ការដើរហែក្បួនអហិង្សាទូទាំងប្រទេសក្នុងទិវាសិទិ្ធមនុស្សអន្តរជាតិកំពុងចាប់ផ្តើម
ចេញផ្សាយ ថ្ងៃទី៤ ខែធ្នូ ឆ្នាំ២០១៤នាព្រឹកនេះ នៅក្នុងស្រុក អូរជុំ ខេត្តរតនគិរី សកម្មជនសិទិ្ធមនុស្សប្រមាណជាង ២៥០នាក់ ដែលដឹកនាំដោយព្រះសង្ឃ បានចាប់ផ្តើមការដើរហែក្បួនធម្មយាត្រា-សិទិ្ធយាត្រាអហិង្សាទូទាំងប្រទេសនាឆ្នាំនេះ ដើម្បីប្រារព្ធទិវាសិទិ្ធមនុស្សអន្តរជាតិ ឆ្នាំ២០១៤។
សកម្មជន និងព្រះសង្ឃជាច្រើន បានប្រមូលផ្តុំគ្នានៅក្នុងស្រុក អូរជុំ នៅវេលាម៉ោងប្រមាណ ៧ព្រឹក ហើយចាប់ផ្តើមធ្វើការដើរហែក្បួនទៅកាន់ទីក្រុងបានលុង។ ការដើរហែក្បួន គឺបានចាប់ផ្តើម បន្ទាប់ពីមានការប្រារព្ធកម្មវិធីសំដែងរបាំប្រពៃណីរបស់ប្រជាពលរដ្ឋជនជាតិភាគតិចកាលពីយប់ម្សិលមិញ រួមជាមួយការចែករំលែករឿងរ៉ាវដែលប្រជាពលរដ្ឋភាគតិចទាំងនោះបានជួបប្រទះដូចជារឿងជម្លោះដីធ្លី និងបញ្ហារំលោភសិទិ្ធមនុស្សដទៃទៀត ដែលធ្វើឲ្យប៉ះពាល់ដល់ក្រុមគ្រួសារ និងសហគមន៍របស់អ្នកទាំងនោះ។
ឥឡូវនេះ អ្នកដើរហែក្បួន កំពុងសម្រាកនៅរម្យណីយដ្ឋានធម្មជាតិ បឹងយក្សឡោម ជាកន្លែងដែលព្រះតេជគុន លួន សុវាត កំពុងមានសង្ឃដីកាទៅកាន់ប្រជាពលរដ្ឋ ដែលជាផ្នែកមួយនៃកម្មវិធីវេទិកាសាធារណៈរបស់ទិវាសិទិ្ធមនុស្សអន្តរជាតិ។
អង្គការមិនមែនរដ្ឋាភិបាលក្នុងតំបន់ និងប្រជាពលរដ្ឋរស់នៅខេត្តរតនគិរី បាននិយាយថា វាជាក្បួនធំបំផុតមិនធ្លាប់មាន ដែលត្រូវបានធ្វើឡើងនៅក្នុងខេត្ត។
លើសពីនេះ អ្នករៀបចំកម្មវិធីទិវាសិទិ្ធមនុស្សអន្តរជាតិ និងព្រះសង្ឃមួយចំនួនទៀត បានចាកចេញពីការិយាល័យអង្គការសិទិ្ធមនុស្ស លីកាដូ នាព្រឹកនេះ ដើម្បីចូលរួមជាមួយសហគមន៍នានានៅទូទាំងប្រទេសកម្ពុជា ហើយការចាប់ផ្តើមប្រារព្ធការដើរហែក្បួនធម្មយាត្រា-សិទិ្ធយាត្រា នៅទូទាំងប្រទេស តាមផ្លូវជាតិចំនួន ៦ នឹងចាប់ផ្តើមនៅថ្ងៃស្អែក។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម