ឧទ្ធរណ៍តម្កល់ការផ្តទ្ទាទោសលើ លោក អ៊ុក ពេជ្រសំណាង សកម្មជនបក្សសង្គ្រោះជាតិ
ចេញផ្សាយ ថ្ងៃទី២០ ខែកក្កដា ឆ្នាំ២០១៦
នាព្រឹកនេះ សាលាឧទ្ធរណ៍រាជធានីភ្នំពេញ បានសម្រេចតម្កល់ការផ្តន្ទាទោសទៅលើ លោក អ៊ុក ពេជ្រសំណាង ដែលជាសកម្មជនគណបក្សសង្រ្គោះជាតិ នៅក្នុងសំណុំរឿងទាក់ទងទៅនឹងការតវ៉ាមួយកាលពី ខែតុលា ឆ្នាំ២០១៤ ដែលលោកបានរងរបួសដោយកងសន្តិសុខខណ្ឌដូនពេញ។
នៅខែកញ្ញា ឆ្នាំ២០១៥ សំណុំរឿងរបស់លោក សំណាង ត្រូវបានតុលាការបើកសវនាការ ហើយលោកត្រូវបានផ្តន្ទាទោសពីបទ ប្រើប្រាស់អំពើហិង្សាដោយចេតនា និងរារាំងមន្រី្តរាជការសាធារណៈ។ លោកត្រូវបានផ្តន្ទាទោសឲ្យជាប់ពន្ធនាគារពីរឆ្នាំ នៅក្នុងសេចក្ដីសម្រេចមួយដែលមិនប្រក្រតីដោយសារខ្វះខាតភស្តុតាង និងការផ្តល់សក្ខីកម្មរបស់សាក្សីមានលក្ខណៈមិនស៊ីចង្វាក់គ្នា។
អំឡុងពេលសវនាការឧទ្ធរណ៍ ដែលត្រូវបានធ្វើឡើងកាលពីថ្ងៃទី៣០ ខែមិថុនា ឆ្នាំ២០១៦ លោក សំណាង បានព្យាយាមជំទាស់ទៅនឹងការផ្តន្ទាទោសរបស់លោកជាច្រើនដង និងបដិសេធក្នុងការប្រព្រឹត្តអំពើហិង្សា ហើយលោកមិនសង្ឃឹមថាសាលាឧទ្ធរណ៍នឹងសម្រេចទៅតាមសំណើររបស់លោកនោះទេ។ ជាថ្មីម្ដងទៀត ការផ្តល់សក្ខីកម្មរបស់សាក្សីមិនមានភាពស៊ីចង្វាក់គ្នា ហើយមានភស្តុតាងបន្តិចបន្តួចប៉ុណ្ណោះដែលត្រូវបានលើកឡើង ដើម្បីគាំទ្រទៅលើសេចក្ដីសម្រេចរបស់តុលាការ។
លោក អ៊ុក ពេជ្រសំណាង ត្រូវបានឃុំខ្លួន អស់រយៈពេលមួយឆ្នាំគត់ ដោយគិតត្រឹមថ្ងៃនេះ។ លោក ត្រូវបានឃុំខ្លួនជាមួយនឹងសមាជិក និងសកម្មជនគណបក្សជំទាស់ ១៧នាក់ ផ្សេងទៀត ដែលត្រូវបានឃុំខ្លួនក្នុងរយៈពេលមួយឆ្នាំចុងក្រោយនេះ។
- ឯកសារទាក់ទង
- ចំណងជើង & មូលបទ
- អំពើនៅទីលានប្រជាធិបតេយ្យ ២០១៤ សិទ្ធិដីធ្លី
