អស់រយៈពេល៧ឆ្នាំ ការអំពាវនាវឱ្យមានយុត្តិធម៌ទៅលើឃាតកម្មលោកបណ្ឌិត កែម ឡី នៅតែបន្ត
ចេញផ្សាយ ថ្ងៃទី១០ ខែកក្កដា ឆ្នាំ២០២៣នាថ្ងៃនេះ ប្រជាពលរដ្ឋ តំណាងគណបក្សនយោបាយ និងក្រុមសង្គមស៊ីវិល រួមមានបុគ្គលិកអង្គការមិនមែនរដ្ឋាភិបាល និងសកម្មជនជាច្រើននាក់ បានជួបជុំគ្នាដើម្បីប្រារព្ធខួប៧ឆ្នាំនៃឃាតកម្មលើលោកបណ្ឌិត កែម ឡី ។ ពួកគេនៅតែបន្តអំពាវនាវឱ្យមានការស៊ើបអង្កេតឱ្យបានហ្មត់ចត់ និងឥតលម្អៀង ទៅលើការមរណភាពរបស់លោកបណ្ឌិត ដើម្បីបង្ហាញការពិត និងផ្ដល់យុត្តិធម៌សម្រាប់រូបលោក ក៏ដូចជាក្រុមគ្រួសាររបស់លោក ។
កាលពីថ្ងៃទី១០ ខែកក្កដា ឆ្នាំ២០១៦ លោកបណ្ឌិត កែម ឡី ត្រូវបានបាញ់សម្លាប់ ខណៈដែលលោកកំពុងពិសាកាហ្វេ នាព្រឹកនោះ នៅស្តាម៉ាតស្ថានីយប្រេងឥន្ធនៈកាល់តិចស្តុបបូកគោ ក្នុងរាជធានីភ្នំពេញ ។ លោកបណ្ឌិត ដែលជាអ្នកវិភាគនយោបាយ និងអ្នកអត្ថាធិប្បាយដ៏មានប្រជាប្រិយភាព ត្រូវបានឃាតករបាញ់សម្លាប់អំឡុងពេលដែលមានការកើនឡើងនៃការធ្វើទុក្ខបុកម្នេញដល់អ្នកការពារសិទ្ធិមនុស្ស និងគណបក្សជំទាស់ នាពេលនោះ ។ ការស៊ើបអង្កេតលើអំពើឃាតកម្មនេះ បានខកខានក្នុងការបង្ហាញមុខជនល្មើសផ្សេងទៀតក្រៅពីឃាតករដែលត្រូវបានផ្ដន្ទាទោសដោយហេតុផលមិនគួរឱ្យជឿទុកចិត្តបាន ហើយការស៊ើបអង្កេតពេលនោះនៅតែត្រូវបានចាត់ទុកថា មិនគ្រប់គ្រាន់ ។
នាថ្ងៃនេះ ប្រជាពលរដ្ឋបានជួបជុំគ្នានៅរាជធានីភ្នំពេញ ដើម្បីដាក់កម្រងផ្កា និងគោរពវិញ្ញាណក្ខន្ធរបស់លោក នៅស្តាម៉ាតកាល់តិចស្តុបបូកគោ ដោយស្ថិតក្រោមការឃ្លាំមើលរបស់អាជ្ញាធរស្លៀកពាក់ស៊ីវិលប្រមាណជា ១៥នាក់ ។ លោក រ៉ុង ឈុន អនុប្រធានគណបក្សភ្លើងទៀន និងជាសកម្មជនសិទ្ធិមនុស្សលេចធ្លោមួយរូប បានធ្វើការអត្ថាធិប្បាយក្នុងការចងចាំដល់លោកបណ្ឌិត កែម ឡី ។ សកម្មជនបរិស្ថាន ក៏បានលើកឡើងពីវីរភាពរបស់លោកបណ្ឌិតផងដែរ ។ ក្រោយមក អ្នកចូលរួមក៏បានរួមគ្នាប្រារព្វការរំលឹកខួបនេះនៅសហភាពផ្ទះសាមគ្គី ។ បុគ្គលិកអង្គការសង្គមស៊ីវិល បានជួបជុំគ្នានៅគេហដ្ឋានរបស់លោកបណ្ឌិត កែម ឡី នៅខេត្តតាកែវ ដើម្បីបង្ហាញពីការគោរព និងអំពាវនាវរកយុត្តិធម៌ ៕
- ចំណងជើង & មូលបទ
- តុលាការ និងនីតិរដ្ឋ សិទិ្ធបញ្ចេញមតិ និងចូលរួម ឃាតកម្ម កែម ឡី