នាព្រឹកនេះ សាលាដំបូងរាជធានីភ្នំពេញ បានផ្តន្ទាទោសសមាជិកយុវជនគណបក្សសង្គ្រោះជាតិចំនួនបីនាក់ ឲ្យជាប់ពន្ធនាគារចំនួន ប្រាំពីរឆ្នាំ ដោយសារអ្នកទាំងនោះបានចូលរួមតវ៉ា កាលពីថ្ងៃទី១៥ ខែកក្កដា ឆ្នាំ២០១៤ នៅទីលានប្រជាធិបតេយ្យ។

យុវជនទាំងបីនាក់ដែលរួមមាន៖ លោក យា ថុង លោក រឿន ចិត្រា និងលោក យន់ គីមហួរ ត្រូវបានចោទប្រកាន់ពីបទចូលរួមក្នុងចលនាកុបកម្ម តាមមាត្រា ៤៥៦ និង ៤៥៧។ ពេញមួយសវនាការ មេធាវីការពារជនជាប់ចោទ ត្រូវបានតុលាការរារាំង ដោយមិនឲ្យសាកសួរសាក្សីសំខាន់ៗ ហើយខាងអយ្យការមិនបានផ្តល់ភស្តុតាងគ្រប់គ្រាន់ដើម្បីគាំទ្រការចោទប្រកាន់របស់ស្ថាប័ននេះទេ។

យវជនទាំងបី ត្រូវបានឃុំខ្លួនចាប់តាំងពីខែសីហា ឆ្នាំ២០១៥។ អ្នកទាំងនោះ នឹងទៅរួមជាមួយអ្នកគាំទ្រ និងមន្ត្រីគណបក្សជំទាស់ ១១ នាក់ផ្សេងទៀត ដែលត្រូវបានតុលាការចោទប្រកាន់ពីបទកុបកម្ម ដូចគ្នា និងផ្តន្ទាទោសពី ៧ ដល់ ២០ ឆ្នាំ ពាក់ព័ន្ធនឹងការតវ៉ាដូចគ្នានៅខែកក្កដា ឆ្នាំ ២០១៥។