លោក គឹម សុខ អ្នកវិភាគនយោបាយត្រូវបានចោទប្រកាន់និងបញ្ជូនទៅឃុំខ្លួនបណ្ដោះអាសន្នរង់ចាំសវនាការ
ចេញផ្សាយ ថ្ងៃទី១៧ ខែកុម្ភៈ ឆ្នាំ២០១៧
នារសៀលនេះ អ្នកវិភាគនយោបាយ លោក គឹម សុខ ត្រូវបានចោទប្រកាន់ពីបទញុះញង់និងបទបរិហាកេរ្ដិ៍ ពាក់ព័ន្ធនឹងបណ្ដឹងដែលទើបតែប្ដឹងឡើងដោយសម្ដេចនាយករដ្ឋមន្រ្តី ហ៊ុន សែន រយៈពេល៥ថ្ងៃ។
លោកត្រូវបានចៅក្រមសាលាដំបូងរាជធានីភ្នំពេញ លោក រស់ ពិសិដ្ឋ សម្រេចចោទប្រកាន់ និងបញ្ជូនទៅឃុំខ្លួនបណ្ដោះអាសន្នរង់ចាំសវនាការ បន្ទាប់ពីព្រះរាជអាជ្ញានៃសាលាដំបូងរាជធានីភ្នំពេញ លោក សៀង សុខ បានសាកសួរលោកអស់ជាច្រើនម៉ោង។ នេះជាសំណុំរឿងទី១ ក្នុងចំណោមបណ្ដឹងចំនួន២ ដែលសម្ដេចនាយករដ្ឋមន្រ្តីបានប្ដឹងប្រឆាំងនឹងរូបលោក ពាក់ព័ន្ធនឹងការអត្ថាធិប្បាយរបស់លោកអំពីឃាតកម្មលើលោកបណ្ឌិត កែម ឡី ដែលត្រូវបានឃាតករបាញ់សម្លាប់ កាលពីខែកក្កដា ឆ្នាំ២០១៦។ បណ្ដឹងទី២ ដែលចោទប្រកាន់លោកពីបទញុះញង់និងបទបរិហារកេរ្តិ៍ដូចគ្នា ត្រូវបានធ្វើឡើង បន្ទាប់ពីលោក គឹម សុខ បានពន្យល់បកស្រាយនៅក្នុងវិទ្យុអំពីការអត្ថាធិប្បាយរបស់លោកកាលពីពេលមុន។ ការផ្តន្ទាទោសពីបទញុះញង់តម្រូវឲ្យមានការដាក់ទោសជាប់ពន្ធនាគារចន្លោះពី ៦ខែ ទៅ ២ឆ្នាំ។ សម្ដេចនាយករដ្ឋមន្រ្តីក៏បានទាមទារសំណងពីរូបលោកចំពោះបណ្ដឹងទាំងពីរនេះ ដែលគិតជាទឹកប្រាក់សរុបចំនួនប្រមាណជា ២ ០១០ ០០០ ០០០ រៀល (ពីរពាន់ដប់លានរៀល) ផងដែរ។
ប្រជាពលរដ្ឋប្រមាណជា២៥០នាក់ បានប្រមូលផ្ដុំគ្នានៅខាងក្រៅតុលាការដើម្បីធ្វើការគាំទ្រលោក គឹម សុខ នាព្រឹកនេះ។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម
