អាជ្ញាធរហាមឃាត់សហគមន៍មិនឱ្យរើសសម្រាម និងពិភាក្សាគ្នាពីសិទ្ធិដីធ្លី
ចេញផ្សាយ ថ្ងៃទី១ ខែតុលា ឆ្នាំ២០១៨សហគមន៍យ៉ាងតិចចំនួន២ ត្រូវបានអាជ្ញាធរហាមឃាត់ពីការប្រារព្ធទិវាសិទ្ធិលំនៅដ្ឋានពិភពលោករបស់អង្គការសហប្រជាជាតិ ហើយសហគមន៍ដទៃទៀតលុបចោលគម្រោងប្រារព្ធទិវានេះវិញ ដោយសារភ័យខ្លាចការបង្ក្រាបផ្សេងៗ។
ប្រជាពលរដ្ឋប្រមាណជាង២០០០ នាក់ នៃសហគមន៍យ៉ាងតិច៣០ នៅទូទាំងប្រទេស បានគ្រោងរៀបចំព្រឹត្តិការណ៍ផ្សេងៗ ដើម្បីបង្កើនចំណេះដឹងរបស់ប្រជាពលរដ្ឋនៅឆ្នាំនេះ ក្រោមប្រធានបទ “ការគ្រប់គ្រងកាកសំណល់ក្នុងទីក្រុង” ក៏ដូចជា ប្រធានបទប្រចាំឆ្នាំស្ដីពី “សិទ្ធិទទួលបានលំនៅដ្ឋានសមរម្យ”។ សកម្មភាពទាំងនេះកំពុងត្រូវបានរៀបចំឡើងរយៈពេល១សប្ដាហ៍ គឺចាប់ពីថ្ងៃទី២៨ ខែកញ្ញា រហូតដល់ថ្ងៃទី៥ ខែតុលា ឆ្នាំ២០១៨ ដែលអ្នកទាំងនោះភាគច្រើនជាជនរងគ្រោះនៃការរំលោភយកដីធ្លីនិងការបណ្ដេញចេញដោយបង្ខំ។
យោងតាមអង្គការសហប្រជាជាតិ ទិវាសិទ្ធិលំនៅដ្ឋានពិភពលោក គឺជាឱកាសមួយសម្រាប់ “ឆ្លុះបញ្ចាំងពីរដ្ឋស្ដីពីទីក្រុងរបស់យើង និងសិទ្ធិជាមូលដ្ឋានរបស់យើងទាំងអស់គ្នាក្នុងការទទួលបានលំនៅដ្ឋានសមរម្យ”។
សហគមន៍នៅក្នុងរាជធានីភ្នំពេញ រួមទាំងសហគមន៍បុរីកីឡា និងសហគមន៍បឹងកក់ បានប្រារព្ធទិវាសិទ្ធិលំនៅដ្ឋានពិភពលោក ដោយការប្រមូលសម្រាម សកម្មភាពកុមារនិងការពិភាក្សាគ្នាលើសិទ្ធិលំនៅដ្ឋានរបស់ប្រជាពលរដ្ឋ ប៉ុន្តែត្រូវបានឃ្លាំមើលយ៉ាងតឹងរឹងពីសំណាក់កងសន្តិសុខ ដែលដូចគ្នានឹងការប្រារព្ធទិវានេះកាលពីឆ្នាំមុនៗដែរ។
ទោះបីជាយ៉ាងណា សហគមន៍មួយចំនួនត្រូវបានអាជ្ញាធរ គំរាមកំហែង និងបំភិតបំភ័យ ដែលនាំឱ្យសហគមន៍ខ្លះត្រូវបង្ខំចិត្តប្រារព្ធទិវានេះនៅក្នុងបន្ទប់បិទជិត ឬក៏លុបចោលគម្រោងវិញតែម្ដង។
កាលពីថ្ងៃសុក្រ អាជ្ញាធរបានបញ្ឈប់ការប្រារព្ធទិវាសិទ្ធិលំនៅដ្ឋាននៅសហគមន៍ព្រែកតាគង់៦០ម៉ែត្រ ក្នុងរាជធានីភ្នំពេញ នៅពេលអ្នកទាំងនោះចាប់ផ្ដើមប្រមូលសម្រាម ដោយអាជ្ញាធរបានចោទប្រកាន់ការជួបជុំគ្នានោះថាខុសច្បាប់។ តំណាងសហគមន៍ម្នាក់ត្រូវបានឃាត់ខ្លួន និងបង្ខំឱ្យផ្ដិតមេដៃលើលិខិតមួយ ដោយសន្យាថា នឹងមិនរៀបចំព្រឹត្តិការណ៍បែបនេះ នៅថ្ងៃខាងមុខទេ បើគ្មានការអនុញ្ញាតពីអាជ្ញាធរ។
នៅឯខេត្តសៀមរាបវិញ ការជួបជុំរបស់សហគមន៍មួយត្រូវបានអាជ្ញាធរក្នុងតំបន់ហាមឃាត់ ដោយបានចោទប្រកាន់ការជួបជុំគ្នានេះថាខុសច្បាប់ ទោះបីជាអ្នកទាំងនោះបានជួនដំណឹងទៅអាជ្ញាធរទាំងនោះជាមុនរួចហើយ។ ថ្ងៃនេះ សហគមន៍ភ្នំក្រោមបានគ្រោងថានឹងធ្វើការដើរជាក្បួនជុំវិញទីតាំងដែលអ្នកទាំងនោះរស់នៅ ដើម្បីដើររើសសម្រាម ក៏ដូចជាពិភាក្សាគ្នាអំពីសិទ្ធិដីធ្លីនិងលំនៅដ្ឋាន។ ទោះបីជាយ៉ាងណា សហគមន៍នេះ ត្រូវបានបង្ខំឱ្យលុបចោលព្រឹត្តិការណ៍នេះវិញ ដោយសារតែការគំរាមកំហែងពីការបង្ក្រាបផ្សេងៗ បើសហគមន៍នៅតែចង់ប្រារព្ធទិវានេះ។
ព្រឹត្តិការណ៍ជាច្រើនទៀត ត្រូវបានគ្រោងថានឹងរៀបចំឡើងនៅថ្ងៃបន្តបន្ទាប់ខាងមុខនេះ។
MP3 format: ស្តាប់សំឡេងជាភាសាខ្មែរ
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិដីធ្លី
- ឯកសារទាក់ទង