សូមផ្តល់សេរីភាពប្រព័ន្ធផ្សព្វផ្សាយសារព័ត៌មាន៖ សម្រាប់ការមិនកម្រិតការចូលក្នុងគេហទំព័របណ្តាញសង្គម
ចេញផ្សាយ ថ្ងៃទី៧ ខែសីហា ឆ្នាំ២០១៣; ក្រុមសង្គមស៊ីវិលយើងខ្ញុំ ជាអង្គការសង្គមស៊ីវិលមានរាយនាមដូចខាងក្រោម សូមសំណូមពរដល់ក្រុមហ៊ុនទូរស័ព្ទចល័តម៉េតហ្វូន (Metfone) ដែលជាក្រុមហ៊ុនផ្គត់ផ្គង់ប្រព័ន្ធអ៊ិនធើណែត (ISP) បានចុះបញ្ជី និងប្រតិបត្តិការនៅក្នុងព្រះរាជាណាចក្រកម្ពុជា សូមធ្វើការពន្យល់ឲ្យបានលំអិត អំពីការបិទគេហទំព័រទំនាក់ទំនងសង្គម ហ្វេសប៊ុក (Facebook) នាថ្ងៃនេះ ក៏ដូចជាការបិទគេហទំព័រ Ki-Media ដែលនៅតែបន្តមិនអាចបើកបានរហូតមក។
កាលពីព្រឹកមិញនេះ នៅវេលាម៉ោងប្រហែល ៩ ព្រឹក អ្នកប្រើប្រាស់ប្រព័ន្ធអ៊ិនធើណេតរបស់ក្រុមហ៊ុន ម៉េតហ្វូន (Metfone) ជាច្រើន បានរាយការណ៍ថា អ្នកទាំងនោះមិនអាចចូលទៅក្នុងគេហទំព័រ ហ្វេសប៊ុក (Facebook) បានទេ។ ការកាត់ផ្តាច់នេះ មានរយៈពេលច្រើនជាង ៣ ម៉ោង។
ទោះបីជាមានការហៅទូរស័ព្ទ ជាច្រើនលើកច្រើនសារ និងអ៊ីមែលជាច្រើនត្រូវបានផ្ញើពីបុគ្គលិកអង្គការមិនមែនរដ្ឋាភិបាលទៅការិយាល័យទំនាក់ទំនងអតិថិជនរបស់ក្រុមហ៊ុនក៏ដោយ ក៏ក្រុមហ៊ុនបានត្រឹមតែធ្វើការឆ្លើយតបដោយផ្ទាល់មាត់ទៅកាន់អតិថិជនរបស់ខ្លួនថា ពួកគេ “កំពុងធ្វើឲ្យប្រសើរឡើងនូវប្រព័ន្ធរបស់អ្នកទាំងនោះ ហើយមិនដឹងថាតើថ្ងៃណាគេហទំព័រ Facebook អាចនឹងប្រើប្រាស់បាននោះទេ”។ ដោយមិនមានការបកស្រាយបន្ថែមទៀត អតិថិជនរបស់ក្រុមហ៊ុនម៉េតហ្វូន នៅតែមានមន្ទិលសង្ស័យថាតើការកាត់ផ្តាច់នេះជាចេតនាផ្តោតទៅលើគេហទំព័រ ហ្វេសប៊ុក (Facebook) និងមធ្យោបាយនៃការបញ្ចេញមតិផ្សេងទៀត ដែលកំពុងកាន់តែមានសារសំខាន់ដល់មជ្ឈដ្ឋានសាធារណៈរបស់ប្រទេសកម្ពុជាឬយ៉ាងណា។ អ្នកនាង ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “ក្រុមហ៊ុន ម៉េតហ្វូន (Metfone) គឺកំពុងតែបន្តរឹតត្បិតការប្រើប្រាស់អ៊ិនធើណេត ទោះបីជាក្រុមហ៊ុននេះបានគិតប្រាក់ពីអតិថិជនពេញថ្លៃ ដោយមិនមានការជូនដំណឹងមុន ឬការបកស្រាយអំពីមូលហេតុដែលពួកគេធ្វើបែបនេះ”។
