អង្គការ លីកាដូ សូមលើកយកស្ថានភាពស្ត្រីក្នុងពន្ធនាគារមកធ្វើជាប្រធានបទ សំខាន់សម្រាប់ទិវាអន្តរជាតិនារី
ចេញផ្សាយ ថ្ងៃទី៨ ខែមីនា ឆ្នាំ២០១១ភ្នំពេញ ថ្ងៃទី០៨ ខែមីនា ឆ្នាំ២០១១: ចំនួនស្រ្តីនិងក្មេងស្រីនៅក្នុងពន្ធនាគារបានកើនឡើងចំនួន ៤១ ភាគរយ ចាប់តាំងពីឆ្នាំ២០០៧។ជាមួយគ្នានេះដែរ អ្នកទោសសរុបបានកើនដល់ចំនួន ២៩ ភាគរយ ដោយបន្ថែមពីលើស្ថានភាពចង្អៀតស្រាប់នៃលទ្ធភាពផ្ទុករបស់ពន្ធនាគារក្នុងអំឡុងពេលដូចគ្នា។
នៅចុងឆ្នាំ២០១០ ចំនួនអ្នកទោសជាស្ត្រីកើនឡើងដល់ ៩៤១ នាក់ នៅទូទាំងប្រទេសកម្ពុជា។ ក្នុងចំណោមអ្នកទោសជាស្ត្រីទាំងអស់មាន ១២ នាក់ជាស្ត្រីមានផ្ទៃពោះ ហើយមានកុមារចំនួន ៤៧ នាក់កំពុងរស់នៅជាមួយម្តាយក្នុងពន្ធនាគារ។
អង្គការលីកាដូ និងអង្គការជាដៃគូកំពុងរៀបចំទិវាអន្តរជាតិនារីនៅឆ្នាំនេះ ដោយផ្តោតការចាប់អារម្មណ៍ទៅលើស្ថានភាពស្ត្រី និងកុមារនៅក្នុងពន្ធនាគារ។ អង្គការលីកាដូ និងដៃគូរនឹងចែកអំណោយ ដែលមានអាហារ និងសម្ភារៈប្រើប្រាស់ដល់ស្ត្រីជាអ្នកទោស និងអំណោយបន្ថែមពិសេសដល់ស្ត្រីមានផ្ទៃពោះ និងកុមារតាមម្តាយនៅក្នុង ១៨ ពន្ធនាគារ និងមានកម្មវិធីពិសេសនៅមជ្ឍមណ្ឌលកែប្រែទី២ (ម២) និងពន្ធនាគារតាខ្មៅ។ កម្មវិធីនៅមជ្ឍមណ្ឌលកែប្រែទី២ និងពន្ធនាគារតាខ្មៅមានការសម្តែងរបាំបុរាណ ការលេងល្បែងកំសាន្ត ក៍ដូចជាចំណាប់អារម្មណ៍របស់វាគ្មិនទាក់ទងនឹងទិវាអន្តរជាតិនារី។
ជាមួយនឹងស្ថានភាពចង្អៀតណែន ដែលកើតមានឡើងស្រាប់នោះ ភាពខ្វះខាតនៃថវិកាដ៍តិចតួចស្រាប់របស់ពន្ធនាគារសម្រាប់ស្ត្រី ជាពិសេសស្ត្រីដែលមានកូននៅជាមួយ តែងតែកើតមានឡើងដោយសារតែប្រព័ន្ធមិនដំណើរការ។ ជាឧទាហរណ៍ របាយការណ៍របស់អង្គការលីកាដូ ដែលចេញផ្សាយនាពេលថ្មីៗនេះបានរកឃើញថា ជាទូទៅពន្ធនាគារមិនបានផ្តល់នូវប្រាក់ថ្លៃអាហារបន្ថែមសម្រាប់ស្ត្រីមានផ្ទៃពោះ ឬកុមារនៅក្នុងពន្ធនាគារឡើយ។ ប្រព័ន្ធពន្ធនាគារផ្តល់ថវិកាតែចំនួន ២៨០០រៀល (០.៧០ ដុល្លាសហរដ្ឋអាមេរិច) ក្នុង១នាក់ ក្នុង១ថ្ងៃ ដោយរាប់បញ្ចូលទាំងថ្លៃអាហារ ទឹក ភ្លើង សម្លៀកបំពាក់ និងការព្យាបាលសុខភាព។ ក្នុងចំណោមពន្ធនាគារដែលអង្គការលីកាដូ បានធ្វើការស្រាវជ្រាវ មិនទាន់មានពន្ធនាគារណាមួយបានផ្តល់ប្រព័ន្ធថែរក្សាសុខភាពមាតាមុនពេល និងក្រោយពេលសម្រាលកូនឡើយ។
