បុគ្គលិកក្រុមហ៊ុនសាំង កាល់តិច បាតុកម្មទាមទារតំឡើងប្រាក់ខែអប្បបរមា ១៦០ ដុល្លារ
ចេញផ្សាយ ថ្ងៃទី១២ ខែឧសភា ឆ្នាំ២០១៤
នាព្រឹកនេះចាប់ផ្តើមពីម៉ោង ៧ ព្រឹក កម្មករប្រមាណជាង ២០០ នាក់ នៃស្ថានីយ៍ប្រេងឥន្ធនៈ កាល់តិច ចំនួន ១៧ សាខា ទូទាំងរាជធានីភ្នំពេញ បានចាប់ផ្តើមធ្វើបាតុកម្មទាមទារតំឡើងប្រាក់ខែអប្បបរមាចំនួន ១៦០ ដុល្លារ ហើយនិងអត្ថប្រយោជន៍សម្រាប់បុគ្គលិកផ្សេងៗទៀត។ កម្មករជាច្រើនគ្រោងនឹងបន្តការធ្វើបាតុកម្មរហូតដល់ការទាមទាររបស់អ្នកទាំងនោះទទួលបានសម្រេចលទ្ធផល។
បាតុកម្មនេះ ត្រូវបានធ្វើឡើងបន្ទាប់ពីមានមហាបាតុកម្មកម្មកររោងចក្រកាត់ដេរនៅចុងឆ្នាំ ២០១៣ នៅពេលដែលកម្មកររោងចក្រកាត់ដេរ ចាប់ផ្តើមទាមទារប្រាក់ខែគោលរបស់ខ្លួនចំនួន យ៉ាងតិច ១៦០ ដុល្លារអាមេរិក ក្នុងមួយខែ។ កាលពីដើមខែមករា ឆ្នាំ២០១៤ រាជរដ្ឋាភិបាល បានបង្ក្រាបយ៉ាងហិង្សាលើក្រុមបាតុករជាច្រើន ដែលបណ្តាលឲ្យយ៉ាងតិចមនុស្សចំនួន ៤នាក់បានស្លាប់ ៣៨នាក់ត្រូវបានបញ្ជូនទៅកាន់មន្ទីរពេទ្យ ហើយ២៣ នាក់ដែលរួមមានកម្មករ និងអ្នកការពារសិទិ្ធមនុស្ស ត្រូវបានចាប់ និងឃុំខ្លួន។
ទោះជាមានការបង្ក្រាបពីអាជ្ញាធររដ្ឋក៏ដោយ ក៏កម្មករ និងសហជីពជាច្រើន បានបន្តការទាមទាររបស់ខ្លួន ក្នុងការតំឡើងប្រាក់ឈ្នួលអប្បបរមា។ នៅថ្ងៃទី៦ ខែកុម្ភៈ កម្មករក្រុមហ៊ុនប្រមូលសម្រាមក្នុងរាជធានីភ្នំពេញ ស៊ីនទ្រី បានទាមទារការតំឡើងប្រាក់ឈ្នួលដោយជោគជ័យ បន្ទាប់ពីធ្វើបាតុកម្មមិនប្រមូលសម្រាមអស់ជាច្រើនថ្ងៃ៖ ប្រាក់ខែសម្រាប់អ្នកប្រមូលកើនពី ៦៥ ដុល្លារ ទៅ៩០ ដុល្លារ ហើយប្រាក់ខែអ្នកបើកបររថយន្តប្រមូលសម្រាមពេលយប់កើនពី ១២០ ទៅ ១៤០ ដុល្លារ។ ដូចគ្នាដែរ កាលពីថ្ងៃទី១១ ខែឧសភា ឆ្នាំ២០១៤ កម្មកររោងចក្រស្រាបៀរ អង្គរ បានធ្វើបាតុកម្មរយៈពេល ២ថ្ងៃ ទាមទារតំឡើងប្រាក់ខែ ដោយជាលទ្ធផលប្រាក់ខែអ្នកទាំងនោះត្រូវបានតំឡើងពី ១២០ ដល់ ១៥០ ដុល្លារ ក្នុងមួយខែ។
- ឯកសារទាក់ទង
- ចំណងជើង & មូលបទ
- សិទិ្ធបញ្ចេញមតិ និងចូលរួម សិទ្ធិការងារ
