សមាជិកចលនាអំំណាចពលរដ្ឋខ្មែរមួយចំនួន ត្រូវបានផ្តន្ទាទោស
ចេញផ្សាយ ថ្ងៃទី១៤ ខែមករា ឆ្នាំ២០១៥
នាព្រឹកនេះ សមាជិកចំនួន ៣នាក់ នៃចលនាអំណាចពលរដ្ឋខ្មែរ (KPPM) លោក សេរី ប៊ុនឡុង សេង សុខម៉េង និងអ៊ុំ ភារុណ ត្រូវបានផ្តន្ទាទោសទៅលើបទល្មើសដែលបណ្តាលពីសកម្មភាពរបស់អ្នកទាំងនោះដែលត្រូវបានប្រព្រឹត្តឡើងមុនពេលមានការបោះឆ្នោតជាតិខែកក្កដា ឆ្នាំ២០១៣បន្តិច។ លោក ប៊ុនឡុង និងសុខម៉េង ត្រូវបានផ្តន្ទាទោសជាប់ពន្ធនាគាររយៈពេល ៦ឆ្នាំ និងពិន័យជាប្រាក់ ១.២៥០ ដុល្លារអាមេរិក ខណៈដែលលោក ភារុណ ត្រូវបានផ្តន្ទាទោសជាប់ពន្ធនាគាររយៈពេល ៥ឆ្នាំ និងពិន័យជាប្រាក់ក្នុងចំនួនដូចគ្នា។ អ្នកទាំងបី ត្រូវបានដកហូតសិទិ្ធក្នុងការបោះឆ្នោតដោយមិនច្បាស់លាស់។
អ្នកទាំងបី ត្រូវបានចាប់ខ្លួន និងឃុំខ្លួននៅខេត្តបន្ទាយមានជ័យរយៈពេលមួយខែមុនពេលមានការបោះឆ្នោតជាតិខែកក្កដា ឆ្នាំ២០១៣ ក្រោយពីមានការចែកចាយនាឡិកា វិទ្យុ DVD និងអាវយឺតមានរូបសញ្ញាចលនាអំណាចពលរដ្ឋខ្មែរ និងអំពាវនាវដល់ពលរដ្ឋកុំឲ្យចូលរួមការបោះឆ្នោតដែលអយុត្តិធម៌នោះ។ អ្នកទាំងនោះត្រូវបានផ្តន្ទាទោសយោងតាមក្រមព្រហ្មទណ្ឌមាត្រា ៤៥៣ ពីបទបង្កើតផែនការវាយប្រហារដើម្បីគម្រាមកំហែងស្ថាប័ននានាក្នុងព្រះរាជាណាចក្រកម្ពុជា ឬរំលោភបំពានលើបូរណភាពទឹកដីរបស់ជាតិ និងច្បាប់ស្តីពីការបោះឆ្នោតជ្រើសតាំងតំណាងរាស្ត្រ មាត្រា ១២៤ ពីបទប្រើប្រាស់កំលាំង ឬប្រើហិង្សារារាំងអ្នកបោះឆ្នោតស្របច្បាប់ពីការបោះឆ្នោត។
ចលនានេះ គឺត្រូវបានដឹកនាំដោយលោក សួន សេរីរដ្ឋា ដែលក៏ត្រូវបានផ្តន្ទាទោសថាថ្ងៃនេះដោយកំបាំងមុខ។ សួន សេរីរដ្ឋា គឺជាបុគ្គលមិនច្បាស់លាស់ដែលត្រូវបានកំណត់ដោយរាជរដ្ឋាភិបាលថាបានដឹកនាំក្រុមភេរវកម្ម។ ការចោទប្រកាន់នេះ ត្រូវបានប្រើប្រាស់ដើម្បីចាប់ខ្លួននិងផ្តន្ទាទោសមិនត្រឹមត្រូវ (ដោយមិនមានភស្តុតាង ឬដោយផ្អែកលើការនិយាយដោយមិនត្រឹមត្រូវរបស់រដ្ឋា) ទៅលើអ្នករិះគន់រាជរដ្ឋាភិបាល ដូចជាមកទៅលើលោក ម៉ម សូណង់ដូ។
- ចំណងជើង & មូលបទ
- តុលាការ និងនីតិរដ្ឋ ការបោះឆ្នោត សិទិ្ធបញ្ចេញមតិ និងចូលរួម