លោកស្រីវេជ្ជបណ្ឌិត ពុង ឈីវកេក មានប្រសាសន៍ថា “ប្រព័ន្ធពន្ធនាគារនៅប្រទេសកម្ពុជា មិនទាន់មានលទ្ធភាពផ្តល់ឲ្យទៅតាមតម្រូវការរបស់មាតា និងកុមារនៅឡើយ” ។ “ការព្យាបាលសុខភាព និងចំណីអាហារមិនទានបានគ្រប់គ្រាន់ ចំណែកឯទឹកមិនតានបានស្អាតនៅឡើយ ហើយមានឪកាសតិចតួចសម្រាប់ការសិក្សា។ ជាអកុសល មាតាជាច្រើនមិនមានជម្រើសផ្សេងក្រៅពីការបង្ខំចិត្តយកកូនទៅនៅជាមួយនៅក្នុងពន្ធនាគារ។”
នៅមានបញ្ហាផ្សេងៗទៀត ក្រៅពីបញ្ហារបស់ស្ត្រី និងកុមាររស់នៅជាមួយម្តាយ។ ដោយសារតែទំហំនៃទីកន្លែងមានកំណត់ ពន្ធនាគារខ្លះក៍នៅមានការលំបាកក្នុងការបែងចែកឲ្យនៅដាច់ដោយឡែកពីគ្នារវាងស្ត្រីនិងបុរស។ ប្រព័ន្ធពន្ធនាគារក៍បានធ្វើឲ្យមានការលំបាកផងដែរ ដោយសារតែមន្ត្រីពន្ធនាគារជាស្ត្រីមានចំនួនតិចពោលគឺមានតែ ១០ ភាគរយប៉ុណ្ណោះក្នុងចំណោមមន្ត្រី ២.០៤៣ នាក់ ដែលកំពុងធ្វើការនៅក្នុងពន្ធនាគារនៅទូទាំងប្រទេសកម្ពុជា។
ដើម្បីសិក្សាបន្ថែម អំពីស្ថានភាពចង្អៀតណែនរបស់ស្ត្រី និងកុមារក្នុងពន្ធនាគារ សូមមើលរបាយការណ៍របស់អង្គការ លីកាដូ ដូចខាងក្រោម ៖
ស្ថានភាពពន្ធនាគារនៅកម្ពុជា ឆ្នាំ២០០៨ ស្ត្រីនៅក្នុងពន្ធនាគារ(ខែមីនា ឆ្នាំ២០០៩)
( http://www.licadho-cambodia.org/reports.php?perm=129 )
ការពិនិត្យឡើងវិញនូវស្ថានភាពរស់នៅរបស់ម្តាយ ស្ត្រីមានផ្ទៃពោះ និងកុមារតូចៗរស់នៅពន្ធនាគារមួយ ចំនួននៅកម្ពុជា (មិថុនា ២០១០)
( http://www.licadho-cambodia.org/reports.php?perm=141 )
សម្រាប់ព័ត៌មានបន្ថែម សូមទាក់ទង៖
▪ លោកស្រីវេជ្ជបណ្ឌិត ពុង ឈីវកេក ប្រធានអង្គការ លីកាដូ ០១២ ៨០២ ៥០៦
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- សិទ្ធិកុមារ បញ្ហាពន្ធនាគារ សិទ្ធិស្ត្រី