបានរកឃើញថា មានការលក់ដីដោយសារការជំពាក់បំណុល កើតឡើងនៅរៀងរាល់១៦នាទីម្ដង នៅក្នុងប្រទេសកម្ពុជា ។ សាជីវកម្មហិរញ្ញវត្ថុអន្តរជាតិ ចំណាយពេលយូរពេកហើយក្នុងការចាប់ផ្ដើមស៊ើបអង្កេតដោយឯករាជ្យទៅលើទំហំនៃការរំលោភបំពានទាំងនេះ ក៏ដូចជាការបង្កើតផែនការដើម្បីកែតម្រូវការខូចខាតដែលបង្កឡើងដោយការវិនិយោគទាំងនេះ” ។
ស្ថាប័នដែលទទួលមូលនិធីពីសាជីវកម្មហិរញ្ញវត្ថុអន្តរជាតិរួមមាន ធនាគារអេស៊ីលីដា ធនាគារហត្ថា ធនាគារស្ថាបនា គ្រឹះស្ថានមីក្រូហិរញ្ញវត្ថុអម្រឹត គ្រឹះស្ថានមីក្រូហិរញ្ញវត្ថុអិលអូអិលស៊ី និងគ្រឹះស្ថានមីក្រូហិរញ្ញវត្ថុប្រាសាក់ ។ បណ្ដឹងនេះ បង្ហាញថា ស្ថាប័នទាំងនេះបានរំលោភបំពានទៅលើ “បញ្ជីលើកលែង” របស់សាជីវកម្មហិរញ្ញវត្ថុអន្តរជាតិ ចំពោះការហាមឃាត់ការវិនិយោគទាំងឡាយណា ដែលពាក់ព័ន្ធនឹង ពលកម្មកុមារ និងការរំលោភសិទ្ធិដីធ្លីរបស់ជនជាតិដើមភាគតិចដោយគ្មានការយល់ព្រម ក៏ដូចជាការរំលោភបំពានទៅលើបទដ្ឋានអនុវត្តស្តង់ដាររបស់សាជីវកម្មហិរញ្ញវត្ថុអន្តរជាតិខាងក្រោមដូចជា៖
▪ បទដ្ឋានអនុវត្ដន៍ទី១៖ ការវាយតម្លៃ និងការគ្រប់គ្រង ផលប៉ះពាល់និងហានិភ័យលើបរិស្ថាននិងសង្គម
▪ បទដ្ឋានអនុវត្ដន៍ទី២៖ លក្ខខណ្ឌការងារ និងពលកម្ម
បទដ្ឋានអនុវត្ដន៍ទី៤៖ សុខភាព សុវត្ថិភាព និងសន្តិសុខសហគមន៍
▪ បទដ្ឋានអនុវត្ដន៍ទី៥៖ លទ្ធកម្មដីធ្លី (ការទទួលបានដី) និងការតាំងទីលំនៅថ្មីដោយមិនស្ម័គ្រចិត្ត
▪ បទដ្ឋានអនុវត្ដន៍ទី៧៖ ជនជាតិដើមភាគតិច
ប្រជាពលរដ្ឋខ្មែររាប់លាននាក់នៅតែកំពុងជាប់ផុងក្នុងវិបត្តិបំណុល ដូច្នេះហើយតម្រូវឱ្យមានការកែទម្រង់ពិតប្រាកដដើម្បីបញ្ចប់ការអនុវត្តបែបកេងប្រវ័ញ្ច និងការរំលោភសិទ្ធិមនុស្ស នៅក្នុងវិស័យនេះ
អៀង វុទ្ធី, នាយកប្រតិបត្តិនៃអង្គការសមធម៌កម្ពុជា
លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជា បានមានប្រសាសន៍ថា “យើងជឿជាក់ថា ការស៊ើបអង្កេតរបស់ CAO ដំបូងនេះ ទៅលើវិស័យមីក្រូហិរញ្ញវត្ថុនៅកម្ពុជា នឹងនាំឱ្យមានការអនុគ្រោះ និងការផ្ដល់សំណងជំងឺចិត្តពិតប្រាកដ ចំពោះអ្នកខ្ចីប្រាក់ ដែលបានរងផលប៉ះពាល់ដោយការវិនិយោគរបស់សាជីវកម្មហិរញ្ញវត្ថុអន្តរជាតិនៅកម្ពុជា” ។ លោកបានបន្តថា “ប្រជាពលរដ្ឋខ្មែររាប់លាននាក់នៅតែកំពុងជាប់ផុងក្នុងវិបត្តិបំណុល ដូច្នេះហើយតម្រូវឱ្យមានការកែទម្រង់ពិតប្រាកដដើម្បីបញ្ចប់ការអនុវត្តបែបកេងប្រវ័ញ្ច និងការរំលោភសិទ្ធិមនុស្ស នៅក្នុងវិស័យនេះ” ។
ដំណាក់កាលត្រួតពិនិត្យអនុលោមភាពនេះ ចាប់ផ្ដើមជាមួយនឹងការវាយតម្លៃ និងការសម្រេចថាតើចាំបាច់ឱ្យមានការស៊ើបអង្កេតបន្ថែមទៀតឬយ៉ាងណា ។ ប្រសិនបើចាំបាច់ ការិយាល័យភាពអនុលោម ទីប្រឹក្សាដោះស្រាយវិវាទនឹងធ្វើការស៊ើបអង្កេត មុនពេលដាក់ចេញជា លទ្ធផល និងអនុសាសន៍ ទៅកាន់សាជីវកម្មហិរញ្ញវត្ថុអន្តរជាតិ ក៏ដូចជាឃ្លាំមើលការកែតម្រូវផែនការសកម្មភាព ដែលបង្កើតឡើងដោយគណៈកម្មាធិការគ្រប់គ្រងរបស់សាជីវកម្មហិរញ្ញវត្ថុអន្តរជាតិ ៕
សម្រាប់ព័ត៌មានបន្ថែម សូមទាក់ទង៖
▪ លោក អៀង វុទ្ធី នាយកប្រតិបត្តិនៃអង្គការសមធម៌កម្ពុជាតាមរយៈ Signal: +៨៥៥ ១២ ៧៩១ ៧០០ (ភាសាខ្មែរ និងអង់គ្លេស)
▪ លោក អំ សំអាត នាយកទទួលបន្ទុកកិច្ចការទូទៅនៃអង្គការលីកាដូ តាមរយៈ Signal: +៨៥៥ ១០ ៣២៧ ៧៧០ (ភាសាខ្មែរ)
▪ អ្នកនាង ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ តាមរយៈ Signal: +៨៥៥ ១២២១៤ ៤៥៤ (ភាសាអង់គ្លេស)
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- គ្រឹះស្ថានមីក្រូហិរញ្ញវត្ថុ និងបញ្ហាបំណុល