យុទ្ធនាការ១៦ថ្ងៃ ទប់ស្កាត់អំពើហិង្សាលើស្រី្តភេទ៖ អ្នកស្រី អ៊ុំ សុភី
ចេញផ្សាយ ថ្ងៃទី៥ ខែធ្នូ ឆ្នាំ២០១៨
ដើម្បីប្រារព្ធយុទ្ធនាការ១៦ថ្ងៃទប់ស្កាត់អំពើហិង្សាលើស្រ្តីភេទ អង្គការលីកាដូ ផ្តោតសំខាន់ទៅលើអ្នកធ្វើយុទ្ធនាការសិទិ្ធដីធ្លី និងអ្នកការពារសិទ្ធិមនុស្សជាស្រ្តី ដែលបានប្រឈមមុខ និងទទួលរងអំពើហិង្សាពីសំណាក់អាជ្ញាធររដ្ឋនៅកម្ពុជា។
ប្រជាពលរដ្ឋកម្ពុជាប្រហែលជាងកន្លះលាននាក់បានបាត់បង់ដីធ្លី និងផ្ទះសម្បែង ដោយសារការបណ្តេញដោយបង្ខំ ក្នុងរយៈពេលជាងពីរទសវត្សរ៍មកនេះ។ ពលរដ្ឋទាំងនោះ ដែលភាគច្រើនជាស្រ្តី បានចេញមុខក្នុងការតវ៉ាដោយអហិង្សា ដើម្បីទាមទារយុត្តិធម៌ និងសំណងសមរម្យ។ ភាពសកម្មនិយមរបស់អ្នកទាំងនោះ ជាញឹកញាប់ត្រូវបានទទួលរងដោយការបង្រ្កាបយ៉ាងហិង្សាពីសំណាក់កងសន្តិសុខ ក៏ដូចជាការគំរាមកំហែងដោយប្រើប្រាស់ប្រព័ន្ធតុលាការ និងការឃុំខ្លួនដោយមិនត្រឹមត្រូវផងដែរ។
នៅក្នុងរយៈពេលពីរសប្តាហ៍ខាងមុខ (១៦ថ្ងៃ) អង្គការលីកាដូ នឹងចេញផ្សាយពីប្រវត្តិតស៊ូ និងវីដេអូខ្លីមួយចំនួន ស្តីពីស្រ្តីកម្ពុជា ដែលកំពុងបន្តទាមទារយុត្តិធម៌ ទោះបីអ្នកទាំងនោះបានជួបប្រទះនឹងផលលំបាកយ៉ាងណាក្តី។
អ្នកស្រី អ៊ុំ សុភី ដែលមានអាយុ ៣៩ ឆ្នាំ បានទទួលរងនូវការរំលោភបំពានធ្ងន់ធ្ងរ រួមទាំងការរំលោភបំពានតាមផ្លូវតុលាការជាច្រើនលើកច្រើនសារ ហើយថែមទាំងបាត់បង់ការងារជាគ្រូបង្រៀនទៀតផង ដោយសារតែភាពសកម្មនិយមរបស់អ្នកស្រី ដើម្បីការពារដីធ្លីរបស់អ្នកស្រី និងសហគមន៍អ្នកស្រី ពីការរំលោភបំពានពីសំណាក់ក្រុមហ៊ុនដែលមានខ្នងបង្អែកជាអ្នកមានអំណាច។
ពួកគេគិតថា យើងទាំងអស់គ្នាប៉ះបោរប្រឆាំងនឹងពួកគេ។ ប៉ុន្តែពួកយើងគ្រាន់តែតវ៉ា ដើម្បីការពារដីធ្លី ជីវភាពរស់នៅ និងផ្ទះសម្បែងរបស់យើងតែប៉ុណ្ណោះ។
អ្នកស្រី រស់នៅភូមិ ឡ ពាង ក្នុងខេត្តកំពង់ឆ្នាំង តាំងពីឆ្នាំ ២០០៤។ នៅឆ្នាំ ២០០៦ អ្នកតំណាងម្នាក់មកពីក្រុមហ៊ុន ខេឌីស៊ី អ៊ិនធើណាស់សិនណាល់ (ជាក្រុមហ៊ុនរបស់លោកស្រី ជា ខេង ដែលជាភរិយារបស់រដ្ឋមន្ត្រីក្រសួងរ៉ែ និងថាមពល លោក ស៊ុយ សែម) បានធ្វើការជាមួយអាជ្ញាធរក្នុងតំបន់ ដើម្បីបណ្តេញពលរដ្ឋចេញពីដីធ្លីដោយបង្ខំ តាមរយៈការទិញដីដោយបង្ខិតបង្ខំនៅក្នុងភូមិរបស់អ្នកស្រី។ ការបង្ខិតបង្ខំនេះនៅតែត្រូវបានធ្វើឡើង ទោះបីជាពលរដ្ឋប្រមាណជាង ៥០ គ្រួសារ (រួមទាំងគ្រួសាររបស់អ្នកស្រីផងនោះ) មិនដែលយល់ព្រមលក់ដីទាំងនោះក៏ដោយ។
អ្នកស្រី បានមានប្រសាសន៍ថា៖ “ពួកគេ (អាជ្ញាធរ) គិតថា យើងទាំងអស់គ្នាប៉ះបោរប្រឆាំងនឹងពួកគេ។ ប៉ុន្តែពួកយើងគ្រាន់តែតវ៉ា ដើម្បីការពារដីធ្លី ជីវភាពរស់នៅ និងផ្ទះសម្បែងរបស់យើងតែប៉ុណ្ណោះ។”
នៅឆ្នាំ ២០០៩ អ្នកស្រី ត្រូវបានសាលាដំបូងខេត្តកំពង់ឆ្នាំង ចោទប្រកាន់ពីបទញុះញង់ ហើយអ្នកស្រីបានរត់ភៀសខ្លួនទៅប្រទេសថៃ រយៈពេល ពីរឆ្នាំ ដោយបារម្ភអំពីសុវត្ថិភាពរបស់អ្នកស្រី។
នៅពេលអ្នកស្រីត្រឡប់មកវិញ អ្នកស្រី បានបន្តដឹកនាំក្នុងការតស៊ូមតិទាមទារសិទិ្ធដីធ្លីសម្រាប់សហគមន៍អ្នកស្រី។ ក្រោយមក អ្នកស្រី ទទួលបានលិខិតមួយច្បាប់បិទនៅលើផ្ទះអ្នកស្រី ដោយបានព្រមានអ្នកស្រីថា ប្រសិនបើអ្នកស្រីនៅបន្តតវ៉ា ទាំងអ្នកស្រី និងស្វាមីអ្នកស្រី នឹងត្រូវចាប់ខ្លួន ឬសម្លាប់ចោល។ អ្នកស្រី បានបដិសេធ ដោយមិនធ្វើតាមការព្រមានឲ្យនៅស្ងៀមស្ងាត់នេះ ហើយបានបន្តធ្វើជាអ្នកដឹកនាំម្នាក់នៅក្នុងសហគមន៍របស់អ្នកស្រី។
ការចរចាររវាងអ្នកភូមិ និងក្រុមហ៊ុន បានចាប់ផ្តើមឡើងម្តងទៀតនៅឆ្នាំ ២០១៤ ប៉ុន្តែមិនបានលទ្ធផលល្អនោះទេ។ ជាថ្មីម្តងទៀត ក្រុមហ៊ុន បានប្រើប្រាស់ហិង្សា និងការគម្រាមកំហែងដោយប្រើប្រាស់ប្រព័ន្ធតុលាការ ទៅលើអ្នកស្រី និងអ្នកភូមិផ្សេងទៀត។
ស្ត្រី នៅទូទាំងពិភពលោក ត្រូវតែក្រោកឡើងតស៊ូទាំងអស់គ្នា ហើយតស៊ូដើម្បីជ័យជំនះរបស់យើង សិទិ្ធរបស់យើង និងសេរីភាពរបស់យើង។
អ្នកស្រី អ៊ុំ សុភី ប្រឈមមុខនឹងបទចោទប្រកាន់តាមផ្លូវតុលាការម្តងទៀត នៅឆ្នាំ ២០១៧ ពីបទល្មើស បរិហាកេរ្តិ៍ជាសាធារណៈ។ នៅខែមករា ឆ្នាំ២០១៨ ក្រុមហ៊ុន ខេឌីស៊ី បានចាប់ផ្តើមឈូសឆាយដីធ្លី ដែលអ្នកស្រីកំពុងរស់នៅ ដោយបានបំផ្លាញផ្ទះចំនួន ១៤ខ្នង និងដំណាំរបស់អ្នកភូមិជាច្រើនទៀត។
អ្នកស្រី បានតស៊ូយ៉ាងខ្លាំង ដើម្បីក្រុមគ្រួសាររបស់អ្នកស្រី។ អ្នកស្រី បានបន្តថា៖ “ជីវភាពរបស់យើង មិនមានភាពល្អប្រសើរឡើង ដោយសារភាពសកម្មនិយមរបស់យើងនោះទេ។ ជីវភាពរបស់សកម្មជនដទៃទៀត ក៏ដូចគ្នា ដោយអ្នកទាំងនោះមិនមានការងារធ្វើនោះទេ។”
ប៉ុន្តែ អ្នកស្រី នៅតែបន្តសកម្មភាពតស៊ូមតិដើម្បីសិទិ្ធរបស់អ្នកស្រី ហើយអ្នកស្រីចង់ផ្ញើសារមួយទៅកាន់សាធារណៈជនថា៖ “ស្ត្រី គឺក្លាហាន និងរឹងមាំ!”
“ស្ត្រី ត្រូវតែរឹងមាំ ទោះជាមនុស្សជាច្រើន គិតថាស្ត្រី បង្វិលចង្ក្រានមិនជុំក៏ដោយ។ ស្ត្រី នៅទូទាំងពិភពលោក ត្រូវតែក្រោកឈរឡើងទាំងអស់គ្នា ហើយតស៊ូដើម្បីជ័យជំនះរបស់យើង សិទិ្ធរបស់យើង និងសេរីភាពរបស់យើង។”
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិដីធ្លី សិទ្ធិស្ត្រី