នេះមិនមែនជាលើកទីមួយទេដែលក្រុមហ៊ុនទូរស័ព្ទចល័ត ម៉េតហ្វូន (Metfone) បានបិទ ឬកម្រិតការចូលទៅក្នុងគេហទំព័រ ឬអត្ថបទក្នុងគេហទំព័រជាក់លាក់ណាមួយ។ នៅខែមករា ឆ្នាំ២០១១ គេហទំព័រដ៏ចម្រូងចម្រាស Ki-Media (ហើយនិងប្លុក (blog) ទាំងអស់ដែលជាកម្មសិទិ្ធរបស់ Blogspot) ត្រូវបានបិទដោយក្រុមហ៊ុនផ្គត់ផ្គង់អ៊ិនធើណេត (ISPs) ជាច្រើន រួមទាំងក្រុមហ៊ុន ម៉េតហ្វូន (Metfone)។ នៅពេលនោះ រដ្ឋមន្ត្រីក្រសួងព័ត៌មាន ឯកឧត្តម ខៀវ កញ្ញារិទិ្ធ បានបដិសេធអំពីការជាប់ពាក់ព័ន្ធរបស់រាជរដ្ឋាភិបាលទៅនឹងការបិទនេះ។ ពីបីថ្ងៃក្រោយមក ក្រោយពីមានការហៅទូរស័ព្ទ និងការតវ៉ាជាលាយល័ក្ខអក្សរ គេហទំព័រទាំងនោះត្រូវបានបើកឡើងវិញដោយក្រុមហ៊ុនផ្គត់ផ្គង់អ៊ិនធើណេតជាច្រើន លើកលែងតែក្រុមហ៊ុនទូរស័ព្ទ ម៉េតហ្វូន (Metfone)។ កាលពីដើមខែកុម្ភៈ ឆ្នាំ២០១១ ការត្រួតពិនិត្យចាប់ពិរុទ្ធមួយទៀតបានកើតឡើង ទៅលើគេហទំព័រ Ki-Media និងគេហទំព័រផ្សេងទៀត ដោយគេហទំព័រទាំងនោះត្រូវបានគេសង្កេតថាមានលក្ខណៈរិះគន់ទៅលើរាជរដ្ឋាភិបាល។ ក្រុមហ៊ុនផ្គត់ផ្គង់អ៊ិនធើណេតមួយចំនួនដែលអនុវត្តការបិទគឺក្រុមហ៊ុន Online Wicam Metfone និង Ezecom។ ទោះបីជារដ្ឋមន្ត្រីក្រសួងប្រៃនីយ៍ និងទូរគមនាគមន៍ ឯកឧត្តម សូ ឃុន បានបដិសេធការនិយាយថារាជរដ្ឋាភិបាលបាន “បញ្ជា” ឲ្យក្រុមហ៊ុនផ្តល់សេវាអ៊ិនធើណេតទាំងនោះ ធ្វើការបិទគេហទំព័រដែលគាំទ្រគណបក្សប្រឆាំង សកម្មភាពរបស់រាជរដ្ឋាភិបាលនៅអំឡុងពេលខែមុនៗ គឺបង្ហាញថាការកាត់ផ្តាច់នេះគឺកំពុងត្រូវបានគេពិចារណា។
កាលពីខែធ្នូ ឆ្នាំ២០១០ ប្រធានគណកម្មាការព្រំដែនរួមកម្ពុជា-វៀតណាម បានប្រាប់វិទ្យុអាស៊ីសេរីថា រាជរដ្ឋាភិបាលនឹងធ្វើការបិទគេហទំព័រ Ki-Media ហើយនៅខែកុម្ភៈ ឆ្នាំ២០១១ កាសែតភ្នំពេញប៉ុស្តិ៍ បានរាយការណ៍ថាឯកឧត្តម សូ ឃុន បានស្នើឲ្យក្រុមហ៊ុនទូរស័ព្ទចល័តឲ្យ “សហការ” ក្នុងការបិទនូវគេហទំព័រជាក់លាក់មួយចំនួន “ដែលប៉ះពាល់ដល់សីលធម៌ និងប្រពៃណីរបស់ប្រជាពលរដ្ឋខ្មែរ និងរាជរដ្ឋាភិបាល”។
ការព្យាយាមដទៃទៀតដើម្បីបិទប្រភពព័ត៌មានឯករាជ្យនានា និងប្រព័ន្ធទំនាក់ទំនងសង្គម នៅក្នុងប្រទេសកម្ពុជា ដែលត្រូវបានសង្កេតឃើញមានដូចជាបទបញ្ជាកាលពីខែវិច្ឆិកា ឆ្នាំ២០១២ របស់ក្រសួងប្រៃណីយ៍ និងទូរគមនាគមន៍ ដែលបានបញ្ជាឲ្យបិទហាងអ៊ិនធើណេតកាហ្វេទាំងអស់ដែលមានទីតាំងក្នុងចំងាយ ៥០០ ម៉ែត្រ ពីទីតាំងសាលារៀន និងស្ថាប័នអប់រំ។ ប្រសិនបើបទបញ្ជានោះត្រូវបានគេអនុវត្ត នោះវិធានការណ៍នេះស្ទើរតែបិទអាជីវកម្មបែបនេះទាំងស្រុង នៅកណ្តាលរាជធានីភ្នំពេញ។
