សកម្មជនដែលរងរបួសអំឡុងពេលតវ៉ារឿងដីធ្លី ត្រូវបានផ្តន្ទាទោសដាក់ពន្ធនាគាររយៈពេល ២ឆ្នាំ
ចេញផ្សាយ ថ្ងៃទី១០ ខែកញ្ញា ឆ្នាំ២០១៥
នាព្រឹកនេះ លោក អ៊ុក ពេជ្រសំណាង ត្រូវបានផ្តន្ទាទោសពីបទហិង្សាដោយចេតនា និងរារាំងមន្ត្រីរាជការសាធារណៈ ហើយដាក់ឲ្យជាប់ពន្ធនាគារចំនួន ២ឆ្នាំ បន្ថែមលើការជាប់ពន្ធនាគារពីមុន ពាក់ព័ន្ធនឹងការតវ៉ាកាលពីថ្ងៃទី២០ ខែតុលា ឆ្នាំ២០១៤ ទោះបីជាមានសក្ខីកម្មផ្ទុយ និងកង្វះខាតភស្តុតាងក៏ដោយ។
លោក ត្រូវបានចាប់ខ្លួន ក្រោយពេលមានការតវ៉ានៅក្បែរគេហដ្ឋានសម្តេចនាយករដ្ឋមន្ត្រី នៅពេលដែលសហគមន៍មកពីខេត្តព្រះវិហារ បានអំពាវនាវស្វែងរកដំណោះស្រាយលើជម្លោះដីធ្លីរបស់អ្នកទាំងនោះ។ នគរបាល បានចាប់ខ្លួនលោក នៅពេលលោកកំពុងរងរបួសដោយការវាយដំរបស់កងសន្តិសុខក្នុងអំឡុងពេលតវ៉ា ដែលនៅពេលនោះ ក៏មានអ្នកតវ៉ាមួយចំនួនផ្សេងទៀត បានរងរបួសផងដែរ ដោយក្នុងនោះមានម្នាក់ត្រូវបានបញ្ជូនទៅកាន់មន្ទីរពេទ្យ។ ចំពោះការប្រើប្រាស់កម្លាំងហួសហេតុក្នុងការបំបែកអ្នកតវ៉ាទាំងនោះ មិនមាននរណាម្នាក់ បានប្រឈមមុខនឹងនីតិវិធីច្បាប់នោះទេ។
អំឡុងពេលសវនាការរបស់លោកសំណាងថ្មីនេះ មិនមានដើមបណ្តឹង ឬសាក្សីណាម្នាក់ រួមទាំងប្រធានកងសន្តិសុខខណ្ឌដូនពេញ ផ្តល់សក្ខីកម្មបង្ហាញថា លោក អ៊ុក ពេជ្រសំណាង ប្រើប្រាស់អំពើហិង្សានោះទេ។ ម៉្យាងទៀត ដើមបណ្តឹងបីនាក់ផ្សេងទៀត បាននិយាយថា លោកសំណាងមិនមែនជាអ្នកបង្កឲ្យអ្នកទាំងបីរងរបួសនោះទេ។ ក៏ប៉ុន្តែលោក ត្រូវបានផ្តន្ទាទោសតាមមាត្រា ២១៨ និង៥០៣ នៃក្រមព្រហ្មទណ្ឌ និងពិន័យជាប្រាក់ ៤លាន រៀល និងសំណងការខូចខាតជូនដើមបណ្តឹងចំនួន ១០ លានរៀល។
លោក អ៊ុក ពេជ្រសំណាង ស្ថិតក្នុងចំណោមសកម្មជន និងអ្នកគាំទ្រគណបក្សសង្គ្រោះជាតិទាំង ១១នាក់ ដែលត្រូវបានផ្តន្ទាទោសពីបទល្មើសពាក់ព័ន្ធនឹងការធ្វើកុបកម្ម បន្ទាប់ពីមានការតវ៉ាមួយផ្សេងទៀត នៅថ្ងៃទី១៥ ខែកក្កដា ឆ្នាំ២០១៤។ លោក បានជាប់ពន្ធនាគារនៅ ម១ ចាប់តាំងពីមានការផ្តន្ទាទោសអ្នកទាំងនោះកាលពីថ្ងៃទី២១ ខែកក្កដា ឆ្នាំ២០១៥ បន្ទាប់ពីមានសវនាការដែលមិនប្រក្រតីរួចមក។ ប្រសិនបើបូកជាមួយនឹងការសម្រេចសេចក្តីនាថ្ងៃនេះ លោកសំណាងត្រូវបានកំណត់ឲ្យជាប់ពន្ធនាគារសរុបទាំងអស់ចំនួន ៩ឆ្នាំ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
