សំណើរសុំក្រៅឃុំរបស់អតីតអ្នកកាសែតវិទ្យុអាស៊ីសេរី ត្រូវបានបដិសេធ
ចេញផ្សាយ ថ្ងៃទី១៦ ខែមីនា ឆ្នាំ២០១៨
ក្នុងសវនាការនាថ្ងៃនេះ សំណើរសុំនៅក្រៅឃុំរបស់លោក យាង សុធារិន និងលោក អ៊ួន ឈិន អតីតអ្នកកាសែតវិទ្យុអាស៊ីសេរី ត្រូវបានតុលាការកំពូលបដិសេធ។ ដោយបានប្រកាសតំកល់សេចក្តីសម្រេចរបស់សាលាឧទ្ធរណ៍ ឲ្យបន្តការឃុំខ្លួនបណ្តោះអាសន្នរង់ចាំសវនាការលើអ្នកទាំងពីរ ប្រធានក្រុមប្រឹក្សាជំនុំជម្រះ លោកចៅក្រម ឃឹម ប៉ុន បានអះអាងថា ការស៊ើបអង្កេត កំពុងបន្តដំណើរការ ហើយថាការដោះលែងអ្នកទាំងពីរ អាចនឹងបណ្តាលឲ្យមានការ “ខូចខាតធ្ងន់ធ្ងរ”។
លោក សុធារិន និង លោក ឈីន ត្រូវបានអាជ្ញាធរចាប់ខ្លួនកាលពីថ្ងៃទី១៤ ខែវិច្ឆិកា និងចោទប្រកាន់ពីបទ “ប្រគល់ឲ្យរដ្ឋបរទេសនូវព័ត៌មានជាអាទិ៍”។ អ្នកទាំងពីរ បានជាប់ក្នុងពន្ធនាគារអស់រយៈពេល ១១៨ ថ្ងៃហើយ នៅក្នុងពន្ធនាគារ ម១ ដែលកំពុងមានស្ថានភាពចង្អៀតណែន។
អ្នកទាំងពីរ ធ្លាប់បានបម្រើការងារឲ្យវិទ្យុអាស៊ីសេរីជាភាសាខ្មែរ រហូតដល់ស្ថាប័នព័ត៌មានដែលមានទីស្នាក់ការកណ្តាលនៅសហរដ្ឋអាមេរិកមួយនេះ បានបិទការិយាល័យនៅទីក្រុងភ្នំពេញរបស់ខ្លួន កាលពីថ្ងៃទី១២ ខែតុលា ឆ្នាំ២០១៧ ដោយអះអាងថាបានទទួលការគាបសង្កត់ពីអាជ្ញាធររដ្ឋ និងត្រូវបង្ខំចិត្តបិទការផ្សាយរបស់ខ្លួនតាមវិទ្យុនាពេលនោះ។
អ្នកទាំងពីរ ត្រូវបានចោទប្រកាន់ដោយយោងតាមមាត្រា ៤៤៥ នៃក្រមព្រហ្មទណ្ឌ ពាក់ព័ន្ធនឹងការផ្តល់ព័ត៌មានដល់រដ្ឋ ឬភ្នាក់ងារបរទេស ដែលអាច “អន្តរាយដល់ការការពារជាតិ”។ ប្រសិនបើអ្នកទាំងពីរត្រូវបានតុលាការផ្តន្ទាទោស នោះអ្នកទាំងពីរនឹងប្រឈមមុខនឹងការជាប់ពន្ធនាគារពី ៧ ឆ្នាំ ដល់១៥ ឆ្នាំ។ កាលបរិច្ឆេទនៃសវនាការលើអង្គសេចក្តី នៅមិនទាន់ត្រូវបានប្រកាសនោះទេ។
- ឯកសារទាក់ទង
- ចំណងជើង & មូលបទ
- វាយប្រហារលើអ្នកសារព័ត៌មាន និងបញ្ហាប្រព័ន្ធផ្សព្វផ្សាយ
