នគរបាលបំបែកបាតុកម្ម កម្មកររោងចក្រកាត់ដេរ ២,០០០នាក់ របួស ៨នាក់ និងចាប់ខ្លួន ២នាក់
ចេញផ្សាយ ថ្ងៃទី៨ ខែឧសភា ឆ្នាំ២០១១; ក្រុមសង្គមស៊ីវិល
ថ្ងៃទី៨ ខែឧសភា ឆ្នាំ២០១១: អង្គការអាដហុក មជ្ឍមណ្ឌលអប់រំច្បាប់សម្រាប់សហគមន៍ និងអង្គការលីកាដូ សូមថ្កោលទោសយ៉ាងខ្លាំងក្លា ចំពោះការវាយបំបែកដ៍ឃោរឃៅរបស់រដ្ឋាភិបាល លើសហជីពកម្មករកាត់ដេរក្នុងរាជធានីភ្នំពេញ នាព្រឹកថ្ងៃអាទិត្យ ជាកំឡុងពេលដែលកូដកម្មទាក់ទងនឹងវិវាទការងារបាននឹងកំពុងតែបន្តធ្វើ ហើយដែលវិវាទនោះ បានចាប់ផ្តើមឡើង ដោយការដុតបំផ្លាញរោងចក្រសំរាប់កម្មករ។ បាតុកម្ម បានបន្សល់ទុកនូវកម្មករចំនួន ៨នាក់ រងរបួស ដែលក្នុងចំនោមនោះមានអ្នកខ្លះរងរបួសធ្ងន់។
មានកម្មករប្រហែលជា ២,០០០នាក់ មកពីរោងចក្រមិថុនា បានប្រមូលផ្តុំគ្នា នាព្រឹកថ្ងៃអាទិត្យ នៅឯទីតាំងរោងចក្រ ដែលបានដុតបំផ្លាញនៅលើផ្លូវពោធិ៍ចិនតុង ជិតព្រលានយន្តហោះរបស់រាជធានី។ ក្រុមកម្មករ មានបំណងបិទផ្លូវជាបណ្តោះអាសន្ន ដើម្បីទាក់ទាញការយកចិត្តទុកដាក់ ចំពោះស្ថានភាពរបស់ពួកគេពីលោកនាយករដ្ឋមន្ត្រី ហ៊ុន សែន ដែលគាត់នឹងវិលត្រលប់មកពីបរទេសវិញ ដោយឆ្លងកាត់តាមព្រលានយន្តហោះ។ សកម្មភាពបិទផ្លូវនេះត្រូវបានរៀបចំធ្វើឡើងដោយសាខាមូលដ្ឋានរបស់សហជីពសេរីកម្មករ នៃព្រះរាជាណាចក្រកម្ពុជា(FTUWKC)។
ភ្លាមៗបន្ទាប់ពីកម្មករចាប់ផ្តើមបិទផ្លូវ មានកំលាំងកងរាជអាវុធហត្ថ និងមន្ត្រីនគរបាលប្រមាណជា១០០នាក់ ដែលប្រដាប់ដោយគ្រឿងការពារប្រឆាំងបាតុកម្ម ដំបងឆក់ និងកាំភ្លើងបានចូលមកបំបែកហ្វូងបាតុកម្ម។ កងកំលាំងបានបាញ់ព្រមានឡើងទៅលើ និងបានវាយដំទោលើបាតុករជាច្រើននាក់។ មានសេចក្តីរាយការណ៍ថា នគរបាលបានបើកម៉ូតូសំដៅហ្វូងបាតុករដែលពួកគេភាគច្រើនលើសលុបជាស្ត្រី។
មានកម្មករស្ត្រី សរុបចំនួន ៨នាក់ ត្រូវបាននាំយកទៅព្យាបាល នៅមន្ទីរពេទ្យក្នុងមូលដ្ឋាន។ របួសដែលពួកគេបានទទួលរងរួមមាន របួសក្បាល ឈឺចាប់ដោយការតក់ស្លត់ រយៈដាច់សាច់ ហើយដែលក្នុងនោះ មានកម្មករពីរនាក់ត្រូវដេរមុខរបួសជាច្រើនថ្នេរ។ កម្មករស្រ្តីពីរនាក់ត្រូវបានចាប់ខ្លួន គឺមេដឹកប្រចាំមូលដ្ឋានរបស់ FTUWKC ឈ្មោះ ប៉េង ជូ អាយុ ៣៨ឆ្នាំ និងសមាជិករបស់ FTUWKC ឈ្មោះ មាស ណារិន អាយុ ៣២ឆ្នាំ ។
លោក អំ សំអាត អ្នកគ្រប់គ្រងបច្ចេកទេសផ្នែកស៊ើបអង្កេតរបស់អង្គការលីកាដូ បានមានប្រសាសន៍ថា “ការប្រើអំពើហិង្សា ដោយនគរបាល គីមិនសមាមាត្រទៅនឹងសកម្មភាពរបស់កម្មករទេ។ រាជរដ្ឋាភិបាល គួរតែគាំទ្រសហជីពលើបញ្ហាសិទ្ធិខាងបញ្ចេញមតិ ជាជាងការបង្ក្រាបជាប្រព័ន្ធលើរាល់ទម្រង់ទាំងអស់ ខាងសិទ្ធិសំដែងនូវសកម្មភាពនេះ។”
