មេដឹកនាំសមាគមម្នាក់ទៀត ត្រូវបានចាប់ខ្លួនអំឡុងពេលនៃការជួបជុំគ្នាដើម្បីអំពាវនាវឲ្យមានការដោះលែងមេដឹកនាំសមាគម និងកម្មកររោងចក្រទាំង ២៣ នាក់
ចេញផ្សាយ ថ្ងៃទី១៩ ខែមករា ឆ្នាំ២០១៤ការជួបជុំនាល្ងាចនេះ ដើម្បីអំពាវនាវទាមទារឲ្យមានការដោះលែងកម្មករ និងសកម្មជនសិទិ្ធមនុស្សទាំង ២៣នាក់ ដែលត្រូវបានចាប់ខ្លួនកាលពីដើមខែនេះ ហើយនិងទាមទារឲ្យមានការតំឡើងប្រាក់ខែគោល ត្រូវបានបញ្ឈប់ដោយមានការចាប់ខ្លួនលោក សុខ ឈុនអឿង អនុប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA)។ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ត្រូវបានចាប់ខ្លួនជាមួយកម្មករ និងសកម្មជនសិទិ្ធមនុស្ស ២២ នាក់ផ្សេងទៀតកាលពីដើមខែនេះ។
នៅម៉ោង ៤ ល្ងាច មុនពេលការជួបជុំចាប់ផ្តើម អ្នកកាសែត និងអ្នកសង្កេតការណ៍ផ្នែកសិទិ្ធមនុស្សដែលកំពុងរង់ចាំការមកដល់នៃក្រុមស្នូលនៅមុខវត្តឧណ្ណាលោម ត្រូវបានបង្ខំឲ្យចាកចេញពីទីនោះ ដោយកងសន្តិសុខ និងអាជ្ញាធរស្លៀកពាក់ស៊ីវិលចំនួនប្រហែល ៥០ នាក់ ដោយមានពាក់មួកសុវត្ថិភាពពណ៌ខ្មៅជាច្រើន។ ក្រុមដែលធ្វើការជួបជុំ បានដើរទៅមុខទីសក្ការៈព្រះអង្គដងកើ ដែលនៅមុខព្រះបរមរាជវាំងវិញ ដោយមានការតាមយ៉ាងកៀកពីក្រុមសន្តិសុខ និងអាជ្ញាធរស្លៀកពាក់ស៊ីវិលទាំងនោះ។ នៅប្រហែលម៉ោង ៥ ល្ងាច ព្រឹត្តិការណ៍ជាច្រើនបានកើតឡើង ដែលរួមមានទាំងក្រុមសន្តិសុខធ្វើការគម្រាមកំហែង និងរុញអ្នកចូលរួមការជួបជុំចេញពីទីនោះអស់ជាងមួយម៉ោង។ អ្នករៀបចំកម្មវិធីជួបជុំ និងអ្នកសង្កេតការណ៍ផ្នែកសិទិ្ធមនុស្សមួយចំនួន បានធ្វើការឆ្លើយតបនឹងសកម្មភាពទាំងនោះវិញ ដោយការកាន់ដៃគ្នា ហើយច្រៀងចម្រៀងជាតិ (បទនគររាជ) និងចម្រៀងនៃការតស៊ូអហិង្សា។ នៅក្នុងអំឡុងពេលនោះ រថយន្តនគរបាលអន្តរាគមន៍យ៉ាងតិចណាស់ ចំនួន ២ គ្រឿង បានមកដល់។ នៅម៉ោង ៥ និង ៣០ នាទី អ្នកទាំងនោះបានចាប់លោក សុខឈុន អឿង ដែលកំពុងឈរនៅខាងក្រោយការជួបជុំគ្នានោះ។ លោក ត្រូវបានបញ្ជូនខ្លួនទៅកាន់ស្នងការដ្ឋាននគរបាលរាជធានីភ្នំពេញ។ ក្រុមមេធាវី នាពេលនេះ កំពុងព្យាយាមស្នើសុំឲ្យមានការដោះលែងរូបលោក។ យោងតាមច្បាប់កម្ពុជា លោកអាចត្រូវបានឃុំខ្លួនរហូតត្រឹមតែ ២៤ ម៉ោងប៉ុណ្ណោះ ដោយមិនបានជួបមេធាវី និងរហូតដល់ ៤៨ ម៉ោង ប៉ុណ្ណោះ ដោយគ្មានការចោទប្រកាន់។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម ដោះលែង ២៣ នាក់