នាល្ងាចនេះ តុលាការក្រុងភ្នំពេញ បានផ្តន្ទាទោសសកម្មជនដីធ្លី ៣ នាក់ និងព្រះសង្ឃដែលទើបត្រូវ បានផ្សឹក ១ អង្គ បន្ថែមទៀត ឲ្យជាប់ពន្ធនាគាររយៈពេល ១ ឆ្នាំ និងពិន័យជាប្រាក់ចំនួន ៥០០ ដុល្លារ បន្ទាប់ពីផ្តន្ទាទោសពួកគាត់ពីបទប្រឆាំងនឹងអ្នករាជការសាធារណៈ មានស្ថានទម្ងន់ទោស (មាត្រា ៥០៤ នៃក្រមព្រហ្មទណ្ឌ)។

អ្នកទាំង ៤ នាក់ ត្រូវបានចាប់ខ្លួនកាលពីម្សិលមិញ ពេលដែលពួកគាត់ចូលរួមប្រមូលផ្តុំគ្នា ដោយសន្តិវិធី នៅខាងមុខតុលាការ ដើម្បីអំពាវនាវឲ្យដោះលែងសកម្មជនដីធ្លីមកពីសហគមន៍ បឹងកក់ទាំង ៧ នាក់។ ស្ត្រីអ្នកសហគមន៍បឹងកក់ទាំង ៧ នាក់ ត្រូវបានឃុំខ្លួនកាលពីថ្ងៃច័ន្ទ ហើយត្រូវបានផ្តន្ទាទោស ឲ្យជាប់ពន្ធនាគាររយៈពេល ១ ឆ្នាំផងដែរ ពីបទរារាំងចរាចរណ៍ សាធារណៈ ក្នុងរយៈពេលត្រឹមតែជាង ២៤ ម៉ោងប៉ុណ្ណោះ។