អ្នកតវ៉ាសុំអន្តរាគមន៍ពីលោកជំទាវ មីឆែល អូបាម៉ា លើសំណុំរឿងសកម្មជនដែលជាប់ពន្ធនាគារ
ចេញផ្សាយ ថ្ងៃទី១៧ ខែមីនា ឆ្នាំ២០១៥
នាព្រឹកនេះ អ្នកតវ៉ាមួយក្រុមប្រមាណជាង ១០០នាក់ មកពីសហគមន៍បឹងកក់ បុរីកីឡា ថ្មគោល និងទួលសង្កែ បានប្រមូលផ្តុំគ្នានៅមុខស្ថានទូតសហរដ្ឋអាមេរិក ដើម្បីអំពាវនាវសុំឲ្យមានការដោះលែងសមាជិកគ្រួសារក៏ដូចជាសមាជិកសហគមន៍របស់អ្នកទាំងនោះដែលត្រូវបានជាប់ពន្ធនាគារ។ អ្នកទាំងនោះ បានប្រមូលហត្ថលេខាគាំទ្រសំណើសុំអន្តរាគមន៍ពីលោកជំទាវ មីឆែល អូបាម៉ា (Michelle Obama) នៅក្នុងករណីសកម្មជនដីធ្លីដែលបានជាប់ពន្ធនាគារ។ លោកជំទាវ នឹងមកបំពេញទស្សនកិច្ចនៅប្រទេសកម្ពុជានៅថ្ងៃទី២១ និង២២ ខែមិនា ឆ្នាំ២០១៥ ជាផ្នែកមួយនៃគម្រោងផ្តួចផ្តើមសម្រាប់ការអប់រំជាអន្តរជាតិសម្រាប់ស្ត្រីដែលមានឈ្មោះថា អនុញ្ញាតឲ្យកុមារីបានរៀនសូត្រ (Let Girls Learn)។
សកម្មជនដែលបានជាប់ពន្ធនាគារនោះ គឺស្ថិតនៅក្នុងចំនួនបុរស និងស្ត្រី ១៩នាក់ ដែលត្រូវបានចាប់ខ្លួនកាលពីចុងឆ្នាំ ២០១៤។ ១១នាក់ ក្នុងចំណោមសកម្មជនទាំងនោះ ត្រូវបានជំនុំជម្រះ និងផ្តន្ទាទោសនៅក្នុងថ្ងៃដែលអ្នកទាំងនោះត្រូវបានចាប់ខ្លួន។ ៨នាក់ផ្សេងទៀត កំពុងរង់ចាំសវនាការ និងកំពុងស្ថិតនៅក្នុងការឃុំខ្លួនបណ្តោះអាសន្ន។ អ្នកទាំង ១៩នាក់ បានជាប់ក្នុងពន្ធនាគារ ម១ និងម២ នៅព្រៃស។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម ដោះលែង ១៩ នាក់ សិទ្ធិដីធ្លី សិទ្ធិស្ត្រី
