ប្រធានសហជីពនៅណាហ្គាវើលដ៍ ត្រូវបានអនុញ្ញាតឱ្យចូលធ្វើការវិញ បន្ទាប់ពីបុគ្គលិករាប់ពាន់នាក់ធ្វើកូដកម្ម
ចេញផ្សាយ ថ្ងៃទី១០ ខែមករា ឆ្នាំ២០២០
ក្រុមហ៊ុនណាហ្គាវើលដ៍ បានសម្រេចយកប្រធានសហជីពដែលត្រូវបានព្យួរការងារ កញ្ញា ឈឹម ស៊ីថរ ចូលធ្វើការវិញ បន្ទាប់ពីមានការធ្វើកូដកម្មរយៈពេល២ថ្ងៃដែលចូលរួមដោយបុគ្គលិករាប់ពាន់នាក់ នៅខាងមុខកាស៊ីណូ ណាហ្គាវើលដ៍ ក្នុងរាជធានីភ្នំពេញ។ នាល្ងាចនេះ តំណាងក្រុមហ៊ុន ក៏បានប្រាប់បុគ្គលិកដែលជួបជុំគ្នាថា ក្រុមហ៊ុននឹងចរចាតំឡើងប្រាក់ឈ្នួលអប្បរមាសម្រាប់បុគ្គលិក នៅពេលក្រោយទៀត។ បុគ្គលិកទាំងនេះត្រូវបានរំពឹងថានឹងត្រឡប់ចូលធ្វើការវិញនៅថ្ងៃស្អែកនេះ។
ការព្រមព្រៀងនេះធ្វើឡើងបន្ទាប់ពីតំណាងសហជីពរួមមាន កញ្ញា ឈឹម ស៊ីថរ ដែលបានជួបជាមួយតំណាងក្រុមហ៊ុនណាហ្គាវើលដ៍ និងមន្រ្តីជាន់ខ្ពស់មកពីក្រសួងការងារ និងបណ្ដុះបណ្ដាលវិជ្ជាជីវៈ ដើម្បីចរចារកដំណោះស្រាយ។ កញ្ញាត្រូវបានព្យួរការងារដោយទទួលបានប្រាក់ឈ្នួលចាប់ពីខែកញ្ញា ឆ្នាំ២០១៩ អំឡុងពេលធ្វើយុទ្ធនាការស្នើសុំតំឡើងប្រាក់ឈ្នួលអប្បរមា និងលក្ខខណ្ឌការងារប្រសើរជាងមុន។
នាព្រឹកនេះ បុគ្គលិកណាហ្គាវើលដ៍រាប់រយនាក់រួមមាន អ្នកសម្អាត និងអ្នកបម្រើការផ្នែកអាហារ ក៏បានដើរចេញពីក្រុមហ៊ុនចូលរួមជាមួយអ្នកតវ៉ារាប់ពាន់នាក់ផ្សេងទៀតផងដែរ ក្នុងការធ្វើកូដកម្មដោយអហិង្សាថ្ងៃទី២នេះ ដើម្បីទាមទារប្រាក់ឈ្នួលអប្បរមា និងលក្ខខណ្ឌការងារប្រសើរជាងមុន ក៏ដូចជាទាមទារឱ្យប្រធានសហជីពរបស់អ្នកទាំងនោះអាចចូលធ្វើការដូចដើមវិញ។
កាលពីម្សិលមិញ សាលាដំបូងរាជធានីភ្នំពេញ បានចេញដីកាសម្រេចចាត់ចែងបណ្ដោះអាសន្នដោយប្រកាសថា ការធ្វើកូដកម្មនេះខុសច្បាប់ និងបង្គាប់ឱ្យកូដករចូលធ្វើការវិញ ទោះបីជាសិទ្ធិធ្វើកូដកម្មរបស់បុគ្គលិកទាំងនេះត្រូវបានធានាដោយច្បាប់កម្ពុជា និងអនុសញ្ញារបស់អង្គការពលកម្មអន្តរជាតិក៏ដោយ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម សិទ្ធិការងារ
