ពលរដ្ឋសហគមន៍ជាច្រើន តវ៉ាជំទាស់នឹងការបណ្តេញចេញ និងជម្លោះដីធ្លី
ចេញផ្សាយ ថ្ងៃទី១១ ខែមករា ឆ្នាំ២០១៦
នៅថ្ងៃនេះ សហគមន៍ជាច្រើន បានប្រមូលផ្តុំគ្នានៅក្នុងខេត្តចំនួនបី ក្នុងប្រទេសកម្ពុជា ដើម្បីតវ៉ាជំទាស់នឹងការបណ្តេញចេញ និងអំពាវឲ្យមានការដោះស្រាយជម្លោះដីធ្លីរបស់អ្នកទាំងនោះ។
នៅក្នុងខេត្តកំពង់ស្ពឺ ប្រជាពលរដ្ឋសហគមន៍មកពីស្រុកឱរ៉ាល់ បានប្រមូលផ្តុំគ្នានៅមុខក្រុមហ៊ុន HLH Agriculture Co. ជាថ្ងៃទីមួយនៃគម្រោងក្នុងការតវ៉ាជាច្រើនថ្ងៃ ដើម្បីជំទាស់នឹងការរំលោភយកដីធ្លីដែលត្រូវបានប្រព្រឹត្តដោយក្រុមហ៊ុននេះចាប់តាំងពីឆ្នាំ ២០០៩។ ប្រជាពលរដ្ឋមួយក្រុមដែលមានសមាជិកប្រមាណ ១០០ នាក់ គ្រោងនឹងបន្តការតវ៉ារបស់អ្នកទាំងនោះចំនួនបីថ្ងៃបន្តទៀត។
រីឯនៅក្នុងការតវ៉ាដោយឡែកមួយផ្សេងទៀត ពលរដ្ឋប្រមាណ ៤០នាក់ មកពីសហគមន៍ឆ្នេរអូរឈើទាល ស្ពានឆេះ និងកំពេញចាស់ ក្នុងខេត្តព្រះសីហនុ បានប្រមូលផ្តុំគ្នានៅមុខសាលាខេត្ត ដើម្បីទាមទារឲ្យមានដំណោះស្រាយលើជម្លោះដីធ្លីរបស់អ្នកទាំងនោះ។
ចំណែកឯនៅក្នុងខេត្តបន្ទាយមានជ័យ ប្រជាពលរដ្ឋរងគ្រោះជាច្រើននាក់ក្នុងជម្លោះដីធ្លីមកពីសហគមន៍ផ្លូវរទេះភ្លើងនៅបោយប៉ែត បានបន្តការតវ៉ារបស់អ្នកទាំងនោះជំទាស់នឹងគម្រោងផ្លូវដែក ដែលនឹងមានផលប៉ះពាល់អវិជ្ជមានដល់ពលរដ្ឋជិត ១.០០០ គ្រួសារ នៅសង្កាត់ប៉ោយប៉ែត និងផ្សារកណ្តាល ក្នុងក្រុងប៉ោយប៉ែត។ លោក ឆេង ប៊ុនហាក់ ជាសកម្មជនម្នាក់ក្នុងចំណោមអ្នកទាំងនោះ ត្រូវបានចាប់ខ្លួន និងចោទប្រកាន់ពីបទញុះញង់ ក្រោយពេលមានការតវ៉ាមួយកាលពីថ្ងៃទី១៤ ខែធ្នូ ឆ្នាំ២០១៥។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
