សហគមន៍បឹងកក់ធ្វើពិធីសាសនាបួងសួង សូមឱ្យដោះលែងអ្នកស្រី ទេព វន្នី
ចេញផ្សាយ ថ្ងៃទី១៥ ខែសីហា ឆ្នាំ២០១៨
សហគមន៍នៅក្នុងរាជធានីភ្នំពេញមួយចំនួន គ្រោងនឹងធ្វើពិធីសាសនាដោយអុជទៀនបួងសួង នៅសហគមន៍បឹងកក់ នៅល្ងាចថ្ងៃពុធស្អែកនេះ ដើម្បីបួងសួងសុំឱ្យមានការដោះលែងសកម្មជនដីធ្លីដ៏មានប្រជាប្រិយភាព និងជាអ្នកការពារសិទ្ធិមនុស្ស គឺអ្នកស្រី ទេព វន្នី ដែលត្រូវបានឃុំខ្លួនក្នុងពន្ធនាគារអស់រយៈពេល២ឆ្នាំ។
អ្នកស្រី ទេព វន្នី ត្រូវបានចាប់ខ្លួននៅថ្ងៃទី១៥ ខែសីហា ឆ្នាំ២០១៦ និងត្រូវបានចោទប្រកាន់ ដោយសារអ្នកស្រីចូលរួមក្នុងការតវ៉ាអហិង្សាមួយ ដើម្បីគាំទ្រអ្នកការពារសិទ្ធិមនុស្ស៥នាក់ដែលកំពុងជាប់ឃុំ នាពេលនោះ។ ក្រោយមក អ្នកស្រីត្រូវបានរកឃើញថាមានពិរុទ្ធពី “បទប្រមាថមន្រ្តីរាជការសាធារណៈ” និងត្រូវបានផ្ដន្ទាទោសដាក់ពន្ធនាគារ៦ថ្ងៃ។ នេះមិនមែនជាលើកទីមួយទេ ដែលអ្នកស្រីត្រូវបានផ្ដន្ទាទោសដាក់ពន្ធនាគារ ដោយសារតែការចូលរួមរបស់អ្នកស្រីក្នុងការតវ៉ាដោយអហិង្សា ដើម្បីជំទាស់ទៅនឹងការរំលោភយកដីធ្លី និងការរំលោភសិទ្ធិផ្សេងៗ។
ខណៈពេលអ្នកស្រីត្រូវបានឃុំខ្លួន សំណុំរឿងចាស់ៗចំនួន៣ដែលអសកម្មអស់រយៈពេលយូរមកហើយពាក់ព័ន្ធនឹងការតវ៉ាដោយសន្ដិវិធីផ្សេងទៀត ត្រូវបានសើរើ ហើយស្រ្តីដែលមានកូនពីរនាក់ក្នុងបន្ទុកនេះ កំពុងអនុវត្តទោសជាប់ពន្ធនាគារ៣០ខែ។
កាលពីឆ្នាំមុន ក្រុមសង្គមស៊ីវិលនិងអ្នកឃ្លាំមើលអន្តរជាតិមួយចំនួន បានចូលរួមជាមួយប្រជាសហគមន៍រាប់រយនាក់ ដោយបានធ្វើពិធីបួងសួងមួយ ស្នើសុំឱ្យមានការដោះលែងអ្នកស្រី ទេព វន្នី។ សមាជិកសហគមន៍បឹងកក់ក៍បានដាក់ញត្តិ ទៅស្ថានទូត និងអង្គការអន្តរជាតិមួយចំនួនផងដែរ។
ទីតាំងប្រារព្ធពិធីបួងសួង៖ ផ្លូវលេខ១៨១b ផ្លូវលេខ៨៦ ភូមិ២២ សង្កាត់ស្រះចក ខណ្ឌ ដូនពេញ រាជធានីភ្នំពេញ
ពេលវេលា៖ ចាប់ពីម៉ោង៥ល្ងាចតទៅ
ព័ត៌មានបន្ថែមសូមទាក់ទង៖
លោក ច័ន្ទ ពុទ្ធិស័ក្ដ, ទូរស័ព្ទលេខ ០១២ ៩១០ ០២៣
អ្នកស្រី បូវ សោភា, ទូរស័ព្ទលេខ ០៨៥ ៤៦២ ២២២
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទ្ធិដីធ្លី
