អាជ្ញាធរ ត្រូវតែបង្ហាញពីទីកន្លែងដែលឃុំខ្លួនអ្នកត្រូវបានឃាត់ខ្លួនទាំងនោះ ឲ្យបានឆាប់បំផុត
ចេញផ្សាយ ថ្ងៃទី៦ ខែមករា ឆ្នាំ២០១៤; ក្រុមសង្គមស៊ីវិល
សមាជិកគ្រួសារ មេធាវី និងក្រុមគ្រូពេទ្យឯករាជ្យជំនាញមួយចំនួន ត្រូវបានគេបដិសេធផ្តល់ព័ត៌មានអំពីទីកន្លែងដែលបានឃុំខ្លួនអ្នកដែលត្រូវបានចាប់ខ្លួនទាំង ២៣ នាក់ នៅក្នុងអំឡុងពេលនៃការបង្ក្រាបយ៉ាងខ្លាំងក្លានៅរាជធានីភ្នំពេញ។ អ្នកដែលត្រូវបានចាប់ខ្លួនទាំងនោះ រួមមានយ៉ាងតិចអ្នកការពារសិទិ្ធមនុស្សចំនួន ៣នាក់ គឺលោក វន់ ពៅ លោក ថេង សាវឿន និងលោក ច័ន្ទ ពុទ្ធិស័ក។
អង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ និងមជ្ឈមណ្ឌលអប់រំច្បាប់សម្រាប់សហគមន៍ សូមអំពាវនាវដល់អាជ្ញាធរ សូមផ្តល់ព័ត៌មាននូវទីកន្លែងដែលឃុំខ្លួនអ្នកទាំងនោះ ហើយនិងផ្តល់នូវការអនុញ្ញាតចូលជួបអ្នកទាំងនោះភ្លាមៗផងដែរ។
ចាប់តាំងពីអ្នកទាំង ២៣ នាក់បានចូលក្នុងតុលាការ និងត្រូវបានចោទប្រកាន់កាលពីថ្ងៃសុក្រ និងសៅរ៍ មិនមានព័ត៌មានថ្មីណាមួយអំពីទីកន្លែងឃុំខ្លួនអ្នកទាំងនោះ ឬស្ថានភាពសុខភាពរបស់អ្នកទាំងនោះ ត្រូវបានដឹងនោះឡើយ។ មនុស្សមួយចំនួននៃអ្នកដែលត្រូវបានចាប់ខ្លួនទាំងនោះ ត្រូវបានវាយឲ្យរបួសយ៉ាងធ្ងន់ធ្ងរ ក្នុងពេលដែលមានការចាប់ខ្លួនអ្នកទាំងនោះ ហើយអ្នកទាំងនោះកំពុងត្រូវការការព្យាបាលជាបន្ទាន់។ មានអនីតិជនម្នាក់ក្នុងចំណោមអ្នកទាំងនោះ ក៏ត្រូវបានឃុំខ្លួនផងដែរ។ ភាគច្រើននៃអ្នកទាំងនោះ គឺជាកម្មកររោងចក្រកាត់ដេរ ដែលភាគច្រើនមានអាយុក្រោម ៣០ឆ្នាំ។
ណាលី ពីឡូក នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “យើងខ្ញុំមានការព្រួយបារម្ភជាខ្លាំងអំពីស្ថានភាពសុខភាព និងសុវត្ថិភាពផ្ទាល់ខ្លួនរបស់អ្នកដែលត្រូវបានឃុំខ្លួនទាំងនោះ”។ អ្នកនាងបានបន្តទៀតថា៖ “ការចូលជួបរបស់ក្រុមគ្រួសាររបស់អ្នកទាំងនោះ មេធាវី និងក្រុមគ្រូពេទ្យជាទៀងទាត់ និងភ្លាមៗ គឺជាការការពារពីការធ្វើទារុណកម្ម និងការធ្វើបាបលើអ្នកទាំងនោះ។ ឥឡូវនេះ អ្នកទាំងនោះនៅឆ្ងាយពីពិភពខាងក្រៅ និងនៅក្នុងស្ថានភាពបច្ចុប្បន្ននេះអ្វីៗក៏អាចកើតឡើងបានដែរដល់អ្នកទាំងនោះ។ អាជ្ញាធរគួរតែបញ្ចប់ភាពសម្ងាត់នេះឲ្យបានឆាប់បំផុត”។
