សកម្មជនចំនួន ១០នាក់ ដែលកំពុងជាប់ឃុំក្នុងពន្ធនាគារ ត្រូវបានផ្ដន្ទាទោសពីបទញុះញង់ ដោយសារការងារសន្ដិវិធីរបស់ពួកគេ
ចេញផ្សាយ ថ្ងៃទី២៦ ខែតុលា ឆ្នាំ២០២១នាថ្ងៃនេះ សាលាដំបូងរាជធានីភ្នំពេញ បានសម្រេចផ្ដន្ទាទោស សកម្មជនសង្គម សកម្មជននយោបាយ និងយុវជន ដែលកំពុងជាប់ឃុំ ឱ្យជាប់ពន្ធនាគារចំនួន ២០ខែ និងពិន័យជាប្រាក់ម្នាក់ៗចំនួន ២លានរៀល (ប្រមាណ ៥០០ដុល្លារ) ពីបទញុះញង់ តាមបញ្ញត្តិមាត្រា៤៩៤ និងមាត្រា ៤៩៥ នៃក្រមព្រហ្មទណ្ឌ ។ អ្នកទាំងនេះ ត្រូវអនុវត្តទោសជាប់ពន្ធនាគារម្នាក់ៗពី ១៤ ទៅ ១៥ខែ ដោយទោសនៅសល់ផ្សេងទៀត ត្រូវបានព្យួរ ។ សកម្មជនទាំង១០នាក់ ដែលត្រូវបានឃុំខ្លួនក្នុងពន្ធនាគារអស់រយៈពេលជាងមួយឆ្នាំ នឹងត្រូវដោះលែងឱ្យមានសេរីភាពវិញ នៅខែវិច្ឆិកា ឆ្នាំ២០២១ ខាងមុខនេះ ។ ទោះបីជាយ៉ាងណា អ្នកទាំងនេះត្រូវបានដាក់ឱ្យស្ថិតក្រោមការព្យួរទោសសាកល្បងសម្រាប់រយៈពេល២ឆ្នាំ ដោយតម្រូវឱ្យពួកគេជូនដំណឹងទៅតុលាការ ប្រសិនបើពួកគេផ្លាស់ប្ដូរអាសយដ្ឋាន ផ្លាស់ប្ដូរការងារ ឬចង់ចាកចេញពីប្រទេស ព្រមទាំងលក្ខខណ្ឌផ្សេងទៀត ។ មនុស្សចំនួន ៤នាក់ ផ្សេងទៀត ក៏ត្រូវបានកាត់ទោសដោយកំបាំងមុខផងដែរ ។
សកម្មជនសង្គម និងយុវជន ដែលត្រូវបានផ្ដន្ទាទោស ភាគច្រើនជាសមាជិកចលនាខ្មែរថាវរៈ ក្នុងនោះរួមមានអ្នកស្រី ឈឿន ដារ៉ាវី លោក ហ៊ុន វណ្ណៈ លោក មាន ព្រហ្មមុន្នី ព្រះតេជព្រះគុណ កើត សារ៉ាយ លោក ថា ឡាវី លោក មួង សុភ័ក្រ និងកញ្ញា អេង ម៉ាឡៃ ។ អ្នកស្រី ដារ៉ាវី និងលោក វណ្ណៈ ត្រូវបានកាត់ទោសម្នាក់ៗ ឱ្យអនុវត្តទោសជាប់ពន្ធនាគារចំនួន ១៥ខែ ខណៈដែលអ្នកផ្សេងទៀត ត្រូវអនុវត្តទោសជាប់ពន្ធនាគារចំនួន ១៤ខែ ។ អ្នកទាំងនេះ ត្រូវបានចាប់ខ្លួន ក្នុងខែសីហា និងខែកញ្ញា ឆ្នាំ២០២០ ពាក់ព័ន្ធនឹងការជួបជុំគ្នាដោយសន្តិវិធីរបស់ពួកគេ នៅក្បែរតុលាការ ដើម្បីអំពាវនាវឱ្យមានការដោះលែង លោក រ៉ុង ឈុន ប្រធានសហជីព ដែលកំពុងត្រូវបានឃុំខ្លួនក្នុងពន្ធនាគារ និងនៅបន្តជាប់ពន្ធនាគារ បន្ទាប់ពីត្រូវបានផ្ដន្ទាទោសពីបទញុះញង់ កាលពីថ្ងៃទី១៨ ខែសីហា ឆ្នាំ២០២១ ។
