របាយការណ៍អង្គការ លីកាដូ៖ សក្ខីកម្ម នៃអំពើទារុណកម្ម និងការធ្វើបាប
ចេញផ្សាយ ថ្ងៃទី២៦ ខែមិថុនា ឆ្នាំ២០១៤
“ខ្ញុំត្រូវបានគេធ្វើទារុណកម្ម ដោយមិនមានមូលហេតុ។ នៅពេលដែលខ្ញុំត្រូវបានគេចោទប្រកាន់ ខ្ញុំត្រូវ បានគេវាយដំយ៉ាងហិង្សារហូតដល់សន្លប់។ ខ្ញុំបានដឹងខ្លួនឡើងវិញមួយរយៈ នៅពេលដែលខ្ញុំត្រូវបានគេបញ្ចូល ខ្យល់អុកស៊ីសែន។ ហើយបន្ទាប់មកខ្ញុំបានព្យាយាមពន្យល់ទៅកាន់អ្នកទាំងនោះថា ខ្ញុំមិនបានធ្វើអ្វីខុសទេ។
ខ្ញុំ ត្រូវបានគេសួរចម្លើយ និងវាយដំរហូតដល់សន្លប់ម្តងទៀត។”
នៅថ្ងៃទី២៦ ខែមិថុនា ដែលជាទិវាអន្តរជាតិការពារជនរងគ្រោះនៃអំពើទារុណកម្ម អង្គការ លីកាដូ បានចេញនូវរបាយការណ៍ ដែលជាការផ្តល់សក្ខីកម្មថ្មីមួយ និងការវិភាគលើការប្រើប្រាស់អំពើទារុណកម្ម និងការធ្វើបាបក្នុងពន្ធនាគារ និងប៉ុស្តិ៍នគរបាលនៅក្នុងប្រទេសកម្ពុជា រួមទាំងការរំលោភបំពានទៅលើអ្នកជាប់ពន្ធនាគារជាស្ត្រី និងអនីតិជន ហើយនឹងអ្នកដែលជួបប្រទះបញ្ហាសុខភាពផ្លូវចិត្ត។
តាមការសិក្សាស្រាវជ្រាវរបស់អង្គការ លីកាដូ បញ្ជាក់ថា មិនមានការផ្លាស់ប្តូរជាក់ស្តែងនូវប្រភេទភាពញឹកញាប់ និងភាពធ្ងន់ធ្ងរនៃការរំលោភបំពាន ដែលត្រូវបានរាយការណ៍កាលពីប៉ុន្មានឆ្នាំថ្មីៗមកនេះទេ។ អ្នក ទោសទាំងនោះបន្តរៀបរាប់ពីសកម្មភាពដែលខ្លួនត្រូវបានវាយដំ ទាត់ ទះ ឬដាល់ជារឿយៗរហូតដល់អ្នកទាំង នោះហូរឈាម និងសន្លប់។ ឧបករណ៍ដែលត្រូវបានប្រើប្រាស់ក្នុងការវាយដំនោះមានៈ កាំភ្លើង ដំបងឈើ ដំបង ដែក និងដំបងឆក់។ មួយក្នុងចំណោមគោលបំណងសំខាន់នៃការរំលោភបំពាន គឺនៅតែជាការបង្ខំឲ្យអ្នកទាំង នោះផ្តល់ចម្លើយសារភាព ឬថវិកា។
អង្គការ លីកាដូ ក៏បានទទួលរបាយការណ៍ផងដែរស្តីពីអ្នកជាប់ពន្ធនាគារ ដែលត្រូវបានគេវាយដួលលើដី រួចចាប់សក់អូសលើដី អ្នកដែលត្រូវបានបង្ខំឲ្យឈរជើងមួយរយៈពេលយូរ អ្នកដែលត្រូវបានឆ្មាំពន្ធនាគារឈរ និងជាន់លើដងខ្លួន និងមុខ អ្នកដែលត្រូវបានគេបង្ខំដាក់វត្ថុចូលក្នុងមាត់ ការធ្វើឲ្យរលាកដោយបារី អ្នកដែលត្រូវបានគេបង្ខំឲ្យលុតជង្គង់យូរក្រោមកំដៅថ្ងៃ អ្នកជាប់ពន្ធនាគារដែលត្រូវបានគេបង្អត់ខ្យល់ដកដង្ហើម និងប្រើប្រាស់ដំបងឆក់ ជាឧបករណ៍សម្រាប់ធ្វើទារុណកម្ម។
