សាលាឧទ្ធរណ៍បដិសេធសំណើរសុំនៅក្រៅឃុំរបស់អតីតអ្នកសារព័ត៌មានវិទ្យុអាស៊ីសេរីជាលើកទីពីរ
ចេញផ្សាយ ថ្ងៃទី១៩ ខែមេសា ឆ្នាំ២០១៨
នាថ្ងៃនេះ សាលាឧទ្ធរណ៍បានសម្រេចបដិសេធសំណើរសុំនៅក្រៅឃុំរបស់អតីតអ្នកសារព័ត៌មានវិទ្យុអាស៊ីសេរីពីររូបគឺ លោក យាង សុធារិន និងលោក អ៊ួន ឈិន ដោយលើកហេតុផលថា ខ្លាចក្រែងអ្នកទាំងពីររត់គេចខ្លួនទៅក្រៅប្រទេស ឬមិនចូលរួមដំណើរការជំនុំជម្រះរឿងក្ដីនេះនៅតុលាការ។ នេះគឺជាសំណើរសុំនៅក្រៅឃុំលើកទីពីររបស់អ្នកទាំងពីរ ដែលកំពុងត្រូវបានឃុំខ្លួនក្នុងពន្ធនាគារបណ្តោះអាសន្នរង់ចាំសវនាការ តាំងពីថ្ងៃទី១៨ ខែវិច្ឆិកា ឆ្នាំ២០១៧។
អាជ្ញាធរបានចាប់ខ្លួន លោក សុធារិន និង លោក ឈិន កាលពីថ្ងៃទី១៤ ខែវិច្ឆិកា ឆ្នាំ២០១៧ និងបានចោទប្រកាន់អ្នកទាំងពីរពីបទចារកម្ម តាមមាត្រា ៤៤៥ នៃក្រមព្រហ្មទណ្ឌ ពាក់ព័ន្ធនឹងការផ្តល់ព័ត៌មានដល់រដ្ឋ ឬភ្នាក់ងារបរទេស ដែលអាច “អន្តរាយដល់ការការពារជាតិ”។ មិនមានភ័ស្ដុតាងគាំទ្រលើបទចោទនេះ ត្រូវបានបង្ហាញឡើងជាសាធារណៈនោះទេ។
អ្នកទាំងពីរ ធ្លាប់បានបម្រើការងារឲ្យវិទ្យុអាស៊ីសេរីជាភាសាខ្មែរ រហូតដល់ស្ថាប័នព័ត៌មានដែលមានទីស្នាក់ការកណ្តាលនៅសហរដ្ឋអាមេរិកមួយនេះ សម្រេចចិត្តបិទការិយាល័យនៅទីក្រុងភ្នំពេញ កាលពីថ្ងៃទី១២ ខែតុលា ឆ្នាំ២០១៧ ដោយអះអាងថាមានការគាបសង្កត់ពីអាជ្ញាធររដ្ឋ ហើយត្រូវបង្ខំចិត្តបិទការផ្សាយព័ត៌មានតាមស្ថានីយវិទ្យុនានា តាំងពីពេលនោះមក។
ប្រធានក្រុមប្រឹក្សាជំនុំជម្រះនៃតុលាការកំពូល លោកចៅក្រម ឃឹម ប៉ុន បានសម្រេចបដិសេធសំណើរសុំនៅក្រៅឃុំរបស់អ្នកទាំងពីរម្ដងរួចមកហើយ កាលពីខែមីនា ដោយលើកហេតុផលថា រឿងក្ដីនេះស្ថិតក្នុងដំណាក់កាលស៊ើបអង្កេតនៅឡើយ ហើយការដោះលែងអ្នកទាំងពីរ អាចនឹងបណ្តាលឲ្យមានការ “ខូចខាតធ្ងន់ធ្ងរ”។ លើសពីនេះ អ្នកទាំងពីរក៏ត្រូវបានចោទប្រកាន់ពីបទចោទផ្សេងទៀត តាមច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
ប្រសិនបើត្រូវបានផ្ដន្ទាទោស អ្នកទាំងពីរអាចប្រឈមនឹងការជាប់ពន្ធនាគារពី ៧ ឆ្នាំ ដល់ ១៥ ឆ្នាំ។ កាលបរិច្ឆេទនៃសវនាការលើអង្គសេចក្តី នៅមិនទាន់ត្រូវបានប្រកាសនៅឡើយទេ៕
- ឯកសារទាក់ទង
- ចំណងជើង & មូលបទ
- វាយប្រហារលើអ្នកសារព័ត៌មាន និងបញ្ហាប្រព័ន្ធផ្សព្វផ្សាយ