ដោយសារប្រព័ន្ធផ្សព្វផ្សាយប្រពៃណីភាគច្រើន ជាពិសេសទូរទស្សន៍ទាំងអស់ ត្រូវបានគ្រប់គ្រងដោយរាជរដ្ឋាភិបាល ប្រជាពលរដ្ឋកម្ពុជាកាន់តែច្រើនឡើងៗបានពឹងផ្អែកទៅលើគេហទំព័រនានាដូចជា ហ្វេសប៊ុក (Facebook) ដើម្បីទទួលបានព័ត៌មានឯករាជ្យ។
លោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយព័ត៌មានឯករាជ្យ បានមានប្រសាសន៍ថា៖ “ហ្វេសប៊ុក (Facebook) និង ធ្វីតធើរ (Twitter) ដែលជាប្រព័ន្ធបណ្តាញសង្គមពីរក្នុងចំណោមបណ្តាញសង្គមដទៃទៀត គឺជាប្រភពព័ត៌មានថ្មី ក៏ដូចជាកំពុងក្លាយជាឧបករណ៍វាស់ស្ទង់នយោបាយ”។ លោក បានបន្ថែមទៀតថា៖ “ដោយមានការត្រួតពិនិត្យចាប់ពិរុទ្ធយ៉ាងខ្លាំងក្លាទៅលើប្រព័ន្ធផ្សព្វផ្សាយបែបប្រពៃណី គេហទំព័រហ្វេសប៊ុក (Facebook) បានក្លាយជាប្រភពព័ត៌មានយ៉ាងសំខាន់សម្រាប់ប្រជាពលរដ្ឋកម្ពុជាមួយភាគធំ”។
គេហទំព័របណ្តាញសង្គមមួយចំនួន កាន់តែក្លាយជាឧបករណ៍សំខាន់សម្រាប់ប្រជាពលរដ្ឋកម្ពុជា ក្នុងការរៀបចំប្រមូលផ្តុំចំណង់ចំណូលចិត្ត គំនិត និងជំនឿដូចគ្នា។ នេះគឺជាការពិតនៅពេលមុនការបោះឆ្នោត ដែលជាពេលដែលយុទ្ធនាការឃោសនាបោះឆ្នោតក៏ត្រូវបានធ្វើឡើងនៅក្នុងប្រព័ន្ធអ៊ិនធើណេត។
លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ បានមានប្រសាសន៍ថា៖“យុទ្ធនាការឃោសនាបោះឆ្នោតនាពេលថ្មីៗនេះ ហើយនិងលទ្ធផលបោះឆ្នោតនៅក្នុងប្រទេសកម្ពុជា បានបង្ហាញអំពីការកើនឡើងនូវសារសំខាន់នៃប្រព័ន្ធផ្សព្វផ្សាយព័ត៌មានសង្គមនៅក្នុងប្រទេស។ យើងខ្ញុំបានកត់សំគាល់ឃើញពីចំនួនយ៉ាងច្រើនលើសលប់នៃព័ត៌មានស្តីពីយុទ្ធនាការឃោសនាបោះឆ្នោត ដែលត្រូវបានចែករំលែកនៅលើគេហទំព័រដែលជាបណ្តាញសង្គម ដូចជាហ្វេសប៊ុក (Facebook)”។
ក្រុមហ៊ុនម៉េតហ្វូន ដែលបានដំណើរការនៅក្នុងប្រទេសកម្ពុជាកាលពីឆ្នាំ ២០០៩ គឺជាក្រុមហ៊ុនផ្គត់ផ្គង់ប្រព័ន្ធអ៊ិនធើណេតសំខាន់មួយក្នុងចំនោមក្រុមហ៊ុនផ្គត់ផ្គង់ប្រព័ន្ធអ៊ិនធើណេតសំខាន់ដទៃទៀតនៅក្នុងប្រទេសកម្ពុជា និងជាក្រុមហ៊ុនរបស់ក្រុមហ៊ុនមេ វីតតេលគ្រុប (Viettel) ដែលជាក្រុមហ៊ុនផ្គត់ផ្គង់សេវាទូរស័ព្ទចល័តធំបំផុតរបស់ប្រទេសវៀតណាម។ ក្រុមហ៊ុន វីតតេល (Viettel) គឺជាក្រុមហ៊ុនរដ្ឋ ដែលត្រូវបានគ្រប់គ្រងដោយក្រសួងការពារជាតិរបស់ប្រទេសវៀតណាម។