របាយការណ៍ដែលមិនទាន់ត្រូវបានបញ្ចាក់មួយចំនួន បង្ហាញថាអ្នកទាំង ២៣ នាក់ អាចត្រូវបានបញ្ជូនទៅកាន់មណ្ឌលអប់រំកែប្រែទី១ (ម១) នៅពន្ធនាគារព្រៃស ក្នុងរាជធានីភ្នំពេញ ឬមណ្ឌលអប់រំកែប្រែទី៣ (ម៣) នៅត្រពាំងថ្លុង ក្នុងខេត្តកំពង់ចាម ដែលជាពន្ធនាគារមួយក្នុងចំណោមពន្ធនាគារដែលមានស្ថានភាពអាក្រក់បំផុតនៅក្នុងប្រទេសកម្ពុជា។ មណ្ឌលអប់រំកែប្រែទី៣ (ម៣) គឺជាពន្ធនាគារដាច់ស្រយាលមួយ ហើយពិបាកទៅដល់។ រហូតដល់បច្ចុប្បន្ននេះ មណ្ឌលអប់រំកែប្រែទី៣ (ម៣) បានឃុំខ្លួនទៅលើតែអ្នកទោសពេញវ័យដែលត្រូវបានផ្តន្ទាទោសរួចប៉ុណ្ណោះ។ គ្មានអនីតិជនណាម្នាក់ត្រូវបានឃុំខ្លួននៅក្នុងមណ្ឌលអប់រំកែប្រែទី១ (ម១) ឡើយ។
អ្នកនាង បានបន្តទៀតថា៖ “ប្រសិនបើជាការពិត ការបញ្ជូនអ្នកទោសទាំងនោះទៅកាន់ទីកន្លែងយ៉ាងឆ្ងាយដូចជា ម៣ គឺជាការវិវឌ្ឍន៍មួយដែលបានគិតទុកជាមុន និងជាវិធីដែលធ្វើឲ្យអ្នកទាំងនោះកាន់តែដុនដាប”។ “បុរសទាំងនោះ មិនទាន់ត្រូវបានផ្តន្ទាទោសអំពីបទល្មើសណាមួយនោះទេ ដូចនេះអ្នកទាំងនោះគួរតែត្រូវបានដាក់ដាច់ដោយឡែកពីអ្នកទោសដែលត្រូវបានផ្តន្ទាទោសរួចទាំងនោះ។ ការបិទបាំងព័ត៌មាន គឺមិនមានសារសំខាន់នោះទេ ហើយអាចជាការធ្វើឡើងដើម្បីលាក់អ្នករបួស ឬអាចសម្រួលឲ្យមានការធ្វើទារុណកម្ម និងអាចបង្កើតបរិយាកាសនៃភាពភ័យខ្លាច”។
អង្គការ លីកាដូ មានការព្រួយបារម្ភយ៉ាងខ្លាំងអំពីស្ថានភាពរបស់ យន់ ជា ដែលមានអាយុ ១៧ ឆ្នាំ។ អនីតិជន ត្រូវតែត្រូវបានដាក់ឲ្យនៅដាច់ដោយឡែកពីនីតិជន និងថែទាំទៅតាមអាយុរបស់អ្នកទាំងនោះ។ វាជាការបន្ទាន់មួយ ដែល យន់ ជា ត្រូវតែបានអនុញ្ញាតឲ្យជួបជាមួយគ្រួសាររបស់ខ្លួន។
