សំណុំរឿងអនុប្រធានគណបក្សសង្គ្រោះជាតិ ឯកឧត្ដម កឹម សុខា ត្រូវបានជំនុំជម្រះដោយកំបាំងមុខ
ចេញផ្សាយ ថ្ងៃទី៩ ខែកញ្ញា ឆ្នាំ២០១៦
.jpeg)
នាព្រឹកនេះ អនុប្រធានគណបក្សសង្គ្រោះជាតិ ឯកឧត្ដម កឹម សុខា ត្រូវបានជំនុំជម្រះដោយកំបាំងមុខ រយៈពេលជាង១ម៉ោង ពាក់ព័ន្ធទៅនឹងបទចោទអំពីការបដិសេធចូលខ្លួនបំភ្លឺក្នុងនាមជាសាក្សី នៅសាលាដំបូងរាជធានីភ្នំពេញ។ ព្រះរាជអាជ្ញាបានស្នើតុលាការចាត់ការលើសំណុំរឿងនេះជាបទល្មើសជាក់ស្ដែង មានន័យថា ឯកឧត្ដម កឹម សុខា មិនអាចប្រើប្រាស់អភ័យឯកសិទ្ធិសភាបានទេ។
បទចោទនេះត្រូវបានលើកយកមកចោទប្រកាន់កាលពីខែឧសភា ក្រោយពីឯកឧត្ដម កឹម សុខា បានបដិសេធចូលខ្លួនបំភ្លឺក្នុងនាមជាសាក្សីចំនួនពីរលើក ក្នុងសំណុំរឿងនៃតំណាងរាស្រ្តពីររូបរបស់គណបក្សសង្គ្រោះជាតិ ដែលត្រូវបានចោទប្រកាន់ពីបទសញ្ចារកម្ម។ សំណុំរឿងរបស់តំណាងរាស្រ្តទាំងពីររូបនេះ ពាក់ព័ន្ធនឹងការចោទប្រកាន់នៃអំពើពេស្យាកម្មទៅលើរូប អ្នកនាង ខុម ចាន់តារាទី ហៅ ស្រី មុំ ដែលអ្នកនាងត្រូវបានគេចោទថា នាងធ្លាប់មានទំនាក់ទំនងស្នេហាជាមួយ ឯកឧត្ដម កឹម សុខា។
អ្នកគាំទ្រគណបក្សសង្គ្រោះជាតិប្រហែលជា២០០នាក់បានប្រមូលផ្ដុំគ្នានៅខាងក្រៅតុលាការ អំឡុងពេលសវនាការ ខណៈដែលកងកម្លាំងនគរបាលចម្រុះបានដាក់ពង្រាយនៅក្បែរពហុកីឡាដ្ឋានជាតិអូឡាំពិក។ អ្នកគាំទ្រម្នាក់ (លោក អ៊ុំ ដារ៉ា ហិរញ្ញិកគណបក្សសង្គ្រោះជាតិនៅក្នុងរាជធានីភ្នំពេញ) ត្រូវបានចាប់ខ្លួន និងត្រូវបានបញ្ជូនខ្លួនទៅកាន់អធិការដ្ឋាននគរបាលខណ្ឌ៧មករា ក្រោយពីមានការប៉ះទង្គិចគ្នាបន្ដិចរវាងមន្រ្តីនគរបាល និងអ្នកគាំទ្រគណបក្សសង្គ្រោះជាតិមួយចំនួន។
នៅទីស្នាក់ការកណ្ដាលគណបក្សសង្គ្រោះជាតិក្នុងរាជធានីភ្នំពេញ ឯកឧត្ដម កឹម សុខា បានមានប្រសាសន៍ទៅកាន់អ្នកគាំទ្រប្រហែល៥០០នាក់មកពីទូទាំងប្រទេស ដែលកំពុងប្រមូលផ្ដុំគ្នានៅទីនោះ ទោះបីជាមន្រ្តីនគរបាលបានដាក់ពង្រាយប៉ុស្ដ៍ត្រួតពិនិត្យតាមផ្លួវសំខាន់ៗមួយចំនួន ចូលមករាជធានីភ្នំពេញ តាំងពីម្សិលមិញក៏ដោយ។ ចំណែកអ្នកគាំទ្រគណបក្សសង្គ្រោះជាតិមួយចំនួនទៀតក៏ត្រូវបានហាមឃាត់មិនឲ្យធ្វើដំណើរពីខេត្តស្វាយរៀង និងខេត្តកំពត ចូលមករាជធានីភ្នំពេញផងដែរ។
ព័ត៌មានថ្មី៖ នៅម៉ោង២រសៀលនេះ ឯកឧត្ដម កឹម សុខា ត្រូវបានផ្ដន្ទាទោសពីបទបដិសេធចូលខ្លួនបំភ្លឺក្នុងនាមជាសាក្សីនៅតុលាការ យោងតាមមាត្រា៥៣៨នៃក្រមព្រហ្មទណ្ឌនៃព្រះរាជាណាចក្រកម្ពុជា។ លោក កែវ មុន្នី ចៅក្រមជំនុំជម្រះបានសម្រេចផ្តន្ទាទោស ឯកឧត្ដម កឹម សុខា ឲ្យជាប់ពន្ធនាគាររយៈពេល៥ខែ និងពិន័យជាប្រាក់ចំនួន ៨០ម៉ឺនរៀល (២០០ដុល្លារ)។
- ឯកសារទាក់ទង
- ចំណងជើង & មូលបទ
- តុលាការ និងនីតិរដ្ឋ កឹម សុខា