ណាលី ពីឡូក នាយិកាសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ បានមានប្រសាសន៍ថា៖ “ការផ្តល់សក្ខីកម្មដែលគួរឲ្យភ្ញាក់ផ្អើលទាំងអស់ខាងលើនេះ បានបញ្ជាក់ប្រាប់យើងយ៉ាងច្បាស់ថា អាជ្ញាធរកម្ពុជា មិនបានបំពេញការងារ និងការទទួលខុសត្រូវចំពោះការការពារ និងដាក់ទណ្ឌកម្មចំពោះសកម្មភាពនៃការធ្វើទារុណកម្ម និងការធ្វើបាបនោះទេ” ។ អ្នកនាងបានបន្តថា៖ “អាជ្ញាធរហាក់ដូចជាមិនមានសមត្ថភាពក្នុងការ បំពេញកាតព្វកិច្ចរបស់ខ្លួនចំពោះការបញ្ចប់អំពើទារុណកម្មក្នុងប្រទេសកម្ពុជានោះទេ។ មិនត្រឹមតែប៉ុណ្ណោះទេ អាជ្ញាធរហាក់ដូចជាមិនមានឆន្ទៈក្នុងការចាត់វិធានការណ៍ដោះស្រាយរាល់ការរំលោភបំពាននេះថែមទៀតផង”។
ប្រទេសកម្ពុជាបានផ្តល់សច្ចានុម័តលើពិធីសារបនែ្ថម នៃអនុសញ្ញារបស់អង្គការសហប្រជាជាតិទប់ស្កាត់ អំពើទារុណកម្ម និងការអំពើឃោឃៅផ្សេងទៀត អំពើអមនុស្សធម៌ ឬការបន្ថោកបន្ទាប ឬការដាក់ទណ្ឌកម្ម ក្នុងឆ្នាំ២០០៧។ ក្នុងចំណោមចំនុចជាច្រើនផ្សេងទៀត ពិធីសារបនែ្ថមនេះ តម្រូវឲ្យរដ្ឋភាគីបង្កើតយន្តការបង្ការថ្នាក់ជាតិឯករាជ្យមួយ (NPM) រយៈពេលមួយឆ្នាំបន្ទាប់នៃការផ្តល់សច្ចានុម័តនោះ។ ប្រទេសកម្ពុជានៅមិនបានបង្កើតយន្តការបង្ការថ្នាក់ជាតិឯករាជ្យនោះទេ ដែលគោលបំណងសំខាន់នៃការបង្កើតយន្តការនេះគឺដើម្បីឃ្លាំមើល និងការពារអំពើទារុណកម្ម និងការធ្វើបាបនៅមន្ទីរឃុំឃាំង។ ផ្ទុយទៅវិញ នៅឆ្នាំ២០០៩ គណៈកម្មាធិការអន្តរក្រសួងដែលមានសមាសភាពមកពីមន្រ្តីរាជរដ្ឋាភិបាលជាច្រើននាក់ បែរជាត្រូវបានបង្កើតឡើងទៅវិញ។ គណៈកម្មាធិការនេះ មិនមែនត្រឹមតែមិនមានឯករាជ្យភាពទេ ហើយថែមទាំងគ្មានប្រសិទ្ធិភាពទៀត។
បន្ថែមលើការរំលោភបំពានពីសំណាក់មន្រ្តីក្នុងពន្ធនាគារ និងប៉ុស្តិ៍នគរបាល អង្គការ លីកាដូ ចងក្រងជាប្រចាំនូវការរំលោភបំពានពីសំណាក់នគរបាល និងកងសន្តិសុខផ្សេងទៀតនៅពេលចាប់ខ្លួន និងអំឡុងពេលបញ្ជូនទៅប៉ុស្តិ៍នគរបាល។ នៅក្នុងពន្ធនាគារ ក៏មានករណីរំលោភបំពានពីសំណាក់អ្នកជាប់ពន្ធនាគារដូចគ្នា ដែលជារឿយៗមានការបញ្ជាដោយផ្ទាល់ ឬការយល់ព្រមពីអាជ្ញាធរពន្ធនាគារ។
លើសពីនេះទៀត អង្គការ លីកាដូ ជឿជាក់ថា ល័ក្ខខ័ណ្ឌនៃការឃុំខ្លួននៅតាមកន្លែងឃុំខ្លួនមួយចំនួន រួមទាំងការបដិសេធក្នុងការផ្តល់សេវាពេទ្យ អាចចាត់ចូលជាសកម្មភាពមួយ ដែលអាក្រក់ អមនុស្សធម៌ ឬការបន្ថោកបន្ទាប។ ក្នុងចំណោមការព្រួយបារម្ភជាពិសេសជាច្រើន ត្រូវបានរាយការណ៍ថា អ្នកដែលមានបញ្ហាសុខភាពផ្លូវចិត្តគឺប្រឈមនឹងហានិភ័យចំពោះការរំលោភបំពានក្នុងពន្ធនាគារ និងមន្ទីរឃុំឃាំងរបស់នគរបាល។
អង្គការដៃគូរបស់អង្គការ លីកាដូ គឺអង្គការចិត្តសង្គម និងអន្តរវប្បធម៌ (TPO) នៅប្រទេសកម្ពុជា ដែលជាអង្គការមិនមែនរដ្ឋាភិបាលឈានមុខគេនៅកម្ពុជាក្នុងវិស័យសុខភាពផ្លូវចិត្ត និងអន្តរាគមន៍ផ្នែកចិត្តសង្គម បានចងក្រងឯកសាររំលោភបំពានស្របជាមួយនឹងប្រភេទនៃការចោទប្រកាន់ ដែលទទួលបានដោយអង្គការ លីកាដូ និងបានកំណត់ផលប៉ះពាល់រយៈពេលយូរនៃការរំលោភបំពាននៅលើផ្លូវចិត្ត សុខុមាលភាពរបស់អតិថិជនរបស់ខ្លួន។
អតិថិជនរបស់អង្គការ TPO នៅក្នុងពន្ធនាគារដែលបានទទួលរងគ្រោះ ឬបន្តទទួលរងគ្រោះពីការធ្វើទារុណកម្ម ឬការធ្វើបាប បានរាយការណ៍ថា មានរោគសញ្ញាដូចជា៖ ឈឺក្បាល ថប់អារម្មណ៍ បាក់ទឹកចិត្ត ទទួលទានដំណេកមិនបានលក់ស្រួល ចេះតែចងចាំរឿងអតីតកាល មានការភ័យខ្លាច ឆាប់ខឹង និងងាយមានប្រតិកម្ម។ អតិថិជនមួយចំនួនរបស់អង្គការ TPO ដែលជួបប្រទះនឹងការរំលោភបំពាន បានប៉ុនប៉ងធ្វើអត្តឃាត។
កញ្ញា ង៉ែត សុគន្ធ អ្នកគ្រប់គ្រងគម្រោងពន្ធនាគាររបស់អង្គការ លីកាដូ បានមានប្រសាសន៍ថា៖ “អាជ្ញាធរកម្ពុជាគួរតែមានការអៀនខ្មាស ដែលប្រភេទនៃការរំលោភបំពានទាំងនេះ នៅតែបន្តកើនឡើង និងវិធានការណ៍ក្នុងការការពារ គឺមានភាពទន់ខ្សោយ ហើយលទ្ធភាពក្នុងការទទួលបានយុត្តិធម៌នៅមានកម្រិត”។
កញ្ញាបានបន្តទៀតថា៖ “គួរឲ្យស្តាយណាស់ អង្គការ លីកាដូ ជឿថាអត្រាពិតនៃអំពើទារុណកម្ម និងការធ្វើបាប គឺមានកម្រិតខ្ពស់ជាងអ្វីដែលបានចងក្រងទុកជាឯកសារ ពីព្រោះការរំលោភបំពានជាច្រើននៅតែមានការលាក់ បាំង”។
វាជាការលំបាកណាស់ក្នុងការ ដែលអាចឲ្យយើងដឹងពីទំហំពិតនៃអំពើទារុណកម្ម និងការធ្វើបាបទៅលើអ្នកជាប់ឃុំក្នុងប្រទេសកម្ពុជា។ ទោះជាយ៉ាងណាអ្នកជាប់ឃុំមួយចំនួននៅតែបន្តទទួលរងការធ្វើបាបលើរូបរាងកាយ និងផ្លូវចិត្តក្នុងមន្ទីឃុំឃាំងរបស់នគរបាល អ្នកទាំងនោះ មានលទ្ធភាពតិចតួចណាស់ក្នុងការទទួលបាននូវយន្តការដាក់ពាក្យបណ្តឹង និងសំណងការខូចខាតប្រកបដោយប្រសិទ្ធិភាព ហើយអ្នកដែលត្រូវទទួលខុសត្រូវកម្រត្រូវបានផ្តន្ទាទោសណាស់។
ណាលី ពីឡូក នាយិកាអង្គការសិទិ្ធមនុស្ស លីកាដូ បានមានប្រសាសន៍ថា៖ “ដរាបណាតុលាការកម្ពុជាបន្តទទួលយកចម្លើយសារភាព ដែលទទួលបានពីការបង្ខិតបង្ខំ ដរាបនោះបុរស ស្រី្ត និងកុមារនៅតែបន្តរងការវាយដំ គំរាមកំហែង និងរងរបួសនៅក្នុងការឃុំឃាំងរបស់អាជ្ញាធររដ្ឋ ហើយនៅខណៈដែលអ្នកបញ្ជា ផ្តល់ជំនួយ ឬប្រព្រឹត្តអំពើទារុណកម្មនៅតែរួចខ្លួនពីការផ្តន្ទាទោសតាមច្បាប់ នោះការបេ្តជ្ញាពិតប្រាកដរបស់កម្ពុជាក្នុងការហាមឃាត់ដាច់ខាតចំពោះអំពើទារុណកម្ម និងការធ្វើបាបនៅតែជាបញ្ហាធ្ងន់ធ្ងរ”។
របាយការណ៍របស់អង្គការ លីកាដូ ក៏មាននូវយោបល់ចំនួន ១២ ចំនុច ជូនអាជ្ញាធរកម្ពុជារួមបញ្ចូលទាំងការរៀបចំច្បាប់ជាតិជាក់លាក់ស្តីអំពីការទប់ស្កាត់អំពើទារុណកម្ម ការបង្កើតយន្តការបង្ការថ្នាក់ជាតិឯករាជ្យពិតប្រាកដមួយ និងស្ថាប័នការពារស៊ីវិលមួយដែលអាចដោះស្រាយបណ្តឹងទៅលើនឹងនគរបាល ប្រកដោយប្រសិទ្ធិភាព និងភ្នាក់ងារអនុវត្តច្បាប់មួយចំនួនទៀត។
សម្រាប់ព័ត៌មានបន្ថែម សូមទាក់ទង៖
▪ លោកស្រី វេជ្ជបណ្ឌិត ពុង ឈីវកេក ប្រធានអង្គការ លីកាដូ ០១២ ៨០២ ៥០៦
▪ លោក អំ សំអាត អ្នកសម្របសម្រួលបច្ចេកទេសស៊ើបអង្កេតនៃអង្គការ លីកាដូ ០១២ ៣២៧ ៧៧០
PDF៖ ទាញយកសេចក្តីថ្លែងការណ៍ជាភាសាអង់គ្លេស - ទាញយកសេចក្តីថ្លែងការណ៍ជាភាសាខ្មែរ
MP3៖ ស្តាប់សំឡេងជាភាសាខ្មែរ
- ឯកសារទាក់ទង
- ចំណងជើង & មូលបទ
- បញ្ហាពន្ធនាគារ