ពន្ធនាគារភាគច្រើន នៅប្រទេសកម្ពុជា ខ្វះខាតនូវថ្នាំពេទ្យ និងបរិក្ខារពេទ្យជាមូលដ្ឋានមួយចំនួន។ បុគ្គលិក ខ្វះខាតការបណ្តុះបណ្តាល មិនមានវិជ្ជាជីវៈគ្រប់គ្រាន់ និងមិនចេះព្យាបាលក្នុងស្ថានភាពសង្គ្រោះបន្ទាន់នោះទេ។ ដោយផ្អែកលើការវាយដំ ដែលត្រូវបានឃើញដោយបុគ្គលិកអង្គការ លីកាដូ មនុស្សមួយចំនួននៃអ្នកទាំងនោះ ស្ថិតនៅក្នុងបញ្ហាសុខភាពធ្ងន់ធ្ងរ និងស្មុគស្មាញ ប្រសិនបើអ្នកទាំងនោះ មិនអាចជួបជាមួយនឹងក្រុមគ្រូពេទ្យជំនាញដែលមានសមត្ថភាពមួយចំនួនភ្លាមៗទេនោះ។
នៅពេលដែលអង្គការ លីកាដូ និងអ្នកដទៃទៀត បន្តស្វែងរកព័ត៌មានអំពីទីកន្លែងឃុំខ្លួនអ្នកទាំង ២៣ នោះ មានការកើនឡើងនៃការព្រួយបារម្ភអំពីសុវត្ថិភាពនាពេលអនាគតរបស់សកម្មជនសហគមន៍បឹងកក់ទាំង ៥នាក់ ដែលត្រូវបានចាប់ខ្លួនកាលពីព្រឹកមិញនេះ នៅពេលដែលអ្នកទាំងនោះបានរៀបចំធ្វើការតវ៉ាដោយអហិង្សា ដើម្បីឲ្យមានការដោះលែងអ្នកការពារសិទិ្ធមនុស្សដទៃទៀត។ សកម្មជនបឹងកក់ទាំងនោះ ត្រូវបានឃាត់ខ្លួននៅឯស្នងការដ្ឋាននគរបាលរាជធានីភ្នំពេញតាមបណ្តោយផ្លូវជាតិលេខ ៥។ អ្នកទាំងនោះមាន អ្នកស្រី ទេព វន្នី អ្នកស្រី យ៉ោម បុប្ផា អ្នកស្រី ផាន់ ឈុនរ៉េត អ្នកស្រី ប៉ុប ឆវី និងកញ្ញា សុង ស្រីលាភ។ អ្នកទាំងនោះ ធ្លាប់ត្រូវបានផ្តន្ទាទោស ហើយបញ្ជូនទៅពន្ធនាគារ ទាក់ទងនឹងការចូលរួមក្នុងការតវ៉ាដោយអហិង្សារបស់អ្នកទាំងនោះ។
លោក មឿន តុលា ប្រធានកម្មវិធីសិទិ្ធការងារនៃមជ្ឈមណ្ឌលអប់រំច្បាប់សម្រាប់សហគមន៍ បានមានប្រសាសន៍ថា៖ “អាជ្ញាធរកម្ពុជា ហាក់ដូចជាបោះបង់ចោលនូវការប្រកាន់យកលទិ្ធប្រជាធិបតេយ្យ នីតិរដ្ឋ និងយុត្តិធម៌”។ លោក បានបន្តទៀតថា៖ “ស្ត្រីទាំងនេះ ច្បាស់ណាស់គឺមិនបានធ្វើអ្វីខុសនោះទេ។ សំនួរចំបងមួយចំនួន ត្រូវបានសួរថាតើអ្វីនឹងកើតឡើងបន្ទាប់ ហើយអ្នកណាជាអ្នករងគ្រោះបន្ទាប់? ទង្វើអាក្រក់ទាំងនេះ ត្រូវតែបញ្ចប់ឥឡូវនេះ”។
ប៉ុន្មានថ្ងៃថ្មីៗនេះ អាជ្ញាធរ បានចេញនូវដីកាតុលាការមួយចំនួន ទៅលើមេដឹកនាំគណបក្សប្រឆាំង លោក សម រង្ស៊ី និងលោក កឹម សុខា ហើយនិងមេដឹកនាំសហជីពលោក រ៉ុង ឈុន។ ហើយមានដីកាចំនួនប្រាំបន្ថែមទៀត ដែលត្រូវបានគេជឿជាក់ថា នឹងត្រូវបានចេញ។
------
