ការបាញ់ប្រហារនៅមហាវិថីវេងស្រេង កន្លងទៅ១០ឆ្នាំដោយគ្មានយុត្តិធម៌
ចេញផ្សាយ ថ្ងៃទី៣ ខែមករា ឆ្នាំ២០២៤នារសៀលនេះ មនុស្សប្រមាណ១០០នាក់ បានប្រមូលផ្តុំគ្នានៅការិយាល័យផ្ទះសាមគ្គី ក្នុងរាជធានីភ្នំពេញ ដើម្បីរំលឹកខួប១០ឆ្នាំ នៃអំពើហិង្សាដ៏ព្រៃផ្សៃ ដែលបានកើតឡើង នៅលើមហាវិថីវេងស្រេង ក្នុងរាជធានីភ្នំពេញ នៅពេលដែលកងកម្លាំងចម្រុះរបស់រាជរដ្ឋាភិបាល បានបើកការបាញ់ប្រហារទៅលើកម្មករ-កម្មការិនីដែលកំពុងធ្វើកូដកម្ម ដោយបានបណ្ដាលឱ្យស្លាប់មនុស្សយ៉ាងតិច៤នាក់ និងរងរបួស ៣៨នាក់ផ្សេងទៀត ។ លើសពីនេះ កុមារ ខឹម សុផាត ដែលជាអនីតិជននាពេលនោះ ក៏បានត្រូវគ្រាប់កាំភ្លើង និងបន្តបាត់ខ្លួនមកដល់បច្ចុប្បន្ននេះ ។
ការប្រារព្ធពិធីចងចាំនេះ ត្រូវបានចូលរួមដោយសហជីព សមាគម ក៏ដូចជាថ្នាក់ដឹកនាំ និងសមាជិកអង្គការមិនមែនរដ្ឋាភិបាល ដោយបានចាប់ផ្ដើមដោយការសូត្រមន្តដោយព្រះសង្ឃ ។ លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ដែលត្រូវបានវាយដំ និងចាប់ខ្លួន ក្នុងឆ្នាំ២០១៤ អំឡុងពេលដែល ឃ្លាំមើលកូដកម្មមួយ នៅខាងមុខរោងចក្រ យ៉ាក ជីង មុនពេលបាញ់ប្រហារមួយថ្ងៃ បានថ្លែងនៅក្នុងការប្រារព្ធពិធីនេះផងដែរ ។
លោក វន់ ពៅ បានមានប្រសាសន៍ថា “ថ្ងៃទី០២ មករា គឺថ្ងៃសោកនាដកម្ម ។ មុនពេលចាប់ខ្លួន គេមិនបានប្រាប់យើងពីបទចោទទេ ហើយយើងក៏មិនបានជួបមេធាវីដែរ ។ យើងគ្រាន់តែតវ៉ាឱ្យមានការដំឡើងប្រាក់ខែសម្រាប់កម្មករប៉ុណ្ណោះ” ។
សេចក្ដីថ្លែងការណ៍រួមមួយ ដែលគាំទ្រដោយអង្គការសង្គមស៊ីវិល សហជីព និងសមាគម ក៏ត្រូវបានអាន ដោយអំពាវនាវឱ្យរាជរដ្ឋាភិបាលគោរពសិទ្ធិកម្មករ និងផ្ដល់សំណងជំងឺចិត្ត ដល់ជនរងគ្រោះនៃអំពើបាញ់ប្រហារនោះ និងក្រុមគ្រួសាររបស់ពួកគេ ក្នុងនោះរួមមានអ្នកដែលត្រូវបានឃុំខ្លួនដោយមិនត្រឹមត្រូវផងដែរ ។
ការបង្ក្រាបយ៉ាងហិង្សានៅលើមហាវិថីវេងស្រេង គឺជាការឆ្លើយតបដ៏ឃោរឃៅ និងមិនសមស្រប ចំពោះកូដកម្មដោយសន្តិវិធី របស់កម្មកររោងចក្រកាត់ដេរ ដែលទាមទារដំឡើងប្រាក់ឈ្នួលអប្បបរមា ។ ការស៊ើបអង្កេតដ៏ខ្លីមួយ បានខកខានក្នុងការដាក់ទោសទៅលើអាជ្ញាធរ ដែលទទួលខុសត្រូវ ចំពោះការបាញ់ប្រហារ និងការស្លាប់របស់លោក គឹម ផាលាភ លោក សាម រ៉ាវី លោក យាន រឹទ្ធី លោក ផេង កុសល និងអ្នករងរបួស ក៏ដូចជាការបាត់ខ្លួនរបស់កុមារា ខឹម សុផាត ដែលមានអាយុ ១៥ឆ្នាំ នាពេលនោះ ។
ផ្ទុយទៅវិញ កម្មករ និងអ្នកការពារសិទ្ធិមនុស្ស ចំនួន ២៣នាក់ ត្រូវបានចាប់ខ្លួននៅហ្នឹងកន្លែង ហើយក្រោយមក ត្រូវបានផ្ដន្ទាទោសពីបទចោទព្រហ្មទណ្ឌជាច្រើនដែលគ្មានមូលដ្ឋាន ។ ការផ្ដន្ទាទោសទាំងនោះ ត្រូវបានតម្កល់ ដោយសាលាឧទ្ធរណ៍ភ្នំពេញ កាលពីដើមឆ្នាំនេះ ៕