វិវាទការងាររបស់កម្មករ បានកើតចេញមកពីការបាត់បង់ការងារ បន្ទាប់ពីការឆេះរោងចក្រមិថុនា កាលពីថ្ងៃទី៣០ ខែមីនា ឆ្នាំ២០១១។ អគ្គីភ័យ បានបំផ្លាញរោងចក្រ ហើយកម្មករទាំងអស់ ត្រូវបានបឈ្ឍប់ពីការងារ។ ម្ចាស់រោងចក្រក បានផ្តល់អោយកម្មករនូវប្រាក់បំណាច់ចំនួន២០ដុល្លា សហរដ្ឋអាមេរិច ចំពោះការបំពេញការងារបានរយៈពេលមួយឆ្នាំ។ ចំពោះកម្មករដែលមានបទពិសោធន៍ការងាររយៈពេលបីឆ្នាំ ត្រូវទទួលបាន ៦០ដុល្លាសហរដ្ឋអាមេរិក ដែលមានតម្លៃប្រហាក់ប្រហែលនឹងប្រាក់ឈ្នួលមួយខែ។ កម្មករគិតឃើញថា កាផ្តល់អោយប្រាក់បំណាច់នេះគឺមិនត្រឹមត្រូវទេ ។ ទន្ទឹមគ្នានេះ មន្រ្តីសាលារាជធានីភ្នំពេញ បានគាំទ្រជាសាធារណៈចំពោះការចំពោះការផ្តល់ប្រាក់នេះ នៅក្នុងកិច្ចប្រជុំមួយជាមួយកម្មករ កាលពីពាក់កណ្តាល សបា្តហ៍មុន។
ម្ចាស់រោងចក្រ ដែលត្រូវបានបំផ្លាញនេះ ក៍ជាម្ចាស់រោងចក្រវាយនភ័ណ្ឌចំនួនពីរផ្សេងទៀត។ សមាជិកសហជីពក៍មិនសប្បាយចិត្តផងដែរ ចំពោះម្ចាស់រោងចក្រនេះ ដែលបានបញ្ជូនកម្មករមួយចំនួន ដែលជាអ្នកមិនមានប្រវត្តិចូលរួមសហជីពពីអតីតកាល អោយទៅធ្វើការនៅឯរោងចក្រដទៃទៀតនោះ។
លោក មឿន តុលា ប្រធានកម្មវិធីការងារ នៃមជ្ឈមណ្ឌលអប់រំច្បាប់សម្រាប់សហគមន៍បានមានប្រសាសន៍ថា “ការបិទផ្លូវ ត្រូវបានទទួលស្គាល់ថា គឺជាជំហានដ៍ធ្ងន់ធ្ងរមួយ ប៉ុន្តែវិវាទការងារនេះ គឺជាវិវាទធ្ងន់ធ្ងរ ដែលប៉ះពាល់កម្មកររាប់ពាន់នាក់។ ប្រជាពលរដ្ឋកម្ពុជាសាមញ្ញា មិនមានឥទ្ធិពល មិនមានសម្លេង និងមិនទទួលបាននូវដំណោះស្រាយផ្លូវច្បាប់នៅក្នុងស្ថានភាពដូចនេះទេ។ ពួកគេ ត្រូវបានផាត់ចេញ។ ប្រជាពលរដ្ឋងាកមកប្រើសកម្មភាពបែបអស់សង្ឃឹមកាន់តែច្រើនឡើងៗ។ នគរបាលប្រើអំពើហិង្សា មិនមែនជាមធ្យោបាយ ដើម្បីដោះស្រាយបញ្ហាទេ។”
អំពើហិង្សាបានកើតឡើង ក្រោយពីរយៈពេលមួយសប្តាហ៍ បន្ទាប់ពីថ្ងៃដែលមានសហជីពកម្មករច្រើនជាង ៣,០០០នាក់ បានដើរក្បួនក្នុងទីក្រុងភ្នំពេញ ដើម្បីអបអរសាទរទិវាពលកម្ម អន្តរជាតិ ១ ឧសភា។ មិនមានឧប្បត្តិហេតុនៃអំពើហិង្សា ក្នុងពេលដើរក្បួននាថ្ងៃទិវាពលកម្ម អន្តរជាតិ ត្រូវបានគេរាយការណ៍នោះទេ។
លោក ចាន់ សុវ៉េត ប្រធានកម្មវិធីសិទ្ធិមនុស្សអង្គការ អាដហុក បានមានប្រសាសន៍ថា “អាជ្ញាធរសុខចិត្តផ្តល់ការអនុញ្ញាតអោយធ្វើបាតុកម្មជាទូទៅសម្រាប់ព្រឹត្តិការណ៍សំខាន់ៗ ដូចជាព្រឹត្តិការណ៍ថ្ងៃទី១ ឧសភា ប៉ុន្តែនៅពេលដែលកម្មករជំរុញកាន់តែខ្លាំង និងតំរង់ទិសដៅលើបញ្ហាជាក់លាក់ណាមួយ នោះភាពចំហនឹងមិនមាននោះឡើយ”។
សម្រាប់ព័ត៌មានបន្ថែម សូមទាក់ទង៖
▪ លោក មឿន តុលា ប្រធានកម្មវិធីការងារមជ្ឍមណ្ឌលអប់រំច្បាប់សម្រាប់សហគមនួ
▪ ទូរស័ព្ទលេខ៖ ០១២ ៩២១ ៩៦១
▪ លោក ចាន់ សុវ៉េត ប្រធានកម្មវិធីសិទ្ធិមនុស្ស អង្គការអាដហុក ទូរស័ព្ទលេខ ៖ ០១៦ ៩៣៧ ៥៩១
▪ លោក អំ សំអាត អ្នកគ្រប់គ្រងបច្ចេកទេសផ្នែកស៊ើបអង្កេត អង្គការ លីកាដូ ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ
