ការប្រកាសសាលក្រមករណីកុមារម្នាក់ អាយុ ១៦ឆ្នាំ ដែលមានជំងឺអូទីស្សឹម ត្រូវបានលើកពេល
ចេញផ្សាយ ថ្ងៃទី១៣ ខែតុលា ឆ្នាំ២០២១សាលាដំបូងរាជធានីភ្នំពេញ បានសម្រេចលើកពេលប្រកាសសាលក្រមដោយមិនកំណត់ ក្នុងសំណុំរឿងមួយដែលពាក់ព័ន្ធនឹងកុមារម្នាក់ អាយុ ១៦ឆ្នាំ ដែលជាកូនប្រុសរបស់អតីតសមាជិកគណបក្សជំទាស់ដែលកំពុងជាប់ឃុំក្នុងពន្ធនាគារ ដោយលើកហេតុផលថា ចៅក្រមក្នុងសំណុំរឿងនេះ “ជាប់រវល់” ។
កុមារដែលម្ដាយរបស់គេបានអះអាងថា មានជំងឺអូទីស្សឹម ត្រូវបានចោទប្រកាន់ពីបទញុះញង់ និងបទប្រមាថមន្រ្តីរាជការសាធារណៈ បន្ទាប់ពីត្រូវបានចាប់ខ្លួន កាលពីថ្ងៃទី ២៤ ខែមិថុនា ឆ្នាំ២០២១ ។ ភស្តុតាងក្នុងសំណុំរឿងនេះរួមមាន សារឆ្លងឆ្លើយក្នុងកម្មវិធីថេលេក្រាម (Telegram) ។ បទចោទនៃមាត្រា៤៩៤ មាត្រា៤៩៥ និងមាត្រា៥០២នៃក្រមព្រហ្មទណ្ឌ កំណត់ការដាក់ទោសជាប់ពន្ធនាគារជាអតិបរមារហូតដល់ ២ឆ្នាំ និងប្រាក់ពិន័យផ្សេងទៀត ។
កុមារនេះ ធ្លាប់ត្រូវបានបដិសេធក្នុងការដោះលែងឱ្យនៅក្រៅឃុំ កាលពីថ្ងៃទី០៣ ខែសីហា ឆ្នាំ២០២១ ហើយគិតត្រឹមពេលនេះ គេត្រូវបានឃុំខ្លួនក្នុងពន្ធនាគាររយៈពេល ១១១ថ្ងៃហើយ ដោយពុំបានរស់នៅជាមួយគ្រួសាររបស់គេទេ ។ កុមារនេះ ក៏ធ្លាប់ជាគោលដៅនៃការវាយប្រហារដោយអំពើហិង្សាផងដែរ ក្នុងនោះមានហេតុការណ៍ក្នុងខែមេសា ឆ្នាំ២០២១ នៅពេលដែលមានការគប់ដុំឥដ្ឋចំក្បាលរបស់គេ បណ្ដាលឱ្យរងរបួស ព្រមទាំងត្រូវដេរព្យាបាលរបួស ។
កាលបរិច្ឆេទថ្មីនៃការប្រកាសសាលក្រមនេះ ពុំទាន់ត្រូវបានកំណត់នៅឡើយទេ ។
ច្បាប់ស្ដីពីយុត្តិធម៌អនីតិជន បានចែងថា ការឃុំខ្លួនបណ្ដោះអាសន្នរង់ចាំសវនាការ គួរតែជាជម្រើសចុងក្រោយសម្រាប់កុមារ ហើយអាទិភាពនេះ គួរតែផ្ដល់ឱ្យករណីកុមារដែលស្ថិតក្រោមការឃុំខ្លួនបណ្ដោះអាសន្ន ។ មាត្រា២១៤នៃក្រមនីតិវិធីព្រហ្មទណ្ឌ បានកម្រិតរយៈពេលឃុំខ្លួនបណ្ដោះអាសន្នលើកុមារអាយុពី ១៦ ទៅ ក្រោម១៨ឆ្នាំ ដែលត្រូវបានចោទប្រកាន់ពីបទមជ្ឈិម ត្រឹមតែ ៤ខែប៉ុណ្ណោះ ៕
- ចំណងជើង & មូលបទ
- សិទ្ធិកុមារ តុលាការ និងនីតិរដ្ឋ សិទិ្ធបញ្ចេញមតិ និងចូលរួម បញ្ហាពន្ធនាគារ