មនុស្សរាប់រយនាក់ ប្រមូលផ្តុំគ្នានៅមុខវិមានរដ្ឋសភាជាតិ ជំទាស់នឹងសេចក្តីព្រាងច្បាប់ដែលមានការគាបសង្កត់
ចេញផ្សាយ ថ្ងៃទី២៣ ខែមិថុនា ឆ្នាំ២០១៥
នៅវេលាម៉ោង ៨ និង ៣០នាទី ព្រឹកនេះ សមាជិកសង្គមស៊ីវិលរាប់រយនាក់ បានប្រមូលផ្តុំគ្នាដោយអហិង្សានៅមុខវិមានរដ្ឋសភាជាតិ មុននឹងដើរហែក្បួន ដើម្បីអំពាវនាវសុំឲ្យលុបចោលសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាល និងតវ៉ាជំទាស់នឹងសេចក្តីព្រាងច្បាប់ស្តីពីសហជីព។ អ្នកតវ៉ាមានចំនួនប្រមាណពី ២៥០ ទៅ ៣០០ អង្គ/នាក់ រួមមានយុវជន កសិករ សកម្មជនសិទិ្ធដីធ្លី បុគ្គលិកអង្គការមិនមែនរដ្ឋាភិបាល អ្នកសារព័ត៌មាន ព្រះសង្ឃ និងប្រជាពលរដ្ឋទូទៅ។
អ្នកតវ៉ាបានកាន់បដាដែលសរសេរថា៖ “យើងនឹងមិនបោះឆ្នោតឲ្យគណបក្សនយោបាយណាដែលអនុម័តសេចក្តីព្រាងច្បាប់ស្តីពីសមាគមនិងអង្គការមិនមែនរដ្ឋាភិបាលនោះទេ” និង “និយាយថាទេ ចំពោះច្បាប់ស្តីពីសហជីព សមាគម និងអង្គការមិនមែនរដ្ឋាភិបាល”។ អ្នកទាំងនោះក៏បានស្រែកនូវពាក្យស្លោក និងច្រៀងចម្រៀងជាច្រើន ជំទាស់នឹងច្បាប់ស្តីពីសមាគមនិងអង្គការមិនមែនរដ្ឋាភិបាល។ គណកម្មាធិកាអចិន្ត្រៃយ៍នៃរដ្ឋសភា គ្រោងនឹងជួបប្រជុំនាថ្ងៃនេះ ដើម្បីសម្រេចថា គណៈកម្មការនៃរដ្ឋសភាណាមួយដែលត្រូវធ្វើការពិនិត្យលើសេចក្តីព្រាងច្បាប់នេះ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម ច្បាប់ ឬបទប្បញ្ញត្តិ