បុរសចំនួន ដប់នាក់ ដែលត្រូវបានចាប់ខ្លួនកាលពីថ្ងៃទី២ ខែមករា ឆ្នាំ២០១៤ ក្នុងអំឡុងពេលនៃការប៉ះទង្គិចគ្នារវាងកងសន្តិសុខ និងក្រុមបាតុករដែលជាកម្មករ នៅមុខរោងចក្រ យ៉ាក់ ជីង តាមបណ្តោយផ្លូវជាតិលេខ ៤ គឺមានលោក វន់ ពៅ, ថេង សាវឿន, ច័ន្ធ ពុទ្ធិស័ក, ឈឺម ធឿន, យ៉ុង សំអាត, រិទិ្ធ រដ្ឋា, ណាគ្រី វ៉ាន់ដា ,លន សាន, តេង ចន្នី និងសុគន្ធ សម្បត្តិពិសិដ្ឋ។ អ្នកទាំងនោះ ត្រូវបានបញ្ជូនខ្លួនទៅសាលាដំបូងរាជធានីភ្នំពេញកាលពីថ្ងៃទី៣ ខែមករា និងត្រូវបានចោទប្រកាន់ពីបទល្មើសមាត្រា ២១៨ និង៤១៤ នៃក្រមព្រហ្មទណ្ឌ (ហិង្សាដោយចេតនាដោយមានស្ថានទង្ងន់ទោស និងការបំផ្លាញទ្រព្យសម្បត្តិដោយចេតនាដោយមានស្ថានទង្ងន់ទោស)។
បុរសចំនួន ១៣ នាក់ផ្សេងទៀត ត្រូវបានចាប់ខ្លួននៅថ្ងៃទី៣ ខែមករា ក្នុងអំឡុងពេលប៉ះទង្គិចគ្នាមួយចំនួន ដែលបណ្តាលឲ្យបុរសចំនួន ៤ នាក់ត្រូវបានបាញ់សម្លាប់ដោយកងសន្តិសុខ ហើយយ៉ាងតិចណាស់មានមនុស្សចំនួន ៣៨ នាក់បានរងរបួស នៅក្បែរសួនឧស្សាហកម្ម កាណាឌីយ៉ា លើផ្លូវវេង ស្រេង។ អ្នកទាំងនោះគឺ លោក ម៉ម ពិសិដ្ឋ, នឹប សុឃួន, ផាង ត្រេន, ទី ស៊ីនួន, ហេង រដ្ឋា, ប៉ាង វណ្ណី, ភឿន ដា, ឆឿន យ៉ុង, រស់ សុភ័ណ្ឌ, ព្រង់ សារ៉ាត់, ជា សារ៉ាត់, យ៉ន់ ជា និងបួ សាវិត។ អ្នកទាំងនោះ ត្រូវបានចោទប្រកាន់កាលពីថ្ងៃទី៤ ខែមករា ពីបទល្មើសមាត្រា ២១៨ និង ៤១៤ នៃក្រមព្រហ្មទណ្ឌ។
អ្នកទាំង ២៣ នាក់ ប្រឈមមុខនឹងការឃុំខ្លួនបណ្តោះអាសន្នចំនួន ៦ ខែ និងជាប់ពន្ធនាគាររហូតដល់ ៥ ឆ្នាំ ហើយនិងពិន័យជាប្រាក់ចំនួនពី ១០០០ ដុល្លារ ទៅ ២៥០០ ដុល្លារ។
សម្រាប់ព័ត៌មានបន្ថែម សូមទាក់ទង៖
▪ លោក អំ សំអាត អ្នកគ្រប់គ្រងបច្ចេកទេសស៊ើបអង្កេតនៃអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ, ទូរស័ព្ទលេខ៖ ០១២ ៣២៧ ៧៧០
▪ លោក មឿន តុលា ប្រធានកម្មវិធីការងារនៃមជ្ឈមណ្ឌលអប់រំច្បាប់សម្រាប់សហគមន៍, ទូរស័ព្ទលេខ៖ ០៦៦ ៧៧៧ ០៥៦
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ ដោះលែង ២៣ នាក់ សិទ្ធិការងារ អំពើហិង្សាវ៉េង ស្រេង
