សហគមន៍ដីក្រហមទាមទាររកយុត្តិធម៌ ក្រោយការបណ្ដេញចេញយ៉ាងហិង្សាអស់រយៈពេល១០ឆ្នាំ
ចេញផ្សាយ ថ្ងៃទី២៤ ខែមករា ឆ្នាំ២០១៩ថ្ងៃនេះជាថ្ងៃខួបគម្រប់១០ឆ្នាំនៃការបណ្ដេញចេញដោយបង្ខំយ៉ាងហិង្សានៅសហគមន៍ដីក្រហមក្នុងរាជធានីភ្នំពេញ។ អង្គការលីកាដូធ្វើការចែករំលែកវីដេអូដែលផលិតដោយសហគមន៍នេះ និងបន្តជំហរជាសាមគ្គីភាពជាមួយអ្នកទាំងនោះ ក្នុងការស្វែងរកយុត្តិធម៌ ក៏ដូចជាសូមស្នើសុំដោយទទូចឱ្យបញ្ចប់ការបណ្ដេញចេញដោយបង្ខំ។
កាលពីថ្ងៃទី២៤ ខែមករា ឆ្នាំ២០០៩ ប្រជាពលរដ្ឋរស់នៅតំបន់ដីក្រហមដែលកំពុងព្យាយាមបញ្ឈប់គ្រឿងចក្រឈូសឆាយផ្ទះសំបែងរបស់ពួកគាត់ ត្រូវបានទទួលរងអំពើហិង្សាពីសំណាក់សន្ដិសុខនិងកម្មករសំណង់របស់ក្រុមហ៊ុន7NG ដោយមានការគាំទ្រពីសំណាក់នគរបាលបង្ក្រាបកុប្បកម្ម ដែលប្រដាប់ដោយកាំភ្លើងវែង-ខ្លី ដំបងឆក់ បំពង់ពន្លត់អគ្គីភ័យ ឡានទឹកនិងឧស្ម័នបង្ហូរទឹកភ្នែកជាដើម។ មនុស្សយ៉ាងតិច១៨នាក់ ត្រូវបានរងរបួស ហើយក្នុងនោះមានអ្នករងរបួសធ្ងន់ផងដែរ។
ផ្ទះសំបែងប្រមាណជាង១០០ខ្នង ត្រូវបានបំផ្លិចបំផ្លាញខ្ទិចខ្ទីគ្មានសល់ ហើយប្រជាពលរដ្ឋរាប់រយគ្រួសារត្រូវបានបណ្ដេញចេញដោយបង្ខំឱ្យទៅតាំងទីលំនៅថ្មីនៅឆ្ងាយពីរាជធានីភ្នំពេញ ដែលគ្មានសេវាសាធារណៈជាមូលដ្ឋាន (ទឹក-ភ្លើង) និងបាត់បង់ការងារនិងការអប់រំ។ រយៈពេល១០ឆ្នាំក្រោយមក គ្រួសារជាច្រើនទាំងនោះ ត្រូវបន្តរស់នៅក្នុងភាពក្រីក្រនៅតំបន់ដែលគ្មានការអភិវឌ្ឍន៍ ហើយការស្នើសុំរបស់ពួកគាត់ដើម្បីទទួលបានសំណងសមរម្យគឺនៅតែមិនទាន់ត្រូវបានអើពើ។
គាំទ្រសហគមន៍ សូមជួយចែករំលែកវីដេអូនេះ!
- ឯកសារទាក់ទង