តុលាការកំពូល តំកល់សាលដីកាផ្តន្ទាទោសលើសកម្មជនចលនាមាតាធម្មជាតិ
ចេញផ្សាយ ថ្ងៃទី១៣ ខែកក្កដា ឆ្នាំ២០១៨នាព្រឹកនេះ តុលាការកំពូល បានតំកល់សាលដីកាផ្តន្ទាទោសលោក សាន់ ម៉ាឡា លោក ទ្រី សុវិគា និងលោក ស៊ីម សំណាង ដែលជាអតីតសកម្មជនបីរូបរបស់អង្គការមាតាធម្មជាតិដែលបច្ចុប្បន្នត្រូវបានលុបឈ្មោះចេញពីបញ្ជីរបស់ក្រសួងមហាផ្ទៃ។ អ្នកទាំងបី ត្រូវបានចាប់ខ្លួនកាលពីបីឆ្នាំមុន នៅថ្ងៃទី១៧ ខែសីហា ឆ្នាំ២០១៥ នៅខណៈដែលអ្នកទាំងនោះកំពុងធ្វើយុទ្ធនាការអំពាវនាវឲ្យបញ្ឈប់ការបូមខ្សាច់ដោយខុសច្បាប់នៅខេត្តកោះកុង។
សកម្មជនទាំងបីរូប បានចូលខ្លួនក្នុងសវនាការរបស់សាលាដំបូងខេត្តកោះកុង ក្នុងនាមជាជនជាប់ចោទ ពីបទល្មើសគម្រាមកំហែងថានឹងធ្វើឲ្យខូចខាតដែលភ្ជាប់មកនូវបញ្ជាអ្វីមួយ យោងតាមមាត្រា ៤២៤ នៃក្រមព្រហ្មទណ្ឌ។ ប៉ុន្តែចៅក្រមជំនុំជម្រះ បានផ្លាស់ប្តូរបទចោទប្រកាន់នៅនាទីចុងក្រោយ ដោយផ្តន្ទាទោសអ្នកទាំងនោះ ក្រោមបទចោទថាជាអ្នកផ្តើមគំនិតក្នុងការប្រព្រឹត្តិអំពើល្មើសនេះ។ សាលក្រមរបស់សាលាដំបូងខេត្តកោះកុង ក្រោយមកត្រូវបានសាលាឧទ្ធរណ៍សម្រេចតំកល់ទុកជាបានការ។ សវនាការតុលាការកំពូល កាលពីថ្ងៃសុក្រមុន បានបន្តរំលោភបំពានលើសិទិ្ធទទួលបានការជំនុំជម្រះក្តីដោយយុត្តិធម៌ ដោយភាគីទទួលបន្ទុកនៃការដាក់ភស្តុតាងត្រូវបានតុលាការផ្លាស់ប្តូរ ហើយមិនមានភស្តុតាងណាមួយត្រូវបានលើកមកបង្ហាញដោយព្រះរាជអាជ្ញានោះទេ។
តុលាការកំពូល បានសម្រេចតំកល់ការផ្តន្ទាទោសអ្នកទាំងបីរយៈពេល ១៨ខែ ដោយព្យួរទោសរយៈពេល ប្រហែល ៨ខែ។ យោងតាមសេចក្តីសម្រេចនេះ សកម្មជនទាំងបីនឹងបន្តស្ថិតក្នុងហានិភ័យនៃការអនុវត្តទោសពន្ធនាគារដែលនៅសល់ ប្រសិនបើអ្នកទាំងបីត្រូវបានតុលាការផ្តន្ទាទោសពីបទល្មើសផ្សេងទៀត ក្នុងរយៈពេល ៥ឆ្នាំក្រោយ។ អ្នកទាំងបី ក៏ត្រូវបានតុលាការបង្គាប់ឲ្យសងសំណងជាទឹកប្រាក់ ១០០ លានរៀល (២៥.០០០ ដុល្លារអាមេរិក) ទៅភាគីដើមបណ្តឹង និងពិន័យជាប្រាក់ ២លានរៀល (៥០០ដុល្លារអាមេរិក) ចូលរដ្ឋ។ យោងតាមច្បាប់កម្ពុជា ការខកខានមិនបានបង់ប្រាក់ខាងលើ នឹងអាចឲ្យអ្នកទាំងបីបន្តជាប់ក្នុងពន្ធនាគារ។
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម មាតាធម្មជាតិ