សាលាឧទ្ធរណ៍ភ្នំពេញតម្កល់សេចក្តីសម្រេចសាលាដំបូងករណីហិង្សានៅផ្លូវវេងស្រេង
ចេញផ្សាយ ថ្ងៃទី២៩ ខែកញ្ញា ឆ្នាំ២០២៣
នាថ្ងៃនេះសាលាឧទ្ធរណ៍ភ្នំពេញ បានប្រកាសសាលដីកាដោយសម្រេចតម្កល់បទចោទប្រកាន់ទៅលើអ្នកទាំងបួននាក់ ក្នុងចំណោមមនុស្សទាំង ដប់នាក់ ដែលត្រូវបានចាប់ខ្លួន នៅមុខរោងចក្រ យាក់ជីង កាលពីថ្ងៃទី២ ខែមករា ឆ្នាំ២០១៤ មួយថ្ងៃមុនពេលដែលកើតមាននូវអំពើហិង្សានៅលើផ្លូវវេងស្រេង ។ ការធ្វើបាតុកម្ម ត្រូវបានអាជ្ញាធរបង្ក្រាបយ៉ាងហិង្សា កាលពីថ្ងៃទី៣ ខែមករា ឆ្នាំ២០១៤ នៅពេលដែលកងកម្លាំងចម្រុះ បានបើកការបាញ់ប្រហារទៅលើក្រុមកម្មករដែលកំពុងតវ៉ា ។
កម្មករចំនួន ១០នាក់ ត្រូវបានសាលាដំបូងរាជធានីភ្នំពេញផ្តន្ទាទោស កាលពីឆ្នាំ២០១៤ ពីបទហិង្សាដោយចេតនាដោយមានស្ថានទម្ងន់ទោស ដោយយោងតាមមាត្រា ២៨ និង ២១៨ នៃក្រមព្រហ្មទណ្ឌ ។ ក្នុងចំណោមមនុស្សទាំង ១០នាក់ មានតែបួននាក់ប៉ុណ្ណោះ គឺលោក ចាន់ ពុទ្ធិស័ក្ត សកម្មជនដីធ្លីតំបន់បឹងកក់ លោក ថេង សាវឿន ប្រធានសមាគមសម្ព័ន្ធកសិករកម្ពុជា (CCFC) លោក សុគន្ធ សម្បត្តិពិសិដ្ឋ អតីតសមាជិកមជ្ឈមណ្ឌលសម្រាប់សិទិ្ធការងារកម្ពុជា និងលោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ដែលបានប្តឹងឧទ្ធរណ៍ចំពោះការសម្រេចរបស់សាលាដំបូង ។
សាលាឧទ្ធរណ៍ភ្នំពេញបានសម្រេចតម្កល់សេចក្តីសម្រេចរបស់សាលាដំបូងរាជធានីភ្នំពេញ ដោយផ្តន្ទាទោសលោក ថេង សាវឿន ឱ្យជាប់ពន្ធនាគារចំនួន ៤ឆ្នាំ លោក ចាន់ ពុទ្ធិស័ក្ត លោក សុគន្ធ សម្បត្តិពិសិដ្ឋ និងលោក វន់ ពៅ ឱ្យជាប់ពន្ធនាគារចំនួន ៤ឆ្នាំកន្លះ ប៉ុន្តែទោសដែលនៅសល់ពីការជាប់ឃុំបណ្តោះអាសន្នរង់ចាំសវនាការ ត្រូវបានព្យួរ ។ អ្នកទាំងបួននាក់ បានជាប់ឃុំបណ្តោះអាសន្នក្នុងពន្ធនាគារចាប់តាំងពីថ្ងៃទី៣ ខែមករា ដល់ថ្ងៃទី៣០ ខែឧសភា ឆ្នាំ២០១៤ ។ សាលាឧទ្ធរណ៍បានសម្រេចលើកចោលការពិន័យជាប្រាក់ចំនួន ៨លានរៀល (ប្រមាណ ២.០០០ ដុល្លារអាមេរិក) ដែលសាលាដំបូងបានបង្គាប់ឱ្យអ្នកទាំងបួននាក់បង់ ។
នៅក្នុងអំពើហិង្សានៅលើផ្លូវវេងស្រេងកាលពីឆ្នាំ២០១៤ កងកម្លាំងចម្រុះរបស់រាជរដ្ឋាភិបាល បានបាញ់រះបណ្តាលឱ្យស្លាប់យ៉ាងតិចណាស់ជនស៊ីវិលចំនួន ៤នាក់ និងរងរបួសយ៉ាងតិច ៣៨នាក់ ហើយមនុស្សចំនួន ២៣នាក់ ផ្សេងទៀត ដែលជាកម្មករ និងអ្នកការពារសិទិ្ធមនុស្ស ត្រូវបានចាប់ខ្លួន ។ កុមារា ខឹម សុផាត ជាកម្មករដែលមានអាយុត្រឹមតែ ១៥ ឆ្នាំនៅពេលនោះ បានរងរបួសធ្ងន់ធ្ងរ ហើយបានបាត់ខ្លួននៅអំឡុងពេលហិង្សានៅផ្លូវវេងស្រេង ។ សុផាត នៅតែបន្តបាត់ខ្លួនរហូតមកដល់ពេលនេះ ហើយក្រុមសង្គមស៊ីវិលនៅតែបន្តអំពាវនាវស្វែងរកអ្នកទទួលខុសត្រូវចំពោះអំពើហិង្សា និងការបាត់ខ្លួននេះ ។ រហូតមកដល់បច្ចុប្បន្ននេះ រាជរដ្ឋាភិបាលនៅតែមិនទាន់ធ្វើការស៊ើបអង្កេតឱ្យបានម៉ត់ចត់ ឯករាជ្យ និងអព្យាក្រិត្យ ។ ក្រៅពីអ្នកទាំងនេះ ការចាប់ខ្លួនកម្មករដទៃទៀតរហូតមកដល់បច្ចុប្បន្ន ក៏ទទួលបានការជំទាស់ពីសាធារណជនផងដែរ ។
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ អំពើហិង្សាវ៉េង ស្រេង