នៅក្នុងសវនាការ ភាគច្រើនសកម្មជនទាំងនេះ ត្រូវបានសាកសួរថាតើពួកគេបានសុំការអនុញ្ញាត មុនពេលជួបជុំគ្នា ឬទេ និងថាតើពួកគេត្រូវបានមនុស្សនៅក្រៅប្រទេសលើកទឹកចិត្ត ឬជួលពួកគេឱ្យចូលរួមនៅក្នុងការអំពាវនាវដោយសន្តិវិធី ឱ្យមានការដោះលែងលោក រ៉ុង ឈុន ឬយ៉ាងណា ។ នៅក្នុងសេចក្ដីសន្និដ្ឋាន សកម្មជនជាច្រើនបានកត់សម្គាល់ថា ពួកគេគ្រាន់តែចូលរួមក្នុងការតវ៉ាដោយសន្តិវិធីតែប៉ុណ្ណោះ និងបានលើកឡើងពីស្ថានភាពលំបាកនៃភាពចង្អៀតណែននៅក្នុងពន្ធនាគារ ព្រមទាំងរិះគន់ថា សវនាការមិនមានភាពយុត្តិធម៌ ។
មនុស្សចំនួន ៣នាក់ផ្សេងទៀត រួមមានលោក ជុំ ពុទ្ធី លោក ឈួ ផេង និងលោក គង់ សំអាន ក៏ត្រូវបានចោទប្រកាន់ និងផ្ដន្ទាទោសនៅក្នុងសំណុំរឿងតែមួយនេះដែរ ។ អ្នកទាំង៣គឺជាអតីតសកម្មជន ឬសមាជិក នៃគណបក្សសង្គ្រោះជាតិ ដែលត្រូវបានរំលាយ ។ លោក ជុំ ពុទ្ធី និងលោក ឈួ ផេង ត្រូវអនុវត្តទោសជាប់ពន្ធនាគារចំនួន ១៥ខែ ខណៈដែលលោក គង់ សំអាន នឹងត្រូវអនុវត្តទោសចំនួន ១៤ខែ ។ លើសពីនេះ មនុស្ស៤នាក់ផ្សេងទៀត ត្រូវបានចោទប្រកាន់ដោយកំបាំងមុខ ក្នុងនោះរួមមាន លោក សេង ម៉េងប៊ុនរ៉ុង លោក ហូ វ៉ាន់ លោក អ៊ូ ចាន់រិទ្ធ និងលោក គង់ សុភា ។ លោក ម៉េងប៊ុនរ៉ុង ត្រូវបានរកឃើញថាមានពិរុទ្ធនៃបទញុះញង់ ខណៈដែលមនុស្ស៣នាក់ផ្សេងទៀត ត្រូវបានរកឃើញថាមានពិរុទ្ធនៃការផ្ដើមគំនិត តាមបញ្ញត្តិមាត្រា ២៨ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ ។ អ្នកទាំងនេះ ត្រូវបានកាត់ទោសឱ្យជាប់ពន្ធនាគារម្នាក់ៗចំនួន ២ឆ្នាំ ព្រមទាំងពិន័យជាប្រាក់ម្នាក់ៗចំនួន ៤លានរៀល ។ បទចោទប្រឆាំងនឹងលោក ហុង លីម ត្រូវបានទម្លាក់ចោល ។ ដីកាចាប់ខ្លួន ត្រូវបានចេញ សម្រាប់មនុស្សទាំង៤នាក់ ដែលត្រូវបានកាត់ទោសដោយកំបាំងមុខ ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ សិទ្ធិស្ត្រី