ក្បួនធម្មយាត្រា-សិទិ្ធយាត្រានៅទូទាំងប្រទេស បានបន្តដំណើរទៅមុខសម្រាប់ទិវាសិទិ្ធមនុស្សអន្តរជាតិ
ចេញផ្សាយ ថ្ងៃទី៦ ខែធ្នូ ឆ្នាំ២០១៤
នាព្រឹកនេះ ក្បួនអហិង្សាតាមបណ្តោយផ្លូវជាតិលេខ ១ ២ ៣ ៤ ៥ និង៦ បានបន្តធ្វើដំណើរតាមផ្លូវរបស់ខ្លួនឆ្ពោះមកកាន់រាជធានីភ្នំពេញ ដើម្បីប្រារព្ធទិវាសិទិ្ធមនុស្សអន្តរជាតិ ១០ ធ្នូ។
នៅក្នុងខេត្តតាកែវ លើផ្លូវជាតិលេខ ២ អ្នកដើរហែក្បួនត្រូវបានអនុញ្ញាតឲ្យបន្តដំណើរនាព្រឹកនេះ បន្ទាប់ពីកងយោធា និងមន្ត្រីនគរបាល ដែលប្រដាប់ដោយអាវុធ AK ៤៧ បានបិទផ្លូវហែក្បួន ក្រោមការបញ្ជាពីអភិបាលខេត្តតាកែវលោក ឡាយ វណ្ណៈ។ អ្នកដើរហែក្បួនជាច្រើន ដោយគ្មានជម្រើស បានសម្រេចចិត្តសម្រាកហាលវាលអស់មួយយប់នៅទីនោះ។
នៅលើផ្លូវជាតិលេខ ៦ អ្នកដើរហែក្បួនប្រមាណ ២០០ នាក់ និងព្រះសង្ឃ ៣០អង្គ មកពីខេត្តរតនគីរី និងកំពង់ចាម ត្រូវបានបដិសេធក្នុងការចូលស្នាក់នៅនៅក្នុងវត្តស្គន់កាលពីយប់ម្សិលមិញ បន្ទាប់ពីមន្ត្រីសង្ឃស្រុកជើងព្រៃ បានបិទក្លោងទ្វាវត្ត។ អ្នកដើរហែក្បូួនជាច្រើនបានរកបានដីមួយកន្លែងដើម្បីស្នាក់នៅ ដោយមានខ្ទមតូចមួយចម្ងាយ ៥ គ.ម ពីផ្លូវជាតិ។
លើសពីនេះ នាថ្ងៃនេះផ្លូវជាតិលេខ ៦ អ្នកដើរហែក្បួន អាចសម្រាកបានតែពេលថ្ងៃត្រង់ បន្ទាប់ពីប្រជាពលរដ្ឋក្នុងតំបន់ជំរុញឲ្យព្រះសង្ឃបើកសោរក្លោងទ្វារ។
ក្បួនហែអហិង្សាតាមបណ្តោយផ្លូវផ្សេងៗទៀត បានបន្តដំណើរទៅមុខដូចពីថ្ងៃមុនដោយមិនមានព្រឹត្តិការណ៍អ្វីធ្ងន់ធ្ងរនោះឡើយ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម
