សាលាដំបូងខេត្តកោះកុងបើកសវនាការលើសំណុំរឿងសកម្មជនមាតាធម្មជាតិ
ចេញផ្សាយ ថ្ងៃទី២៥ ខែមករា ឆ្នាំ២០១៨នាព្រឹកនេះ សាលាដំបូងខេត្តកោះកុងបើកសវនាការលើសំណុំរឿងសកម្មជនពីរនាក់នៃអតីតអង្គការមាតាធម្មជាតិ ដែលត្រូវបានចាប់ខ្លួនកាលពីខែកញ្ញា ឆ្នាំ២០១៧ ខណៈពេលកំពុងថតសកម្មភាពកប៉ាល់នាំខ្សាច់ចេញទៅក្រៅប្រទេស ដែលអ្នកទាំងពីរសង្ស័យថាខុសច្បាប់។
លោក ឌឹម គុនឌី និងលោក ហ៊ុន វណ្ណៈ ត្រូវបានចាប់ខ្លួននៅក្នុងស្រុកគិរីសាគរ កាលពីថ្ងៃទី១២ ខែកញ្ញា ឆ្នាំ២០១៧ ហើយត្រូវបានចោទប្រកាន់ថាជាប់សង្ស័យពីបទប៉ះពាល់សិទ្ធិខាងរូបភាពនៃបុគ្គល និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍។ អ្នកទាំងពីរត្រូវបានឃុំខ្លួនបណ្ដោះអាសន្នរង់ចាំសវនាការតាំងពីពេលនោះមក។ ការចាប់ខ្លួនអ្នកទាំងពីរធ្វើឡើងត្រឹមតែពីរថ្ងៃប៉ុណ្ណោះ បន្ទាប់ពីអតីតអង្គការមាតាធម្មជាតិបានបង្ហោះវីដេអូនៅលើប្រព័ន្ធអ៊ីនធើណេត ដែលពណ៌នាពីការនាំចេញខ្សាច់ស៊ីលីកាទៅកាន់តៃវ៉ាន់ដោយមិនត្រឹមត្រូវ។
ប្រសិនបើត្រូវបានផ្ដន្ទាទោសលើបទចោទទាំងពីរ សកម្មជនទាំងពីរនាក់អាចប្រឈមនឹងការជាប់ពន្ធនាគាររហូតដល់២ឆ្នាំ និងពិន័យជាប្រាក់ជាអតិបរមាចំនួន ៦លានរៀល យោងតាមមាត្រា៤៩៥ស្ដីពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ និងមាត្រា៣០២នៃក្រមព្រហ្មទណ្ឌដែលចែងពីអំពើថតរូបភាពនៃបុគ្គលនៅក្នុងទីកន្លែងឯកជនដោយគ្មានការព្រមព្រៀង។
កាលពីខែសីហា ឆ្នាំ២០១៥ សកម្មជនមាតាធម្មជាតិ៣នាក់ផ្សេងទៀតត្រូវបានចាប់ខ្លួន ខណៈដែលកំពុងធ្វើយុទ្ធនាការប្រឆាំងនឹងការបូមខ្សាច់ដោយខុសច្បាប់ និងត្រូវបានផ្ដន្ទាទោសឱ្យជាប់ពន្ធនាគាររយៈពេល១ឆ្នាំកន្លះ។ ចំណែកឯស្ថាបនិកនៃមាតាធម្មជាតិ លោក Alejandro Gonzalez-Davidson (អាឡិច) ដែលមានសញ្ជាតិអេស៉្បាញ ត្រូវបានឃាត់ខ្លួននិងបណ្ដេញចេញពីប្រទេសកម្ពុជានៅថ្ងៃទី២៣ ខែកុម្ភៈ ឆ្នាំ២០១៥។
លោក ឌឹម គុនឌី និងលោក ហ៊ុន វណ្ណៈ ត្រូវបានអង្គការលើកលែងទោសអន្តរជាតិ (Amnesty International) ទទួលស្គាល់ថាជាអ្នកទោសមនសិការ។
តុលាការនឹងប្រកាសសាលក្រមលើករណីនេះនៅថ្ងៃស្អែកទី២៦ ខែមករា ឆ្នាំ២០១៨។
- ឯកសារទាក់ទង
- ចំណងជើង & មូលបទ
- មាតាធម្មជាតិ