មនុស្សដែលត្រូវបានចាប់ខ្លួនទាំង ២៣ នាក់ ត្រូវបានបញ្ជាក់ថា ត្រូវបានឃុំខ្លួននៅពន្ធនាគារ ត្រពាំងថ្លុង
ចេញផ្សាយ ថ្ងៃទី៨ ខែមករា ឆ្នាំ២០១៤
នៅម៉ោង ១០ ព្រឹកនេះ លោកស្រី ចៅក្រម សែម សក្តិកូឡា ដែលជាចៅក្រមស៊ើបសួរសាលាដំបូងរាជធានីភ្នំពេញ បានទូរស័ព្ទប្រាប់ក្រុមមេធាវីអង្គការ លីកាដូ បញ្ចាក់ថាជនជាប់ចោទដែលអង្គការលីកាដូ បានការពារ ចំនួន ៦ នាក់ ដែលត្រូវបានចាប់ខ្លួន និងត្រូវបានចោទប្រកាន់នៅអំឡុងពេលនៃការបង្ក្រាបដោយហិង្សាទៅលើកម្មករដែលជាបាតុករនៅក្បែរសួនឧស្សាហកម្មកាណាឌីយ៉ាតាមបណ្តោយផ្លូវ វេង ស្រេង កាលពីសប្តាហ៍មុន ត្រូវបានឃុំខ្លួននៅមណ្ឌលអប់រំកែប្រែទី៣ (ពន្ធនាគារ ម៣) នៅត្រពាំងថ្លុង ខេត្តកំពង់ចាម។ អ្នកទាំងប្រាំមួយ រួមមាន លោក វន់ ពៅ ដែលជាប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) លោក ថេង សាវឿន អ្នកសម្របសម្រួលនៃសម្ព័ន្ធសហគមន៍កសិករកម្ពុជា (CCFC) និង លោក ច័ន្ទ ពុទ្ធិស័ក ដែលជាសកម្មជនដីធ្លីមកពីតំបន់បឹងកក់។
ប្រធានពន្ធនាគារ ក៏បានអនុញ្ញាតឲ្យក្រុមគ្រូពេទ្យអង្គការ លីកាដូ ចូលព្យាបាលអ្នកទាំង ២៣ នាក់ នៅរសៀលនេះ។ ពន្ធនាគារ ម៣ គឺជាពន្ធនាគារដែលដាច់ស្រយាលមួយនៃភាគឥសាននៃរាជធានីភ្នំពេញ ហើយដែលត្រូវចំណាយពេល ២ ម៉ោង ដោយចេញដំណើរពីក្រុងកំពង់ចាម។ គិតត្រឹមខែធ្នូ ឆ្នាំ២០១៣ មណ្ឌលអប់រំកែប្រែទី៣ (ពន្ធនាគារ ម៣) ផ្ទុកអ្នកទោសចំនួន ១.៤៩៦នាក់។
