អ្នកភូមិ ឡពាង ៥នាក់ ត្រូវបានដោះលែងឲ្យនៅក្រៅឃុំបណ្តោះអាសន្នដោយមានលក្ខខណ្ឌមុននឹងមានសវនាការ
ចេញផ្សាយ ថ្ងៃទី២៩ ខែសីហា ឆ្នាំ២០១៤
នាថ្ងៃនេះ នៅម៉ោងប្រហែល ៤រសៀល អ្នកភូមិ ឡពាង ៥ នាក់ ដែលត្រូវបានចាប់ និងឃុំខ្លួនកាលពីខែមុន ត្រូវបានដោះលែងឲ្យនៅក្រៅឃុំបណ្តោះអាសន្នរង់ចាំសវនាការ ដោយសាលាដំបូងខេត្តកំពង់ឆ្នាំង។ អ្នកភូមិបីនាក់ក្នុងចំនោមអ្នកទាំងនោះ ត្រូវបានចាប់ខ្លួន នៅអំឡុងពេលដើរហែរក្បួនអហិង្សាចម្ងាយ ៦០ គីឡូម៉ែត ពីខេត្តកំពង់ឆ្នាំងមកកាន់រាជធានីភ្នំពេញ។ ការដើរហែក្បួន ត្រូវបានធ្វើឡើងដើម្បីអំពាវនាវឲ្យមានដំណោះស្រាយលើជម្លោះដីធ្លីដ៏រ៉ាំរ៉ៃរវាងក្រុមហ៊ុន K.D.C និងអ្នកភូមិឡពាង ហើយក៏អំពាវនាវសុំឲ្យមានការដោះលែងសមាជិកសហគមន៍ពីរនាក់ ដែលត្រូវបានចាប់ខ្លួនប៉ុន្មានសប្តាហ៍មុននេះផងដែរ។
អ្នកភូមិទាំង ៥នាក់ ត្រូវបានដោះលែង និងដាក់ឲ្យស្ថិតនៅក្រោមការត្រួតពិនិត្យរបស់តុលាការដោយភ្ជាប់ជាមួយលក្ខខណ្ឌ ៣យ៉ាងគឺ៖ ទីមួយ ត្រូវចូលខ្លួនមុខតុលាការនៅពេលមានដីកាកោះហៅ ទីពីរ មិនត្រូវផ្លាស់ប្តូរទីកន្លែងស្នាក់នៅដោយមិនមានការជូនដំណឹងដល់អាជ្ញាធរ និងទីបី ត្រូវបង្ហាញខ្លួនដល់នគរបាលប៉ុស្តិ៍ក្នុងតំបន់ជារៀងរាល់ខែ។
ការដោះលែងនេះ ត្រូវបានធ្វើឡើង បន្ទាប់ពីមានការព្យាយាមដាក់ញត្តិទៅកាន់ស្ថាប័នរាជរដ្ឋាភិបាលនានាដោយអ្នកភូមិ ឡពាង ទាក់ទងនឹងជម្លោះដីធ្លីរបស់អ្នកទាំងនោះជាមួយក្រុមហ៊ុន K.D.C។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ សិទ្ធិដីធ្លី
