ការប្រមូលផ្តុំគ្នាដោយអហិង្សានៅថ្ងៃទិវាពលកម្មអន្តរជាតិ ត្រូវបានធ្វើឡើងនៅរាជធានីភ្នំពេញ
ចេញផ្សាយ ថ្ងៃទី១ ខែឧសភា ឆ្នាំ២០១៥
នាព្រឹកនេះ ជាការប្រារព្ធនូវទិវាពលកម្មអន្តរជាតិ ការប្រមូលផ្តុំ និងការដើរហែក្បួនមួយចំនួន ត្រូវបានប្រព្រឹត្តិឡើងនៅទីតាំងចំនួនបីផ្សេងៗគ្នា នៅក្នុងរាជធានីភ្នំពេញ។ ក្រុមមួយដែលមានអ្នកចូលរួមប្រមាណ ៥០០ នាក់ តំណាងឲ្យកម្មកររោងចក្រ កសិករ និងអ្នកធ្វើការងារក្រៅប្រព័ន្ធ បានដើរហែក្បួន និងជិះរ៉ឺម៉ក់កង់បី ចាប់ពីពហុកីឡាដ្ឋានជាតិ អូឡាំពិក ទៅកាន់ក្រសួងការងារ ជាកន្លែងដែលអ្នកទាំងនោះនឹងដាក់ញត្តិអំពាវនាវឲ្យមានការគោរពសិទិ្ធកម្មករពលករ។ នៅខណៈដែលអ្នកទាំងនោះដើរក្បួន ពួកគេបានកាន់នូវបដាអំពាវនាវលុបចោលសេចក្តីព្រាងច្បាប់ស្តីពីសហជីពពាណិជ្ជកម្ម និងសេចក្តីព្រាងច្បាប់ស្តីពីសមាគម និងអង្គការមិនមែនរដ្ឋាភិបាល។ សកម្មជនមួយចំនួនមកពីតំបន់បឹងកក់ដែលទើបតែដោះលែងពីពន្ធនាគារក៏បានចូលរួមជាមួយក្រុមនេះដែរ។ ការដើរហែក្បួន នៅតែប្រព្រឹត្តិទៅ ទោះបីជាមិនមានការអនុញ្ញាតពីសាលារាជធានីភ្នំពេញក៏ដោយ។ ក្រុមមួយទៀតដែលមានកម្មករប្រមាណ ១០០០ នាក់ ចូលរួម បានប្រមូលផ្តុំគ្នានៅមុខរដ្ឋសភាជាតិ។ ក្រុមនេះកំពុងស្តាប់ការថ្លែងសុន្ទរកថានានា និងធ្វើការទាមទារមួយចំនួន រួមទាំងការតំឡើងប្រាក់ឈ្នួលអប្បបរមា ១៧៧ ដុល្លារអាមេរិក។ នៅឯទីលានប្រជាធិបតេយ្យវិញ មួយក្រុមទៀតដែលមានសមាជិកប្រមាណ ៥០០ នាក់ បានប្រមូលផ្តុំគ្នា និងកំពុងស្តាប់សុន្ទរកថាអំពីលក្ខខណ្ឌការងារ ប្រាក់ឈ្នួលអប្បបរមា និងសេរីភាពក្នុងការបញ្ចេញមតិ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ ច្បាប់ ឬបទប្បញ្ញត្តិ
