តំណាងសហគមន៍នៅខេត្តព្រះវិហារដែលបាត់ខ្លួន ត្រូវបានរកឃើញ
ចេញផ្សាយ ថ្ងៃទី១ ខែមេសា ឆ្នាំ២០១៩
លោក ស៊ុម ម៉ឺន តំណាងសហគមន៍នៅខេត្តព្រះវិហារដែលបានបាត់ខ្លួនអស់រយៈពេលជាង២ខែ ត្រូវបានក្រុមគ្រួសាររកឃើញនៅខេត្តព្រះសីហនុ។
លោក ស៊ុម ម៉ឺន បានបាត់ខ្លួននៅការិយាល័យដែនជម្រកសត្វព្រៃគូលែនព្រហ្មទេព កាលពីថ្ងៃទី២១ ខែមករា ឆ្នាំ២០១៩ គឺមួយថ្ងៃបន្ទាប់ពីលោកត្រូវបានចាប់ខ្លួននិងទទួលរងអំពើហិង្សាដោយក្រុមទាហានដែលត្រូវបានជួលឱ្យធ្វើជាសន្ដិសុខការពារដីសម្បទាន ដែលក្រុមហ៊ុនមេត្រីភាពកសិ-ឧស្សាហកម្មទទួលបាន ស្ថិតក្នុងឃុំយាង ស្រុកជាំក្សាន្ត។ ដីសម្បទាននេះមានជាប់ពាក់ព័ន្ធជាមួយលោកឧកញ៉ា អាន ម៉ាឌី។
តំណាងសហគមន៍រូបនេះត្រូវបានឃើញលើកចុងក្រោយដោយកូនប្រុសរបស់លោកឈ្មោះ ម៉ឺន មាន ដែលត្រូវបានចាប់ខ្លួនជាមួយគ្នា។ លោកបានចាកចេញពីខេត្តព្រះវិហារក្នុងខែមករា ដោយសារមានការភ័យខ្លាចពីសុវត្ថិភាពផ្ទាល់ខ្លួន។ អាជ្ញាធរខេត្តព្រះវិហារបានចេញសេចក្ដីប្រកាសព័ត៌មានកាលពីថ្ងៃទី៣១ ខែមីនា ថ្មីៗនេះ ដោយបញ្ជាក់ថា អាជ្ញាធរបានជួបជាមួយលោក ស៊ុម ម៉ឺន នៅរាជធានីភ្នំពេញ នៅថ្ងៃចុងសប្ដាហ៍។
លោកអភិបាលស្រុកជាំក្សាន្ត បានជួបជាមួយលោក ស៊ុម ម៉ឺន នៅភ្នំពេញ និងបានមានប្រសាសន៍ថា ដីកាចាប់ខ្លួនចំពោះតំណាងសហគមន៍រូបនេះ ដែលត្រូវបានចេញភ្លាមៗក្រោយពីការបាត់ខ្លួនរបស់លោក នឹងមិនត្រូវបានអនុវត្តនោះទេ។
ការបាត់ខ្លួនរបស់លោក ស៊ុម ម៉ឺន បានកើតឡើង ខណៈពេលដែលមានការចាប់ខ្លួនជាបន្តបន្ទាប់រហូតដល់មានមនុស្ស១៤នាក់ ត្រូវបានបញ្ជូនទៅឃុំខ្លួនបណ្ដោះអាសន្នរង់ចាំសវនាការ ដែលក្នុងនោះមានកូនប្រុសរបស់លោកផងដែរ។ អ្នកទាំងនោះត្រូវបានចោទប្រកាន់តាមបញ្ញត្តិមាត្រា៦២ និងមាត្រា៥៤ នៃច្បាប់ស្ដីពីតំបន់ការពារធម្មជាតិ ពាក់ព័ន្ធនឹងការកាប់ឆ្ការព្រៃ ដោយត្រូវប្រឈមនឹងការជាប់ពន្ធនាគាររហូតដល់១០ឆ្នាំ និងពិន័យជាប្រាក់ចំនួន១៥០លានរៀល។
ការចាប់ខ្លួនទាំងនេះ ធ្វើឡើងបន្ទាប់ពីមានការធ្វើទុក្ខបុក្ខម្នេញពីសំណាក់អាជ្ញាធរអស់ជាច្រើនឆ្នាំ ដែលក្នុងនោះរួមមាន ការដុតកម្ទេចផ្ទះ ការចាប់ខ្លួនដោយមិនត្រឹមត្រូវ ក៏ដូចជាការបន្តគំរាមកំហែងទៅលើអ្នកភូមិ ដែលជាប់គាំងនឹងទំនាស់ដីធ្លីនេះ។
- ឯកសារទាក់ទង
- ចំណងជើង & មូលបទ
- សិទ្ធិដីធ្លី