ក្រុមហ៊ុន នៅមិនទាន់បានចេញសេចក្តីថ្លែងការណ៍ ឬការឆ្លើយតបលំអិតតាមអ៊ីមែលណាមួយមកកាន់ក្រុមអង្គការមិនមែនរដ្ឋាភិបាល ដែលបានសួរនាំអំពីការបិទគេហទំព័រហ្វេសប៊ុកនាព្រឹកនេះ នៅឡើយទេ។
យើងខ្ញុំ ដែលជាអង្គការសង្គមស៊ីវិល មានរាយនាមដូចខាងក្រោម សូមធ្វើការអំពាវនាវដល់ក្រុមហ៊ុន ម៉េតហ្វូន សូមឲ្យក្រុមហ៊ុនធ្វើការពន្យល់ឲ្យបានលំអិតអំពីបញ្ហាបច្ចេកទេស ដែលបានបណ្តាលឲ្យគេហទំព័រហ្វេសប៊ុក ត្រូវបានបិទ និងធ្វើការដាក់ចេញនូវវិធានការណ៍សមរម្យដើម្បីធានាថាការកាត់ផ្តាច់នេះនឹងមិនមាននៅពេលអនាគតនោះទេ ហើយនិងបញ្ជាក់ឲ្យបានច្បាស់អំពីមូលហេតុដែលក្រុមហ៊ុនបន្តធ្វើការបិទគេហទំព័រផ្សេងទៀតដូចជា Ki-Media ជាដើម។
សេចក្តីថ្លែងការណ៍នេះគាំទ្រដោយ៖
១. Cambodian Center for Independent Media (CCIM)
២. Cambodian Domestic Worker Network (CWCD)
៣. Cambodian Food and Service Worker Federation (CFSWF)
៤. Cambodia's Independent Civil-Servants Association (CICA)
៥. Cambodian League for the Promotion and Defense of Human Rights (LICADHO)
៦. Cambodian Worker Center for Development (CWCD)
៧. Cambodian Youth Network (CYN)
៨. Coalition of Cambodian Farmer Community (CCFC)
៩. Community Legal Education Centre (CLEC)
១០. Community Peace-Building Network (CPN)
១១. Equitable Cambodia (EC)
១២. Farmer Development Association (FDA)
១៣. Independent Democracy of Informal Economy Association (IDEA)
១៤. Sahmakum Teang Tnaut (STT)
សម្រាប់ព័ត៌មានបន្ថែម សូមទាក់ទង៖
▪ លោក ប៉ា ងួនទៀង នាយកប្រតិបត្តិនៃមជ្ឈមណ្ឌលកម្ពុជាសម្រាប់ប្រព័ន្ធផ្សព្វផ្សាយព័ត៌មានឯករាជ្យ, ទូរស័ព្ទលេខ៖ ០១២ ៥៩៨ ០៦៦
▪ លោក យ៉េង វីរៈ នាយកប្រតិបត្តិនៃមជ្ឈមណ្ឌលអប់រំច្បាប់សម្រាប់សហគមន៍ ទូរស័ព្ទលេខ៖ ០១២ ៨០១ ២៣៥
▪ លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ, ទូរស័ព្ទលេខ៖ ០១២ ៥៣៤ ៧៩៦
▪ លោក អំ សំអាត អ្នកគ្រប់គ្រងបច្ចេកទេសស៊ើបអង្កេតនៃអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ, ទូរស័ព្ទលេខ៖ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម សេរីភាពអ៊ីនធឺណិត