ក្រុមសកម្មជនត្រូវបានសាកសួរជុំវិញយុទ្ធនាការកោះកុងក្រៅ
ចេញផ្សាយ ថ្ងៃទី៧ ខែមករា ឆ្នាំ២០២៤យុវជននិងសកម្មជនបរិស្ថានចំនួន ១២ រូប ហើយនិងជនបរទេសមួយរូប ត្រូវបានឃាត់ខ្លួនយកទៅសាកសួរអស់រយៈពេលជាច្រើនម៉ោងដោយអាជ្ញាធរខណ្ឌដូនពេញ និងនគរបាលអន្តោប្រវេសន៍ បន្ទាប់ពីពួកគេធ្វើសកម្មភាពតស៊ូមតិដោយអហិង្សា ដើម្បីស្នើសុំឲ្យអាជ្ញាធរអភិរក្សកោះនៅក្នុងខេត្តកោះកុង ។
ខណៈដែលសកម្មជនទាំងនោះ កំពុងតែកាន់បដា ធ្វើលំហាត់ប្រាណ និងថតរូបនៅឯតាមបណោ្តយមាត់ទន្លេនាព្រឹកនេះ ពួកគេត្រូវបានឃ្លាំមើលពីសំណាក់ក្រុមសន្តិសុខស្លៀកពាក់ស៊ីវិល ។ ក្រោយមក ពេលដែលពួកគេរៀបចាកចេញទៅ ស្រាប់តែក្រុមសន្តិសុខខណ្ឌដូនពេញបានបង្ខំឱ្យពួកគេឡើងលើឡាន និងបានដឹកពួកគេទៅកាន់សាលាខណ្ឌដូនពេញតែម្តង ដើម្បីសាកសួរ ។
អាជ្ញាធរនាំពួកគេទៅ ដោយលើកមូលហេតុថាពួកគេកាន់បដាដែលមានសរសេរថា “ថ្ងៃអាទិត្យសម្រាប់កោះកុងក្រៅ” ហើយយុវជន ទាំង ១៣ នាក់នោះក៍ត្រូវឃាត់ខ្លួន ហើយបន្តសាកសួររហូតដល់ថ្ងៃរសៀល និងត្រូវបានដោះលែងវិញនៅវេលាម៉ោង ៦ ល្ងាចនេះ ។
ក្រុមយុវជន និងសកម្មជនបរិស្ថាននៅតែបន្តសកម្មភាពតស៊ូមតិដើម្បីឱ្យរាជរដ្ឋាភិបាលដាក់បញ្ចូលកោះកុងក្រៅជាតំបន់ការពារក្នុងខេត្តកោះកុង ។ បណ្តាកោះទាំងនោះគ្រោងនឹងត្រូវអភិវឌ្ឍ (រួមទាំងតំបន់សេដ្ឋកិច្ចពិសេសដែលត្រូវបានអភិវឌ្ឍ) ដោយ លោក លី យ៉ុងផាត់ សមាជិកព្រឹទ្ធសភាមកពីគណបក្សកាន់អំណាច ។
ក្រុមសកម្មជនបរិស្ថានត្រូវបានធ្វើទុក្ខបុកម្នេញ ដោយត្រូវបានហាមឃាត់មិនឱ្យជិះកង់ពីខេត្តកោះកុងមកកាន់រាជធានីភ្នំពេញកាលពីឆ្នាំ២០២០ ដែលសកម្មភាពជិះកង់នេះជាផ្នែកមួយនៃយុទ្ធនាការ “សង្រ្គោះកោះកុងក្រៅ” ៕
- ចំណងជើង & មូលបទ
- សិទិ្ធបញ្ចេញមតិ និងចូលរួម លី យ៉ុងផាត់ មាតាធម្មជាតិ