ក្រុមសង្គមស៊ីវិលបន្តដាក់ញត្តិដើម្បីសិទិ្ធសេរីភាព
ចេញផ្សាយ ថ្ងៃទី២៩ ខែមករា ឆ្នាំ២០១៤
នាព្រឹកនេះ សហជីព សមាគម សហគមន៍ និងក្រុមសង្គមស៊ីវិលមួយចំនួន បានដាក់ញត្តិទៅកាន់ស្ថានទូតចំនួន ៦ និងការិយាល័យអង្គការសហប្រជាជាតិចំនួន ២ ដើម្បីអំពាវនាវឲ្យមានការដោះលែងកម្មករ និងអ្នកការពារសិទិ្ធមនុស្សទាំង ២៣ នាក់ ដែលត្រូវបានឃុំខ្លួនកាលពីដើមខែនេះ ទាមទារឲ្យបញ្ឈប់អំពើហិង្សាលើអ្នកតវ៉ាអហិង្សា ធ្វើការស៊ើបអង្កេតលើការប៉ះទង្គិចគ្នាកាលពីថ្ងៃទី២ និងទី៣ ខែមករា និងធ្វើការផ្តល់សំណងដល់ជនរងគ្រោះអំឡុងពេលប៉ះទង្គិចគ្នាទាំងនោះ។ ភ្លាមៗបន្ទាប់ពីដាក់ញត្តិទីមួយរបស់អ្នកទាំងនោះនៅស្ថានទូតសិង្ហបុរី ក្រុមមនុស្សមួយក្រុមដែលមានគ្នាប្រហែល ៨០ នាក់ ត្រូវបានរារាំងមួយរយៈខ្លីដោយកងសន្តិសុខសាលារាជធានីភ្នំពេញចំនួន ១៥ នាក់ និងនគរបាលបង្ក្រាបបាតុកម្មមួយក្រុម។ នៅពេលដែលក្រុមអ្នកតវ៉ា ត្រូវបានអនុញ្ញាតឲ្យបន្តដំណើរ អ្នកទាំងនោះបានទៅដាក់ញត្តិ ដោយជោគជ័យនៅការិយាល័យអង្គការសហប្រជាជាតិសម្រាប់ការអភិវឌ្ឍន៍ (UNDP) និង ការិយាល័យមូលនិធិប្រជាជននៃអង្គការសហប្រជាជាតិ(UNFPA) ហើយនិងស្ថានទូតប្រ៊ុយណេ មីយ៉ាន់ម៉ា ឥណ្ឌូនេស៊ី ហ្វីលីពីន និងប្រទេសចិន។ រហូតមកដល់ពេលនេះ នៅក្នុងញត្តិ មានហត្ថលេខាពីក្រុមសង្គមស៊ីវិលចំនួន ១៩៧។
- ចំណងជើង & មូលបទ
- សិទិ្ធបញ្ចេញមតិ និងចូលរួម ដោះលែង ២៣ នាក់
